Read Pangasinan EZEKIEL 44 Bible Online

EZEKIEL 44 - Pangasinan bible

EZEKIEL 44

¹"Insan samay laki inyakar to ak ed samay puirtad paway diad nibokig a dapag na solar na Timplo. Akakaput imay puirta,

²"tan say Katawan kuantod siak, Mansiansian akakaput yan puirta tan ag balut lokasan. Anggapoy siopaman a too a nayarin abuloyan a mangikana ed sayan puirta, ta nilooban ko, siak a Katawan a Dios na Israel. Nepeg a mansiansian akakaput.

³"Balet say manoley a prinsipi nayarin onlad man a mangan na masanton panangan diad arap ko. Nepeg ya onloob tan ompaway ed dalan na puirta ya ondalan ed baleg a kuarto diad dalem ed bandad samput.

⁴"Insan samay laki indalan to ak ed samay puirtad baybay diad impangyakar tod siak ed arap na Timplo. Ninmengneng ak, et naimanok a samay Timplo na Katawan et napno na kagalangan na Katawan. Intiblak ko ed dalin,

⁵"et say Katawan kuantod siak, Sika a toon ompatey, apiger mon imanoen ya amin iray nanenengneng tan narerengel mo. Ibagak ed sika iray totontonen tan saray ganggan a nipaakar ed Timplo. Apiger mon tandaan no siopa ray totoon nayarin onloob tan ompaway ed Timplo, tan ontan met no siopa ray ag naabuloyan ya onloob.

⁶"Ibagam ed saray mananumpan totood Israel a siak a Katawan a Dios et ag ko la abuloyan iray makapaingungot a gagawaen da.

⁷"Dinotakan da so Timplok diad impangyabuloy dad saray totoon ag asegat a sangkaili, saray totoon ag mangoonur ed siak, ya onloob ed Timplo no ibabagat ed siak iray taba tan dala na saray ayayep ya ibagat. Kanyan saray totook dineral day impisipanan ko lapud amin a makapaingungot a ginagawa ra.

⁸"Anta sikara komun so mangasikasod saray masanton bengatla ed Timplok, impaasikaso ra la laingen ed saray sangkaili.

⁹"Siak a Katawan a Dios ibabawag ko ya ag onloob ed Timplok so siopaman a toon ag asegat a sangkaili, saray ag onoonur ed siak, anggan saray sangkailin manaayam ed kawalaan da ray totood Israel.

¹⁰Say Katawan kuantod siak, Dusaen ko ray Levita, pati saray arum a totood Israel, ya angikaindan ed siak tan angigalang ed saray talintaoy diriyos.

¹¹Nayarin manlingkur irad siak ed Timplo diad panamegley na pangasikaso rad saray puirta na Timplo tan diad panggawa rad saray kimey ed Timplo. Nayarian dan pateyen iray ayayep ya isasaklang a bagat a popoolan na saray totoo tan saray arum a bagat da, tan mankimey ira a manlingkur ed saray totoo.

¹²Balet lapud impangulo ra nen saman so impangigalang na saray totood Israel ed saray talintaoy diriyos tan lapud saya inlagyat da ran nankasalanan, siak a Katawan a Dios; sasambaan ko a nepeg day dusaen.

¹³Ag ira nepeg a manlingkur ed siak a papari, odino onsingger irad bengatlan masanto ed siak, odino onloob ed Sankasantosan a pasen. Sikato yay dusa ra lapud saray makapaingungot a ginagawa ra.

¹⁴Gawaen ko ra labat a katulong ed amin a nepeg a kimeyan ed dalem na Timplo.

¹⁵Say Katawan a Dios kuanto, Balet saray paparin kabyangan na tribu nen Levi tan si Sadoc so sengeg da et intutuloy day matoor a panaglingkur ed siak diad Timplo, anggaman ya inkaindan ak na amin da ray arum a totood Israel. Kanyan natan sikaray nepeg a manlingkur ed siak tan ondago rad arap ko a mangisaklang na saray taba tan say dala na saray ayayep ya ibagat.

¹⁶Sikara labat so onloob ed Timplok, manlingkur ed altar ko, tan mangipangulo na panangingalang diad Timplo.

¹⁷No onloob irad dalan na puirta diad iyakar dad patiod dalem na Timplo, nepeg a mansolung ira na linen. Ag ira nepeg a mansolung na lana no manlilingkur ira ed patiod dalem odino diad Timplo.

¹⁸Pian ag ira manlinget, nepeg a mansolung ira na linen a turban tan linen a pantalon, balet anggapoy balkes.

¹⁹Kasakbayan ya onla rad patiod paway a kawalaan da ray totoo, nepeg a lakseben day kawes dad panlilingkur dad dalem na Timplo, insan da ra itilak ed saray masanton kuarto. Nepeg a mansolung ira na sananey a kawes, pian samay masanton kawes da et ag to napasakitan iray totoo.

²⁰Nepeg ya ag kiskisan na saray papari so olo ra odino parokeyen so buek da. Nepeg a lawas kakkainangayan ed dokey so buek da.

²¹Nepeg ya ag oninom na alak iray papari kasakbayan na iloob dad patiod dalem.

²²Ag ira nepeg a mangasawa na insian a bii; say birhin ya Israelita labat so asawaen da odino say balo na sananey a pari.

²³Nepeg ya ibangat na saray papari ed saray totook so pandomaan na masanto tan say aliwan masanto, tan say pandomaan na malinis tan say aliwan malinis, onung ed ganggan.

²⁴No walay kolkolan na totoo, saray papari so manintinsia onung ed saray ganggan ko. Nepeg a mansilibra ra onung na ibabagay ganggan tan saray totontonen, tan nepeg a ngilinan dan masanto so Agew na Panagpainawa.

²⁵Say sakey a pari ag nepeg a magmaliw a marotak onung ed ganggan lapud paniwit tod sakey a bangkay, likud ed bangkay na sakey ed saray atateng to, odino sakey ed saray anak to, odino agi ton laki odino agi ton marikit.

²⁶No magmaliw lamet a malinis onung ed ganggan, nepeg a manalagar ni na pitoran agew,

²⁷insan onloob ed patiod dalem na Timplo tan mangisaklang na bagat a para kasalanan to, pian nayarian toy manlingkur lamet ed Timplo. Siak a Katawan a Dios so nansalita.

²⁸Say apag na saray papari ed saray inter kod Israel et say inkapari ra a tawiren na saray kailalakan ya onsabi. Ag ira nepeg a mangayaryan na antokaman ed Israel; siak labat so nakaukolan da.

²⁹Saray bagat a trigo, saray bagat a para kasalanan, tan saray bagat a pambayar et tagano na saray papari, tan sikaray mangawat na amin a bengatlan nibiig a para siak diad Israel.

³⁰Kayaryan na saray papari so sankaabigan ed amin da ray onaan a naani tan amin da ray nibagat ed siak. Kapag manggawa na tinapay iray totoo, nepeg ya iter da ed saray papari so ononan tinapay a bagat da, et mansiansia so bindision ko ed saray kaabungan da.

³¹Saray papari et ag ira nepeg a mangan na manok o ayep ya inatey a bukor odino pinatey na kapara ton ayep.