Read Pangasinan EZEKIEL 37 Bible Online

EZEKIEL 37 - Pangasinan bible

EZEKIEL 37

¹"Aliknak so pakayari na kiwawalay Katawan, et inala ak na ispiritu to tan inlira to ak ed patar a napno na saray pokepokel.

²"Inliber-liber to ak ed samay patar, et anengneng koy ontan lan karakel a pokel ya amaga-magaan ira.

³"Inkuantod siak, Sika a toon ompatey, nabilay ni kasi ra yan pokel? Inmebat ak, Katawan a Dios, sika labat so makaebat ed satan a tepet mo!

⁴"Inkuanto, Mampropisiya kad saray pokepokel. Ibagam ed sarayan amagan pokel ya ondengel irad salita na Katawan.

⁵"Ibagam ed sikara a siak a Katawan a Dios et kuankod sikara: Itdan ta kayoy ingas tan pabilayen ta kayo.

⁶"Itdan ta kayo na olat tan laman, insan balkuten ta kayo na baog. Itdan ta kayo na ingas tan pabilayen ta kayo. Naamtaan yod satan a siak so Katawan.

⁷"Kanyan nampropisiya ak onung na nibagad siak. Legan ak a mansasalita, akadngel ak na makmaksil a tanul, insan ginmapon natotoop ira may pokel.

⁸"Nen ombabantay ak, akobutan na olat tan laman ira may pokepokel, insan ira abalkut na baog. Balet ag ni ra onlinawa.

⁹"Inkuan na Dios ed siak, Sika a toon ompatey, mampropisiya ka ed dagem. Ibagam ed dagem a say Katawan a Dios igaganggan to ya onsabin manlapud amin a dapag, onsibuk ed sarayan bangkay, pian ombilay ira.

¹⁰Kanyan nampropisiya ak onung na nibagad siak. Linmoob ed saramay bangkay so ingas, et binmilay ira tan inmaalagey ira. Singa amayamay a sondalo so karakel da.

¹¹Inkuan na Dios ed siak, Sika a toon ompatey, saray totood Israel et singa sarayan pokepokel. Ibabaga ra ya amagaan ira, naandian la ray ilalo tan anggapoy kabaliksan na arapen da.

¹²Kanyan mampropisiya kad saray totook ya Israelita, ta ibagam ed sikara a siak a Katawan a Dios et lokasan ko ray lobuk da. Ipaway ko ra, insan ko ra ipawil ed dalin na Israel.

¹³No lokasan ko la ray lobuk ya akaipomponan na saray totook tan ipaway ko la ra, naamtaan dad satan a siak so Katawan.

¹⁴Ingasan ko ra et nabilay ira, insan ko ra panayamen ed dilin dalin da. Naamtaan dad satan a siak so Katawan. Insipan ko a gawaen yaet tuan gawaen ko. Siak a Katawan so nansalita.

¹⁵Say Katawan akisalitad siak lamet.

¹⁶Inkuanto, Sika a toon ompatey, mangala kay sakey a bislak tan isulat mod satan a bislak ira yan salita, Say nanarian na Juda. Insan ka mangalay sakey nin bislak tan isulat mod satan a bislak yan salita, Say nanarian na Israel.

¹⁷Insan mo bembenan a nantapilan iray duaran bislak, pian singa ra saksakey a bislak.

¹⁸No saray totoom et tepeten da no antoy kabaliksan to ya,

¹⁹ibagam ed sikara a siak a Katawan a Dios et alaen ko so bislak ya ilalaman toy Israel, insan ko ilatup ed sakey a bislak ya ilalaman toy Juda. Pagmaliwen ko ran saksakey a bislak, insan ko ra bembenan ed limak.

²⁰Bembenan mod limam iray duaran bislak tan ipanengneng mod saray totoo.

²¹Ibagam ed sikara a siak a Katawan a Dios et alaen kon ipaway ed nandoroman bansa a nikaykayatan na amin a totook, pantitiponen ko ra, insan ko ra iyakar ed dilin dalin da.

²²Pagmaliwen ko ran saksakey a bansa ed dalin, diad kapalandeyan na Israel. Nawalaan iray saksakey ya ari a manoley ed sikara, et ag la ra napaldua a duaran bansa odino napaldua ra a duaran nanarian.

²³Ag da la dotakay sikaran dili, lapud saray makapaingungot a talintaoy diriyos odino lapud kasalanan. Ipaliis ko rad amin a pakapankasalanan dad siak. Linisan ko ra; magmaliw iran totook tan siak so Dios da.

²⁴Say magmaliw ya ari ra et singa si aripen kon David. Mankakasakey iran walad silong na saksakey a manoley tan matoor dan onuren iray ganggan ko.

²⁵Manayam irad dalin ya inter kod aripen kon Jacob, diad dalin a nanayaman na saray lalaki ra. Manayam irad man ya anggad angga, pati saray anak da tan amin a kabyangay boleg da. Anggad anggan manoley ed sikara so sakey ya arin singa si aripen kon David.

²⁶Misipanan ak ed sikara; sayan sipanan so kaletan diad pambilay dan arawid kaatapan diad ando lan ando. Iletneg ko ra tan parakelen koy bilang da, tan magnayon a panalageyen kod dalin da so Timplok.

²⁷Manayam ak diman ed kawalaan da; magmaliw a siak so Dios da tan sikaray totook.

²⁸No nipasen ko lay Timplok a mansiansia ya anggad angga ed kawalaan da, naamtaan ed satan na saray bansa a siak a Katawan so amilid Israel a sikaray dilin totook.