Read Pangasinan EZEKIEL 41 Bible Online

EZEKIEL 41 - Pangasinan bible

EZEKIEL 41

¹"Kayari to ya, samay laki inyakar to ak ed kuartod pegley, say Masanton Pasen. Sinukat toy dalan ya onloob ed sayan kuarto: taloran mitro so kaaralem to

²"tan limaran mitro so kaawang to. Duaran mitro so kapal na nantopag a padir to. Sinukat to may kuarto: duamplo tan sakey a mitro so karokey to tan samplora tan kapalduan mitro so kaawang to.

³"Insan samay laki linmoob ed sankadaleman a kuarto. Sinukat toy dalan a mamaarap ed saman a kuarto: sakey a mitroy kaaralem to tan taloran mitroy kaawang to. Talora tan kapalduan mitro so kapal na nantopag a padir to.

⁴"Sinukat to may kuarto, et kuadradon labinanem a mitro so kaawang to. Walad labas na samay kuartod pegley so sayan kuarto. Insan inkuan ed siak na samay laki, Sikato yay Sankasantosan a Pasen.

⁵"Samay laki sinukat toy kakapal na padir ed dalem na Timplo, et taloran mitro so kapal to. Nisiping ed liber-liber to yan padir na Timplo iray kuarton nantatalontonan a duaran mitro so kaawang na balang sakey.

⁶"Taloran grado ra yan kuarto, tan talomplon kuarto so walad balang grado. Say bandad paway a padir na Timplo diad kapag grado et maimpis nen say gradon walad leksab, kanyan nipapeg la ra may grado ya ag la kinaukolan ya ibotbot irad padir.

⁷"Kanyan no nengnengen a manlapud paway so padir na samay Timplo, singa namparay kakapal to manlapud leksab ya anggad tagey. Diad paway na saramay kuarto, nipapeg ed paway na padir na samay Timplo so duaran malapar a takayan, kanyan manlapud leksab a grado nayariy onlad pegley tan diad atagtagey ni ran grado. Maawang ni ray kuarton walad tagey a grado nen saray kuarton walad leksab a grado.

⁸"Duara tan kapalduay mitro so kapal na padir a walad bandad paway na sarayan kuarto; diad bandad baybay na Timplo walay sakey a puirtan onloob ed saray kuartod man, tan diad bandad abalaten walay sakey a puirtan ya onloob ed saray kuartod man. Anengneng ko a diad liber-liber na Timplo walay balkon a say kaawang to et duara tan kapalduan mitro; taloran mitro so kaatagey tod dalin tan akapara ed kaatagey na pundasion na saramay kuarton akasiping ed saray padir na Timplo. Diad nanleetan na samay balkon tan saray paalagey ya ikakana na saray papari, walay liwang a samploran mitroy beltang to, diad nantopag a diking na Timplo.

¹²Diad bandad samput na samay liwang a nisagur na Timplo walay sakey a paalagey ya apataplo tan anem a mitro so karokey to tan talomplo tan anem a mitro so kaawang to; duara tan kapalduan mitro so kalapar na intiron nipaliber a padir to.

¹³Samay laki sinukat toy bandad paway na Timplo, et limamplo tan talon mitro so karokey to. Manlapud beneg na Timplo ya ombeltang ed liwang ya anggad sankaarawian a parti na samay paalagey ed bandad sagur, say karokey to et limamplo tan talo met a mitro.

¹⁴Say karokey na arap na Timplo tan saray nantopag a liwang ed diking to et limamplo tan talo a mitro met.

¹⁵Sinukat toy karokey na samay paalagey ed bandad sagur, pati saray nantopag ed diking to, et limamplo tan talo met a mitro. Say lolooban a kuarto ed Timplo, say Masanton Pasen, tan samay Sankasantosan a Pasen et

¹⁶apalkapan ira na tabla manlapud datal ya anggad saray bintana. Nayarin saraan ira yan bintana.

¹⁷Saray padir ya anggad tagey na saray puirta na loob na Timplo et adikoraan ira na saray nikortin

¹⁸kiew a palmira tan saray kirubin. Niliber-liber a nikortin nansosoblayan ira may palmira tan saramay kirubin. Duaray lupa na kapag kirubin:

¹⁹say sakey lupay too ya akaarap ed samay kiew diad sakey a dapag tan say sakey lupay lion ya akaarap ed kiew diad sananey a dapag. Nampaparan onya diad kaliber-liber na padir,

²⁰manlapud datal ya anggad tagey na saray puirta.

²¹Kuadrado iray lusek na puirta na Masanton Pasen. Diad arap na lolooban na Sankasantosan a Pasen walay bengatlan singa

²²altar a tabla. Sakey tan kapalduay mitro so kaatagey to tan sakey a mitro so kaawang to. Kiew iray lusek tod suyok, say nidapod datal, tan saray dingding to. Samay too inkuantod siak, Sikato yay lamisaan a manalalagey ed arap na Katawan.

²³Walay sakey a puirta diad samput na dalan a mamaarap ed Masanton Pasen tan sakey met so walad samput na dalan na Sankasantosan a Pasen.

²⁴Sankaparis so kaput da ra may puirta a diad pegley so lokasan.

²⁵Wala ra met so nikortin kiew a palmira tan kirubin ed saramay kaput na Masanton Pasen, a singa saramay nikorti ed padir. Walay tablan tarung ed paway na dalan na puirta na samay kuarton lolooban.

²⁶Wala ray bintana ed diking na sayan kuarto, tan adikoraan na nikortin kiew a palmira iray padir to yan kuarto.