Read Pangasinan EZEKIEL 18 Bible Online

EZEKIEL 18 - Pangasinan bible

EZEKIEL 18

¹"Say Katawan akisalitad siak

²"tan inkuanto, Anto ta yay probirbio ya olit-oliten ya ibaga na saray totoo ed dalin na Israel? Kakanen na saray atateng so ubas ya anapseng, Balet saray anak so nakikilem.

³"Legan a siak so mabilay a Dios, kuay Katawan a Dios, ag yo la oliten yan probirbio ed Israel.

⁴"Kayaryan ko so bilay na amin a too, say bilay da ray atateng tan say bilay da ray anak. Say toon mankasalanan sikato so ompatey.

⁵"Bilbilang a walan tuay matonung, maung, tan maptek a sakey a too.

⁶"Sayan too et ag mangigagalang ed saray talintaoy diriyos na saray Israelita odino mamangan na saray imbagat ed saray aliwan manepeg ya altar. Ag to pandadaleman na aro sa asawa na kapara ton too odino miaakdul ed biin peles a naliliberan.

⁷"Ag to sasaolen odino tatakewan so siopaman. Ipapawil to so impotika na akautang ed sikato; iitdan to na nakan iray narasan tan kawes iray anggapoy nipales.

⁸"Ag to ipapaabang so kuarta to. Ag to labay so manggawa na antokaman a kaogsan tan diad antokaman a kolkolan say katonungan so ipapasumpal to.

⁹"Oonuren to ray ganggan ko tan aapigeren ton sumpalen iray bangat ko. Sayan too so tuan matonung, et sikatoy mambilay, kuay Katawan a Dios.

¹⁰Insan bilbilang sayan too et walay lakin anak to a matakew tan managpatey na too, tan gagawaen to so anggan dinan ed saraya

¹¹ya ag balut ginawa na ama to. Mamangakan na saray imbagat ed saray aliwan manepeg ya altar tan pandadaleman to na aro so asawa na kapara ton lalaki.

¹²Sasaolen to ray mairap-bilay, mantatakew, ag to ipapawil so ipopotika na saray akautang ed sikato. Oonlad kawalaan da ray paganon altar, tan igagalang to ray makapaingungot a talintaoy diriyos,

¹³tan ipapaabang toy kuarta to. Mambilay kasi? Andi, ag mambilay. Ompatey, lapud ginagawa to ray makapaingungot a bengatla. Sikaton dili so natetel ed ipatey to.

¹⁴Natan, bilbilang sayan too et walay lakin anak to. Nanenengneng toy amin a kasalanan a gagawaen na ama to, balet et ag to ra aaligen.

¹⁵Ag to gagalangen iray talintaoy diriyos na saray Israelita tan ag mamangan na saray imbagat ed aliwan manepeg ya altar. Ag to pandadaleman na aro so asawa na kapara ton laki

¹⁶odino papairapen iray arum a totoo odino tatakewan so siopaman. Ipapawil toy impotika na akautang ed sikato. Iitdan toy nakan iray narasan tan kawes iray anggapoy nipales.

¹⁷Ag to labay so manggawa na antokaman a kaogsan tan ag to ipapaabang so kuarta to. Oonuren to ray ganggan ko tan susumpalen to ray bilin ko. Ag ompatey lapud saray kasalanan nen ama to, no ag ingen sikatoy mambilay.

¹⁸Balet si ama to, et nansasaol tan nantatakew tan nanggagaway kaogsan ed balang sakey a too. Kanyan inatey lapud saray dilin kasalanan to.

¹⁹Balet tetepeten yo, Akin et ag nadudusa so anak, lapud kasalanan na ama to? Say ebat et lapud nanggawa na kaptekan tan kamaungan so anak. Inonur to ray ganggan ko tan inapiapiger to ran sinumpal, kanyan andi-saew a mambilay.

²⁰Say nankasalanan sikato so ompatey. Say anak et ag nadusa lapud saray kasalanan na ama to, odino say ama lapud saray kasalanan nen anak to. Natumangan so toon matonung lapud saray kamaungan a gagawaen to, tan nadusa so toon maoges lapud saray kaogsan a gagawaen to.

²¹No say toon maoges et ontondan mankasalanan tan onuren to ray ganggan ko, no gawaen toy kaptekan tan say kamaungan, sikatoy ag ompatey; andi-duaruwan mambilay.

²²Napirdona ray amin a kasalanan to, tan sikatoy mambilay, lapud matonung iray ginagawa to.

²³Abaloan yo a maliket ak a makanengneng ed maoges a too ya ompatey? tepet na Katawan a Dios. Andi, labay ko nin sikatoy nanengneng kon magbabawi tan mambilay.

²⁴Balet no say toon matonung et ontondan manggaway kamaungan tan onggapo lan manggaway kaogsan, a salanti saray makapaingungot a gagawaen na saray totoon maoges, mansiansia kasin mambilay? Andi! Ag la nanunotan iray antokaman a ginawa ton kamaungan. Ompatey lapud aliwan matoor tan lapud saray kasalanan to.

²⁵Balet kuanyo, Aliwan matonung so gagawaen na Katawan a Dios! Dengel yo ak, sikayo ran Israelita. Abaloan yo aliwan maptek so gagawaen ko? Saray gagawaen yo ingen so aliwan maptek.

²⁶No say toon matonung et ontondan manggaway kamaungan tan onggapon manggaway kaogsan insan ompatey, saray ginagawa ton kaogsan so makasengeg na impatey to.

²⁷No ontondan mankasalanan so toon maoges tan manggawa lay kaptekan tan kamaungan, nilaban to so bilay to.

²⁸Nabibirbir to so gagawaen to tan ontotondan mankasalanan, kanyan andi-duaruwan ag ompatey, no ag ingen mansiansian mambilay.

²⁹Ingen sikayo ran Israelita kuanyo, Aliwan maptek so gagawaen na Katawan a Dios! Abaloan yo, aliwan maptek so gagawaen ko? Saray gagawaen yo ingen so aliwan maptek.

³⁰Siak, a Katawan a Dios, ibabagak ed sikayo ya Israelita a sintinsiaan koy balang sakey ed sikayo onung na ginawa to. Magbabawi kayo lad saray maoges a gagawaen yo tan ag yo aabuloyan a deralen kayo na kasalanan yo.

³¹Tondaan yo la ray kaogsan a gagawaen yo, tan iyalaan yo lay sikayon dili na balon isip tan puso. Akin et labay yoy ompatey, sikayo ran Israelita?

³²Ag ko labay ya ompatey so siopaman, Kuay Katawan a Dios. Ikaindan yo la ray kasalanan yo et mansiansia kayon mambilay.