Read Pangasinan EZEKIEL 32 Bible Online

EZEKIEL 32 - Pangasinan bible

EZEKIEL 32

¹"Nen ononan agew na kumalabinduan bulan na kumalabinduan taon na inkibantak mid arum a bansa, say Katawan akisalitad siak.

²"Inkuanto, Sika a toon ompatey, maermen mon pasakbayan so ari na Egipto. Ibagam yan salitak ed sikato: Ipapasen moy sikan dili a lion ed saray bansa, balet singa ka buaya ya ontitiblung ed ilog. Pipitekan na saray salim so danum tan dodotakan mo ray ilog.

³"No mantitipon iray amayamay a bansa, erelen ta kad iket ko insan ta ka pagoyur ed sikara ed sakbit.

⁴"Ibantak ta ka ed dalin tan ipakan ta ka ed saray amin a manok tan ayayep ed intiron mundo.

⁵"Itabun koy naboboluk a bangkay mo ed saray kapalandeyan tan saray patar.

⁶"Iyibung koy dalam ya anggad naibungan iray kapalandeyan tan napano ray kolus.

⁷"No deralen ta ka, kobutan koy tawen tan pabilongeten ko ray bitewen. Onamut ed kaloreman so agew tan ag onsinag so bulan.

⁸"Ag ko pasinagen iray amin a silew ed tawen tan kobutan ko na bilonget so mundom. Siak a Katawan a Dios so nansalita.

⁹"Amayamay iray bansan nagunigon no ikayat ko ed saray ag mo ni nadngelan a bansa so balitan nipaakar ed kaderal mo.

¹⁰Onkelaw iray amayamay a bansa lapud gawaen kod sika. No iwasiwas koy ispadak, onggiwgiw ed takot iray arari. Diad agew a katalom, onggiwgiw iran amin ed takot lapud pangyagel dad bilay da.

¹¹Say Katawan a Dios kuantod ari na Egipto, Piarapan mo so ispada na ari na Babilonia.

¹²Abuloyan kon saray sondalo na saray maruksan bansa et oyusen da ray ispada ra, ta pateyen da ray amin a totoom. Naderal ya amin iray totoom tan amin a bengatlan ikikinon mo.

¹³Pateyen kon amin iray bakam ed gilig na danum. Anggapo lad satan so totoo odino baka a mampitek ed saray danum.

¹⁴Palinewen ko ray danum mo tan paagosen kon makalna iray ilog mo. Siak a Katawan a Dios so nansalita.

¹⁵No pagmaliwen kon andi-kakanaan tan begtebegtew so Egipto, tan pateyen ko ray amin a manaayam diman, naamtaan da a siak so Katawan.

¹⁶Magmaliw a kantan para tolur iyan makapaermen a pasakbay. Kantaen ya na saray bibii ed saray bansa diad panermen dad Egipto tan amin da ray totoo to. Siak a Katawan a Dios so nansalita.

¹⁷Nen kumalabinliman agew na ononan bulan na kumalabinduan taon na inkibantak mid arum a bansa, say Katawan akisalitad siak.

¹⁸Inkuanto, Sika a toon ompatey, ermenan mon amin iray amayamay a totood Egipto. Paonlam ed pasen a panaayaman da ray inaatey iray Egipsio pati saray arum a makapanyarin bansa.

¹⁹Ibagam ed sikara: Abaloan yo a maganggana kayo ni nen saray arum? Onla kayo ed pasen a panaayaman da ray inaatey tan mansiansia kayod man, pati saray makasalanan.

²⁰Napelag iray totood Egipto, pati saray inaatey ed bakal. Akaparaan lay sakey ya ispadan mamatey ed sikaran amin.

²¹Saray matalonggaring a panguloy sondalo tan saray akigampid saray Egipsio diad impibakal da et maliket dan awaten ed pasen a panaayaman da ray inaatey iray Egipsio. Iyeeyag da: Linmasur dia iray totoon maoges ya inaatey ed bakal, tan nia ran kidokul-dokul!

²²Wadman so Asiria, ya aliber-liber na saray lobuk da ray sondalo to. Apatey iran amin ed bakal,

²³tan walad sankaaraleman a parti na pasen a panaayaman da ray inaatey iray lobuk da. Inaatey ed bakal iray amin a sondalo to, tan aliber na saray lobuk da so pantion to. Balet nen saman tinataktakot da ray walad dalin da ray mabilay.

²⁴Wadman so Elam, ya aliber-liber na saray lobuk da ray sondalo to. Apatey iran amin ed bakal, tan ag ira asegat a niakar ed pasen a panaayaman da ray inaatey. Nen mabilay ni ra nantataktakot ira, balet natan akarokul iran inaatey tan naplag irad kababaingan.

²⁵Mandokdokul so Elam a kaiba to ray inaatey ed bakal, tan aliber na saray lobuk da ray sondalo to. Ag ira asegat ya amin; apatey iran amin ed bakal. Nen mabilay ni ra nantataktakot ira, balet natan akarokul iran inaatey tan naplag irad kababaingan, a mibibiang irad nansumpalan da ray totoon apatey ed bakal.

²⁶Wadman so Mesec tan say Tubal, ya aliber-liber na saray lobuk da ray sondalo ra. Ag ira asegat ya amin; apatey iran amin ed bakal. Balet nen saman tinataktakot da ray mabilay.

²⁷Aliwan mapagalang a tolur so impangitolur ed sikara; aliwan singa impangitolur ed saray matalonggaring a sondalo nen saman, a nen linma rad pasen a panaayaman da ray inaatey, akaarmas ira, niiyan ed silong na olo ra iray ispada ra, tan nitapew ed bangkay da iray samper da. Makapanyari ra yan matalonggaring a sondalo nen saman, kanyan tatakotan ira na saray mabilay.

²⁸Onya so kabaktar da ray Egipsio, a kaiba da ray ag asegat ya apatey ed bakal.

²⁹Wadman so Edom, a pati saray arari tan saray manoley to. Makapanyari ran sondalo nen saman, balet natan akarokul irad ayaman da ray inaatey a kaiba da ray totoon ag asegat ya apatey ed bakal.

³⁰Amin da ray prinsipi ed baybay et wadman met ira; wadman met iray taga Sidon. Nen saman nantataktakot ira lapud pakayari ra, balet natan naplag irad kababaingan a pati saray apatey ed bakal tan niparokul iran ag asegat. Minabang irad kababaingan da ray oonlad pasen a panaayaman da ray inaatey.

³¹Naligliwa so ari na Egipto tan saray sondalo to diad pakanengneng tod sarayan amin ya apatey ed bakal, kuay Katawan a Dios.

³²Inyabuloy kon nantaktakot ed saray mabilay so ari na Egipto, balet natan sikato tan saray amin a sondalo to et napatey ira tan niparokul ira a kaiba da ray ag asegat ya apatey ed bakal. Say Katawan a Dios so nansalita.