Read Pangasinan EZEKIEL 28 Bible Online

EZEKIEL 28 - Pangasinan bible

EZEKIEL 28

¹"Say Katawan akisalitad siak.

²"Inkuanto, Sika a toon ompatey, ibagam so ibabagak ed manoley na Tiro, siak a Katawan a Dios: Diad panagpaatagey mo, ibabagam a sakey kan dios. Ibabagam a singa ka sakey a dios a manyodyorung ed trono, ya aliber na saray dayat. Nayarin ipasen moy sikan dili a sakey a dios, balet aliwan tua, ta sakey kan too labat ya ompatey; aliwa kan Dios.

³"Abaloan mo a makabat ka nen si Danel, ya anggapoy niamut ya ag mo amta.

⁴"Lapud kakabatan tan dunong mo, nagmaliw kan mayaman na balituk tan pilak.

⁵"Lapud kasiliban mod nigosio, binmaleg lan binmaleg so atubom. Mapalaloy panagpaatagey mo lapud inkayaman mo!

⁶"Natan sirin, saya so ibabagak, siak a Katawan a Dios: Lapud abaloan mon makabat kan singa sakey a dios,

⁷"mangyakar ak na saray maruksan kalaban mo ya ondogpad sika. Deralen da ray amin a mararakep a bengatlan atipon mo lapud dunong tan kakabatan mo.

⁸"Pateyen da ka tan ibantak da kad pegley na dayat.

⁹"No laen da kan pateyen, nibagam nin sakey ka a dios? No miarapan kad saray mamatey ed sika, sakey ka a toon ompatey, aliwan Dios met lamlamang.

¹⁰Singa ka ason pateyen na saray anggapoy Dios a sangkaili. Siak a Katawan a Dios so angiganggan ed saya.

¹¹Say Katawan akisalitad siak lamet.

¹²Inkuanto, Sika a toon ompatey, manermen ka lapud makapasinagem a nagawad ari na Tiro. Ibagam ed sikato so ibabagak, siak a Katawan a Dios: Sika nen saman so oliran na inkayadyari! Agay lay kakabatan tan kinaguapom nen saman!

¹³Nanayam kad Eden a tanamanan na Dios, tan nanalahas ka na nandoroman klasin mabmablin bato: rubi, diamanti, topasio, birilo, karnilia, jaspi, sapiro, ismiralda, tan garnita. Wala ra met so ates mon balituk. Agawa ran para sika nen agew ya apalsa ka.

¹⁴Angipasen ak na makapataktakot ya anghil a mangguardiad sika. Nanayam kad masanton palandey ko tan nanakar ka ed leet na saray mankidyam a mabmablin bato.

¹⁵Anggapoy pakabalawan ed sikad kagagawam nanlapud impamalsad sika ya anggad agew a ginapwan moy manggaway maoges.

¹⁶Anggapoy tondam a nansasaliw tan nanlalako, balet sikato yay makasengeg na impagmaliw mon maruksa tan makasalanan. Kanyan pinasoot ta kan ontaynan ed masanton palandey ko, tan samay anghil a nambantay ed sika et pinaarawi to kad saramay mankidyam a mabmablin bato.

¹⁷Mapaatagey ka lapud inkaguapom, tan lapud inkabantug mo nagmaliw kan singa makulang-kulang. Lapud saya imbantak ta kad dalin tan tinaynan ta kad man a sakey a pasakbay ed saray arum ya arari.

¹⁸Lapud saraman a maoges a ginagawam diad impansasaliw tan impanlalakom, nagmaliw a marotak iray pasen a panangingalangan. Kanyan pinoolan koy siudad tan tinemek kod apoy. Natan, amin da ray onnengneng ed sika, nanengneng da kan kadapudapul.

¹⁹Naandipat ka la ya anggad angga; amin a bansan akaamtad nansumpalan mo et ataktakot ira; natatakot ira, ompan nadamay irad makapasinagem a nansumpalan mo.

²⁰Say Katawan kuantod siak,

²¹Sika a toon ompatey, mansalita ka sumpad siudad na Sidon.

²²Ibagam ed saray totood man so ibabagak, siak a Katawan a Dios: Siak so kalaban mo, Sidon; idayew ak na saray totoo lapud gagawaen kod sika. Naamtaan da a siak so Katawan, no ipanengneng koy ontan lan inkasantok diad panusak ed saray totoon manaayam ed sika.

²³Mangipadalan ak na salut ed sika tan paagosen kod saray dalan mo so dala. Nadogpaan kad anggan anton dapag, tan napatey iray totoom. Diad satan naamtaan mo a siak so Katawan.

²⁴Say Katawan kuanto, Anggapo lan balut ed saray nambabalaw a bansan walad kaliber-liber na Israel so magmaliw lamet a singa masabit a tanaman a mamasakit ed Israel. Diad satan naamtaan da a siak so Katawan a Dios.

²⁵Say Katawan a Dios kuanto, Papawilen ko ray Israelita ed dalin da, manlapud saray bansan nikayatan da, et diad satan nakabatan na saray amin a bansa a siak so masanto. Saray totood Israel manayam irad dilin dalin da, say dalin ya iter kod kinen aripen kon Jacob.

²⁶Manayam irad man ya arawid kaatapan. Mangipaalagey ira na saray abung tan mantanem ira na saray ubas. Dusaen kon amin iray walad kaliber-liber na Israel a nambabalaw ed sikato, et niarawid kaatapan so Israel. Diad satan naamtaan da a siak so Katawan a Dios da.