Read Pangasinan EZEKIEL 2 Bible Online

EZEKIEL 2 - Pangasinan bible

EZEKIEL 2

¹"Nen anengneng ko ya, tinmikleb ak ed dalin. Insan ko nadngel so bosis a kuanto, Sika a toon ompatey, alagey ka. Labay koy mitongtong ed sika.

²"Nen mansasalita may bosis, linmoob ed siak so ispiritu na Dios tan impaalagey to ak, insan ko nadngel nin nansalita imay bosis,

³"Sika a toon ompatey, ibaki ta ka ed saray totood Israel. Linmaban irad siak tan sinumpa ra ak tan itutuloy day onlaban ed siak, a singa ginawa na saray lalaki ra.

⁴"Anawet so olo ra tan ag da ak gagalangen, kanyan ibabaki ta kan mangibagad sikara na labay kon ibagad sikara, siak a Katawan a Dios.

⁵"Dengelen ka man o andi na saraman a totoon mananumpa ed siak, naamtaan da a sakey a propita so nibakid sikara.

⁶"Balet sika a toon ompatey, ag mo ra tatakotan odino saray ibabaga ra. Sumpaen da ka tan pabaingan da ka; singa kad satan mimiamung ed saray alakdan. Ag mo tatakotan ira man a totoon mananumpa odino saray ibabaga ra.

⁷"Ibagam ed sikaray amin a salitaen mo, dengelen da ka man odino andi. Nudnunot mon ontan lay isusumpa rad siak.

⁸"Sika a toon ompatey, dengel moy ibabagak ed sika. Ag ka onsusumpan singa sikara. Sangi ka tan akan moy iter kod sika.

⁹"Anengneng koy liman onaarap ed siak, tan sankabembenan toy nilokut a babasaen.

¹⁰Inlokas na samay lima imay babasaen, et anengneng ko a walay sulat ed nantopag. Nisulat diman iray akis na ermen, dageyem, tan sinagem.