Read Pangasinan EZEKIEL 3 Bible Online

EZEKIEL 3 - Pangasinan bible

EZEKIEL 3

¹"Inkuan na Dios, Sika a toon ompatey, akan mo yan nilokut a babasaen; insan ka onlan mansalita ed saray totood Israel.

²"Kanyan sinmangi ak tan initdan to ak na kanen kon nilokut a babasaen.

³"Inkuanto, Akan mo yan babasaen ya iiter kod sika; panom so eges mo na saya. Kinan ko, et masamit a singa dilo.

⁴"Insan inkuan na Dios, Sika a toon ompatey, lakad saray totood Israel tan salitam ed sikara so antokaman a paibagak ed sika.

⁵"Ag ta ka ibabakid saray totoon mansasalita na mairap a salita na arum a bansa, no ag ingen ibabaki ta kad saray Israelita.

⁶"No ibaki ta kad saray ankakabaleg a bansan mansasalita na saray mairap a salitan ag mo natalusan, ondengel irad sika.

⁷"Balet anggapod saray totood Israel so ondengel ed sika; ag da ak anggan dengelen. Anawet so olo tan puso ran amin.

⁸"Natan gawaen ta kan singa sikara ya anawet so puso tan olo ra.

⁹"Gawaen ta kan anawet a singa bato odino diamanti; ag ka ontatakot ed saraman a mananumpa.

¹⁰Intuloy na Dios ya inkuan, Sika a toon ompatey, dengel kan maung tan tandaan moy ibagak ed sika.

¹¹Insan kad satan onla ed saray kaparam a Judio a nibantak ed arum a bansa tan salitam ed sikara so ibabagak ed sikara, siak a Katawan a Dios, dengelen da ka man odino andi.

¹²Insan intagey ak na ispiritu na Dios, tan nadngel kod nibeneg ko so maksil tan manungol a bosis a kuanto, Nadayew komun ed tawen so kagalangan na Katawan!

¹³Nadngel kon mamparakpak ira may payak na saray pinalsan mabilay, tan say ungol da ra may dalig a singa ungol na yegyeg.

¹⁴Linmoob ed siak so mabiskeg a pakayari na Katawan, tan diad pangaawit ed siak na ispiritu, akapasnuk ak tan ansakit so linawak.

¹⁵Kanyan linma ak ed Tel Abib ed gilig na Ilog na Kebar a dimay panaayaman na saray nibantak ya Israelita, tan diad loob na pitoy agew ya impanayam kod man, ag ak akaskasel lapud saramay anengneng tan nadngel ko.

¹⁶Kalabas na pitoran agew say Katawan akisalitad siak.

¹⁷Inkuanto, Sika a toon ompatey, gawaen ta ka a managbantay ed bansa na Israel. Ipasabim ed sikara iray pasakbay ya ibabagak ed sika.

¹⁸No ibagak ed sakey a toon maoges ya ompatey balet et ag mo pinasakbayan a mangoman ed bilay to pian nipaliis ed patey, sikakasalanan ya ompatey, balet singilen ta ka lapud impatey to.

¹⁹No pinasakbayan moy sakey a toon maoges et ag to tondaay pankakasalanan to, ompatey a sikakasalanan, balet nilaban moy bilay mo.

²⁰No manggaway kaogsan so sakey a toon peteg a matonung tan ipapasen kod maatap a kipapasen, ompatey no ag mo pasakbayan. Ompatey lapud saray kasalanan toag ko nunoten iray kamaungan a ginagawa totan singilen ta ka lapud impatey to.

²¹No pasakbayan mon ag mankasalanan so sakey a toon matonung, et dengelen to ka tan ag mankasalanan, mansiansian mambilay, tan nilaban moy bilay mo.

²²Aliknak so pakayari na Katawan tan nadngel kon kuantod siak, Alagey ka tan lakad patar. Mitongtong ak ed sikad man.

²³Linma ak sirin ed patar, tan anengneng kod man so kagalangan na Katawan, a singa samay anengneng kod gilig na Ilog na Kebar. Tinmikleb ak ed dalin,

²⁴balet linmoob ed siak so ispiritu na Dios tan pinaalagey to ak. Inkuan na Katawan ed siak, Sempet ka la tan mankolung kad man ed abung mo.

²⁵Nabalur ka, sika a too, tan ag ka makakar ed kawalaan da ray totoo.

²⁶Patalkeren koy dilam, pian ag mo napasakbayan ira man a totoon mananumpad sika.

²⁷Insan no misalita ak ed sika lamet tan ipawil kod sikay pakapansalita, ibagam ed sikaray sasalitaen ko, siak a Katawan a Dios. Pigarad sikaray ondengel, balet pigara met ed sikaray ag ondengel ed sika lapud totoo ran mananumpad siak.