Read Pangasinan EZEKIEL 35 Bible Online

EZEKIEL 35 - Pangasinan bible

EZEKIEL 35

¹"Say Dios akisalitad siak.

²"Inkuanto, Sika a toon ompatey, mansalita ka na sumpad Edom.

³"Ibagam ed saray totood man so ibabagak, siak a Katawan a Dios: Siak so kalaban yo, sikayon kapalandeyan na Edom! Pagmaliwen ta kayon andi-kakanaan tan begtebegtew a dalin.

⁴"Taynanan kon aderal-deral iray siudad mo Tan say dalin mo a begtebegtew; Diad satan naamtaan mo a siak so Katawan.

⁵"Sikay mabetbet a kalaban nen saman na Israel tan impapapatey mo ray totoo to diad samay panaon na inkaderal to, salanti samay kaonuran ya impakadusa to lapud saray kasalanan to.

⁶"Lapud saya, legan a siak so mabilay a Katawan a Dios, andi-duaruwan say patey so pansumpalan mo, tan ag mo ya nibatikan. Nankasalanan kad impanpatey mod saray totoo, kanyan osilan ka met na patey.

⁷"Pagmaliwen kon andi-kakanaan so dalin mo, Edom, tan pateyen kon amin iray manakar diman.

⁸"Tayakan ko na bangkay iray kapalandeyan mo, tan saray bangkay da ray napatey ed bakal et nitaytayak irad kapokdulan tan diad saray patar.

⁹"Pagmaliwen ta kan begtebegtew ya anggad angga, tan anggapo lay manayam lamet ed saray siudad mo. Naamtaan mod satan a siak so Katawan.

¹⁰Imbagam a kayaryan mo ra may duaran bansa, say Juda tan say Israel, tan saray dalin da, tan sakopen mo ra, anggaman a siak a Katawan so Dios da.

¹¹Lapud saya, legan a siak so mabilay a Katawan a Dios, andi-duaruwan singilen ta ka lapud samay impanpasnuk mo, impangimon mo, tan samay impanbosul mod saray totook. Naamtaan da a dudusaen ta ka lapud saramay ginagawam ed sikara.

¹²Diad satan, nakabatan mo a siak a Katawan et nadngel ko may mapaatagey mon impansalita a begtebegtew iray kapalandeyan na Israel tan nayarian mon gawaen so labalabay mo ed sikara.

¹³Nadngel koy mapalalon mapaatagey ya impansasalitam sumpad siak.

¹⁴Say Katawan a Dios kuanto, Pagmaliwen ta kan begtebegtew pian manliket so intiron mundo ed inkaderal mo,

¹⁵a singa samay impanliket mod inkaderal na Israel a kayaryan ko. Say kapalandeyan na Seir, on, say intiron dalin na Edom, magmaliw a begtebegtew. Diad satan naamtaan na amin a katoowan a siak so Katawan.