Read Pangasinan EZEKIEL 22 Bible Online

EZEKIEL 22 - Pangasinan bible

EZEKIEL 22

¹"Say Katawan akisalitad siak.

²"Inkuanto, Sika a toon ompatey, akaparaan ka lan manintinsia ed siudad a napno na saray managpatey na totoo? Ipalinew mon ibawag ed sikato iray makapaingungot a ginagawa to.

³"Ibagam ed siudad so ibabagak, siak a Katawan a Dios: Lapud pinapatey mo ray amayamay a totoom tan dinotakan moy sikan dili diad impangigagalang mod saray talintaoy diriyos, onsasabi lay panaon mo.

⁴"Nankasalanan kad saraman ya impanpapatey mo tan adotakan ka lapud saraman a talintaon ginagawam, kanyan onsasabi lay agew mo, sinmabi lay panaon mo! Lapud saya inabuloyan kon ludlureyen tan balbalawen ka na amin a bansa.

⁵"Saray bansan walad arawi tan saray walad asingger et babalawen da ka lapud kaogsan mo.

⁶"Amin da ray pangulo na Israel et manmamatalek irad dilin biskeg da tan mampapatey iray totoo.

⁷"Anggapoy toon walad siudad a mangigagalang ed saray ateng to. Sasaolen mo ray sangkaili tan papairapen mo ray balo tan saray olila.

⁸"Ag mo gagalangen iray masanton pasen, tan ag mo ngingilinan so Agew na Panagpainawa.

⁹"Wala ray totoom a mantitila nipaakar ed saray arum a totoo, pian napapatey da ra. Saray arum mamangan iray imbagat ed saray talintaoy diriyos. Wala ray mamepenek na kaliktan na laman da.

¹⁰Wala ray miaakdul ed kaasawaan na ama ra. Saray arum papasooten dan piakdulan iray bibiin naliliberan.

¹¹Wala ray mikakaloguran, tan saray arum papalikdoen dan piakdulan iray manugang da odino saray agi rad ama o ina.

¹²Wala ray totoom a miuupan mamatey na arum a totoo. Saray arum mapalaloy panagpaabang day kuarta ed saray kapara ran Israelita tan onyayaman irad panaganamut day pankanawnawa ra. Alingwanan da ak. Say Katawan a Dios so nansalita.

¹³Natan, dusaen ta ka lapud panagtakew mo tan say panagpatey mo na saray totoo.

¹⁴Abaloan mo wala niy nakdaan a biskeg na linawam odino wala niy biskeg mon mangitagey na limam no dusaen ta ka? Siak a Katawan so nansalita, tan totooren koy imbagak.

¹⁵Ikayat kod nandoroman bansa iray totoom tan patondaen ko ray maoges a gawgawam.

¹⁶Diad satan pabaingan ka na saray arum a bansa, balet naamtaan mo a siak so Katawan.

¹⁷Say Katawan kuantod siak,

¹⁸Sikan toon ompatey, anggapoy kana ed siak iray Israelita. Singa ra ibabantak a mitalgansa, lata, balatyang, tan ismayakeraan ira ya kayarin apalba so pilak.

¹⁹Kanyan natan siak, a Katawan a Dios, ibabagak ed sikara a singa ra labat saraman ya andi-kakanaan a mital. Pantitiponen ko ran amin ed Jerusalem

²⁰a singa pangyan ed palbaan na pilak, gansa, balatyang, ismay, tan lata. Tonawen ira na pasnuk tan sanuk ko a singa panonaw na apoy ed gansa.

²¹On, tiponen ko ra ed Jerusalem, mamarlang ak ed silong da, tan tonawen ko ra ed pasnuk ko.

²²Natonaw ira ed Jerusalem a singa katonaw na pilak ed palbaan, et diad satan naamtaan da a liliknaen da so sulit na pasnuk ko, siak a Katawan.

²³Akisalita lamet ed siak so Katawan.

²⁴Inkuanto, Sika a toon ompatey, ibagam ed saray Israelita ya aliwan masanto so dalin da, kanyan dudusaen ko rad pasnuk ko.

²⁵Saray pangulo et singa ra saray lion a mangwam diad impakapatey da na saray ayayep. Papateyen da ray totoo, aalaen da ray amin a naala ran kuarta tan kayaryan tan lapud saray panagpatey da, amayamay iray abalo.

²⁶Susumlangen na saray papari so ganggan ko tan dodotakan da so antokaman a masanto. Ag da pandodomaen so masanto tan say aliwan masanto. Ag da ibabangat so pandomaan na bengatlan malinis tan say aliwan malinis, tan anggapoy walad sikara so Agew na Panagpainawa. Lapud saya, ag ak papagalangan na saray totood Israel.

²⁷Saray pangulo na gobirno et singa ra saray asod katakelan a mambibingkas na pinatey dan ayayep. Mampapatey ira na totoo, pian onyaman ira.

²⁸Sasakuban na saray propita ira yan kasalanan a singa ra totoon managtapal na dena ed padir. Tila ray nanenengneng dan pasingayew tan aliwan tua ray ipapasakbay dan nagawa. Ibabaga ran ibabawag day salita na Katawan a Dios, balet siak a Katawan ag ak akisalitad sikara.

²⁹Saramay mamayaman mansasaol tan mantatakew ira. Papairapen da ray mairap-bilay tan sasaolen da ray sangkaili.

³⁰Nananap ak na makapangipaalagey ed padir, a nayarian toy manalagey ed pasen ya ageba so padir tan iyagel toy dalin no ngalngali la deralen na pasnuk ko, balet anggapoy naalmok.

³¹Lapud saya, idapok ed sikara so pasnuk ko, tan singa panagderal na apoy so panderal kod sikara lapud saray ginagawa ra. Say Katawan a Dios so nansalita.