Read Pangasinan EZEKIEL 20 Bible Online

EZEKIEL 20 - Pangasinan bible

EZEKIEL 20

¹"Nen kumaplon agew na kumaliman bulan na kumapiton taon na inkibantak mi, wala ray pigaran pangulo na saray Israelita a dinmagon mangipanon ed siak na nipaakar ed linawa na Katawan. Inmirung ira ed arap ko.

²"Insan akisalitad siak so Katawan.

³"Inkuanto, Sika a toon ompatey, misalita kad sarayan totoo tan ibagam ed sikara so ibabagak, siak a Katawan a Dios: Linma kayo dian manepet no anto so linawak, anto? Legan a siak so mabilay a Dios, andi-duaruwan ag ta kayo abuloyan a manepet ed siak na antokaman. Siak a Katawan a Dios so nansalita.

⁴"Sika a toon ompatey, akaparaan ka la a manintinsia ed sikara? Sintinsiaan mo la ra sirin. Ipanunot mod sikaray makapaingungot a ginagawa na saray lalaki ra.

⁵"Salitam ed sikara so ibabagak. Nen pinilik so Israel, walay insipan kod sikara. Impaamtak so siak a dili ed sikara diad Egipto tan inkuankod sikara: Siak so Katawan a Dios yo.

⁶"Diad saman ya agew insipan kod sikara ya ipaway ko rad Egipto tan iyakar ko ra ed dalin a pinilik a para sikara, dalin a mayaman, mataba, tan sankaabigan ed amin a dalin.

⁷"Imbagak ed sikaran ibantak da ray makapaingungot a talintaon inararo ra, tan ag da dodotakan so sikaran dili diad pidios dad saray tila-tilan diriyos na Egipto, lapud siak so Katawan a Dios da.

⁸"Balet sinumlang da ak tan ag da labay so ondengel. Ag da imbantak iray makapaingungot a talintao ra odino impolisay iray diriyos na Egipto. Akaparaan ak lad saman a mangidapod sikara na sulit na pasnuk ko dimad Egipto.

⁹"Balet ag ko ginawa, bangta makapangyepas iman na kagalangan na ngaran ko, ta diad imatun na saray totoon pipiayaman da nen saman, imbawag kod Israel ya ipaway ko ra ed Egipto.

¹⁰Kanyan impaway ko ra ed Egipto tan inyakar ko ra ed kalawakan.

¹¹Inter tan imbangat kod sikara iray ganggan ko a mangiter na bilay ed saray mangoonur.

¹²Ginawak a say panngilin ed Agew na Panagpainawa et tanda na paknaan mi, pian mangipanunot ed sikara a siak a Katawan so mamapasanto ed sikara.

¹³Balet anggan diman ed kalawakan sinumlang da ak. Sinumlang da ray bilin ko tan impolisay da ray ganggan a mangiter na bilay ed saray mangonur. Sigput ya ag da nginilinan so Agew na Panagpainawa. Akaparaan ak lad saman a mangidapod sikarad man ed kalawakan na pasnuk ko tan maneral ed sikara.

¹⁴Balet ag ko ginawa, bangta makapangyepas iman na kagalangan na ngaran ko diad saray bansa ya akanengneng ed siak ya angipaway ed Israel dimad Egipto.

¹⁵Kanyan sinambaan ko ya ag ko ra iyakar ed inter kod sikaran dalin a mayaman, mataba tan sankaabigan ed amin a dalin.

¹⁶Insambak iman a gawaen ta sinumlang da ray bilin ko, impolisay da ray ganggan ko, tan ag da nginilinan so Agew na Panagpainawanilabay da ni so angigalang ed saray talintaoy diriyos da.

¹⁷Balet kinasian ko ra. Ag ko ra pinapatey diman ed kalawakan.

¹⁸Ingen, pinasakbayan kod man iray tobun-balo. Ag yo oonuren iray ganggan a ginagawa na saray lalaki yo; ag yo aaligen iray ogali ra odino dodotakan so sikayon dili diad pidios yod saray talintaoy diriyos da.

¹⁹Siak so Katawan a Dios yo. Onur yo ray ganggan ko tan saray bilin ko.

²⁰Pagmaliw yon masanto so Agew na Panagpainawa, pian magmaliw a tanda na sipanan tayo, tan mangipanunot ed sikayo a siak so Katawan a Dios yo.

²¹Balet sinumlang ak met na saman a kailalakan. Sinumpa da ray bilin ko tan ag da inonur iray ganggan ko a mangiter na bilay ed saray mangonur. Ag da nginilinan so Agew na Panagpainawa. Akaparaan ak lad saman a mangidapod sikarad man ed kalawakan na pasnuk ko tan maneral ed sikara.

²²Balet ag ko ginawa, bangta makapangyepas iman na kagalangan na ngaran ko diad saray bansa ya akanengneng ed siak ya angipaway ed Israel dimad Egipto.

²³Kanyan walay sananey a sinambaan kod man ed kalawakan. Sinambaan kon ikayat ira ed nandoroman bansa ed intiron mundo.

²⁴Ginawak iman ta impolisay da ray bilin ko, sinumlang da ray ganggan ko, ag da nginilinan so Agew na Panagpainawa, tan angigalang irad saray talintaoy diriyos a nanlilingkuran na saray lalaki ra.

²⁵Insan ko ra initdan na makapoy a bilin tan saray ganggan ya ag makapangiter na bilay.

²⁶Inabuloyan ko ran nadotakan day sikaran dili diad panamegley na saray bagat da, tan inabuloyan ko ran mangibagat na saray pangulowan ya anak dan lalaki. Ginawak ya a panusad sikara tan diad ontan et naamtaan da a siak so Katawan.

²⁷Natan sirin, sika a toon ompatey, salitam ed saray Israelita so ibabagak ed sikara, siak a Katawan a Dios. Wala niy sakey a ginawa da ray lalaki ra ya impamabaing ed siak diad panamegley na impantraidor dad siak.

²⁸Inyakar ko rad dalin ya insipan kon iter ed sikara. Nen anengneng da ray atagey a pokdul tan saray masalumpapak a kiew, nambabagatan da ran amin. Impanpasnuk da ak diad panamegley na saray bagat a pinopoolan da tan diad saray alak ya inyaakar dan bagat.

²⁹Tinepet kod sikara: Anto ra tay atagey a pasen a lalaen yo? Lapud saya, atawag ira yan pasen ya Atagey iran Pasen nanlapud saman a panaon.

³⁰Natan, ibagam ed saray Israelita so ibabagak: Akin et gagawaen yo ray kasalanan a ginagawa da ray lalaki yo tan labalabay yon panlingkuran iray talintaoy diriyos da.

³¹Anggad natan ibabagat yo ray namparan rigalo tan dodotakan yoy sikayon dili diad panamegley na pampopool yod saray anak yo, ya ibabagat yo rad saray talintaoy diriyos yo. Insan sikayo ran Israelita et ondadago kayod siak a manepet no antoy linawak! Legan a siak so mabilay a Katawan a Dios, ag ta kayo abuloyan a manepet ed siak na antokaman.

³²Ginetma yo lan magmaliw kayon singa saray arum a bansa, singa saray totoon mambibilay ed arum a bansa tan mangigagalang irad saray kiew tan saray baton-dampay. Balet ag balut itan nasumpal a kanunotan yo.

³³Legan a siak so mabilay a Katawan a Dios, papasakbayan ta kayo a diad gaway pasnuk ko, oleyan ta kayod biskeg na taklay ko diad intiron pakayarik.

³⁴Ipanengneng kod sikayoy pakayarik tan say pasnuk ko no tiponen ta kayon amin manlapud saray bansan nikayatan yo.

³⁵Iyakar ta kayod Kalawakan da ray Bansa, tan dimay panintinsiaan kod sikayo ed lupa-lupaan.

³⁶Dusaen ta kayo natan a singa samay impanusak ed saray lalaki yo diad Kalawakan na Sinai, kuay Katawan a Dios.

³⁷Pegetan koy panoley kod sikayo tan patoluken ta kayod impisipanan ko.

³⁸Ekalen kod sikayo ray mananumpa tan makasalanan. Ekalen ko rad saray dalin a panaayaman da natan, balet ag ko ra abuloyan ya ompawil ed dalin na Israel. Naamtaan yod satan a siak so Katawan.

³⁹Say Katawan a Dios kuanto, Sikayo ran amin ya Israelita, no ag yo ak dengelen, ituloy yo labat lad tay panlilingkur yod saray talintaoy diriyos yo! Balet papasakbayan ta kayo a kayari to ya, nepeg yo ak ya onuren tan ag yo la pabaingan so masanton ngaran ko diad pambabagat yo na saray rigalo ed saray talintaoy diriyos yo.

⁴⁰Sikayo ran amin a totood Israel, igalang yo ak ditan ed dalin, diad toktok na masanton palandey ko, say atagey a palandey na Israel. Manliket ak ed sikayo tan ilaloan kon iyakaran yo ak na saray saklang yo, saray sankaabigan a bagat yo tan saray masanton rigalo yo.

⁴¹Kayari ta kayon nipaway ed saray bansan nikaykayatan yo tan no atipon ta kayo la, maliket kon awaten iray bagat a popoolan yo, et nanengneng ed satan na saray bansa a masanto ak.

⁴²Naamtaan yo a siak so Katawan no ipawil ta kayod Israel, say dalin ya insipan kon iter ed saray lalaki yo.

⁴³Diad satan nanunotan yo ray amin a makapabaing a ginagawa yo tan no panoy impandodotak yod sikayon dili. Bosulen yoy sikayon dili lapud saray maoges a ginagawa yo.

⁴⁴No iyagel koy kagalangan ko, naamtaan yo, sikayo ran Israelita, a siak so Katawan, lapud ag ko gagawaen ed sikayo so kanepegan na maoges a gagawaen yo. Say Katawan a Dios so nansalita.

⁴⁵Say Katawan akisalitad siak.

⁴⁶Inkuanto, Sika a toon ompatey, nengneng kad abalaten. Mansalita ka sumpad abalaten tan mampropisiya ka sumpad takel ed abalaten.

⁴⁷Ibagam ed takel ed abalaten so ibabagak, siak a Katawan a Dios: Nengneng yo! Mangigapo ak na pool, et poolan toy amin a kiew a walad sikayo, mabilay may inatey. Anggapoy makasebseb ed sayan pool. Onkayamkam manlapud baybay ya anggad abalaten, tan nalikna na balang sakey a too so petang na pool.

⁴⁸Nanengneng da a siak a Katawan so angigapo na pool tan anggapoy toon makaerep.

⁴⁹Balet inkuanko, Katawan a Dios, ag mo pa ya pagagawa ed siak! Manririklamo lay balang sakey, lapud pansasalitak ed panamegley na saray alimbawa.