Read Pangasinan EZEKIEL 26 Bible Online

EZEKIEL 26 - Pangasinan bible

EZEKIEL 26

¹"Nen ononan agew na...bulan, nen kumalabinsakey a taon na inkibantak mi, say Katawan akisalitad siak.

²"Inkuanto, Sika a toon ompatey, dengel mo yay ibagak. Sikato yay pakaliliketan na saray totood siudad na Tiro. Iyeeyag da, Aderal-deral so Jerusalem! Naandi la so pakayari to ed nigosio! Ag lan balut nayarin kakompitinsia!

³"Natan sirin, saya so ibabagak, siak a Katawan a Dios: Siak so kalaban mo, sikan siudad na Tiro. Mangyakar ak na amayamay a bansan ondogpad sika, tan singa saray daluyon so isabi ra.

⁴"Deralen da ray padir na siudad mo tan igeba da ray torim. Insan ko panisan ya amin so dabuk tan sakey a baton-dampay labat so natilak.

⁵"Saray sumisigay ipaagew da ray iket da diad tapew na bato a walad dayat. Siak a Katawan a Dios so nansalita. Samsaman na saray bansa so Tiro,

⁶"tan pateyen da diad panamegley na ispada iray totoon manaayam ed saray baley to diad maawang a dalin to. Diad satan naamtaan na Tiro a siak so Katawan.

⁷"Say Katawan a Dios kuanto, Iyakar kon ondogpad Tiro so sankatalonggaringan ed amin ya arisi Ari Nabucodonosor na Babilonia. Sikatoy manlapud baybay a kaiba to ray amayamay a sondalon wala ray kabayo ra tan saray karwahin para bakal; kaiba to met iray managkabayod para bakal.

⁸"Napatey ed bakal iray manaayam ed saray baley ed maawang a dalin. Saray kalaban manggawa ra na saray tirinsira, saray bunton na dalin, tan mangipaalagey ira na saray makapal tan mabiskeg a saniban da no milaban irad sika.

⁹"Masoen da ray padir mo na panagmaso tan igeba da ray torim na saray baritan balatyang.

¹⁰Kobutan ka na makapal a dabuk ya ontikyab diad pankuyat na saray kabayo ra. Diad tanul na saray kabayon mamibira na saray karwahi tan saray kariton, nagalaw iray padir mo legan dan ondadalan ed saray puirta na aderal-deral a siudad.

¹¹Paalimbosabosen na saray sondalon akakabayo iray daladalan mo, tan pateyen da diad panamegley na ispada iray totoom. Nagebad dalin iray mabiskeg a lusek mo.

¹²Akokosen na saray kalaban mo iray kayamanan mo tan saray ilalakom. Igeba da ray padir mo tan deral-deralen da ray mararakep ya abung mo. Alaen da ray bato, saray tabla tan amin ya deral-deral, insan da ra ibantak ed dayat.

¹³Patondaen kon amin iray kansion mo, tan saray togtog na saray arpam.

¹⁴Itilak ko labat so sakey a baton-dampay a pampaagewan na saray sumisigay na saray iket da. Ag lan balut napasimbalon nipaalagey so siudad na Tiro. Siak a Katawan a Dios so nansalita.

¹⁵Say Katawan a Dios wala yan nibaga to ed siudad na Tiro: No nadadakep ka, nataktakot iray totoon manaayam ed gilig na dayat diad pakadngel dad paneyag na saray amayamay a napapatey.

¹⁶Amin da ray arari na saray bansan managbiahi ed dayat et onakseb irad trono ra. Lakseben da ray mararakep a kolibemben da tan saray binordaan a kawes da, insan ira manggiwgiw ya onyurong ed dalin. Nataktakot irad agawad sika tan ag ira makatondan onggiwgiw.

¹⁷Kansionen da yan kantan para tolur: Aderal la so bantug a siudad! Naanur lad maawang a dayat iray bapor to. Saray totoo na sayan siudad inoleyan da so kadayatan Tan tinataktakot da ray amin a manaayam ed gilig na dayat.

¹⁸Natan, diad agew na inkageba na siudad, Manggiwgiw iray isla, Tan atalagnaw iray totoo ra lapud inkaderal to.

¹⁹Say Katawan a Dios kuanto: Pagmaliwen ta kan andi-kakanaan a dalin a singa saray siudad ya aderal-deral tan anggapoy manaayam. Delapen ta ka na danum na dayat.

²⁰Iyakar ta kad pasen a kawalaan da ray inaatey, pian makapikasakey kad saray totoon nambibilay nen saman a panaon. Panayamen ta kad man a kaibam iray andi-anggaan a deral-deral tan saray inaatey. Lapud saya ag ka lan balut natoowan tan anggapo lay pasen mon balut ed dalin da ray mabilay.

²¹Pagmaliwen ta kan makapataktakot a pangaligan, tan sikato la so anggaan mo. Anapen ka na saray totoo, balet ag kan balut narumog. Say Katawan a Dios so nansalita.