Read Pangasinan EZEKIEL 45 Bible Online

EZEKIEL 45 - Pangasinan bible

EZEKIEL 45

¹"No apag-apagen so dalin tan iter ed balang tribu so betang to, say sakey a parti et nepeg ya isaklang ed Katawan. Nepeg a labinduan kilomitro so karokey to, tan samploran kilomitro so kaawang to. Magmaliw a masanto yan intiron pasen.

²"Diad sayan pasen nepeg a walay lugar a para Timplo; duanlasus tan duamplo tan anem a mitro so karokey na balang dapag, ya apaliberan na liwang a duamplo tan anem a mitro so kaawang to.

³"Say kapaldua na sayan pasen a labinduan kilomitro so karokey to tan limaran kilomitro so kaawang to et sukaten ya ibiig; nipaalagey dia so Timplo, say sankasantosan ed amin day pasen.

⁴"Magmaliw a masanto yan parti na bansa, nibiig a para saray paparin manlilingkur ed Katawan diad Timplo to. Dia nipaalagey iray abung da tan walay parti a para Timplo.

⁵"Samay kapaldua na pasen et ibiig a para saray Levita a mankikimey ed Timplo. Nipaalagey diman iray baley a panayaman da.

⁶"Say kaabay na sayan masanton pasen et say sakey a parti a labinduan kilomitro so karokey to tan duara tan kapalduan kilomitro so kaawang to ya ibiig a sakey a siudad a nayarin panayaman na siopaman ed saray totood Israel.

⁷"Sakey met a parti na dalin so ibiig a para manoley a prinsipi. Manlapud nisagur a ketegan na samay masanton pasen, mampasagur ya anggad Dayat na Mediteraneo; tan manlapud nibokig a ketegan, mampabokig ya anggad ketegan na bansa, pian say dokey to singa samay dokey na sakey a partin niiter ed saray tribu na Israel.

⁸"Sayan pasen ed dalin na Israel et betang na manoley a prinsipi, pian ag to la pairapen iray totoo, no ag ingen abuloyan ton say arum a parti na bansa et kayaryan na saray tribu na Israel.

⁹"Say Katawan a Dios kuanto, Abayag lay pankakasalanan yo, sikayon manoley na Israel! Tondaan yo lay inkaruksa tan say panagpairap yo. Say kaptekan tan katonungan la so gawaen yo. Ag yo la nepeg a pataynanen lamet iray totoo ed dalin da. Siak a Katawan a Dios so mangibabaga yad sikayo.

¹⁰Balang sakey a too nepeg a mangikana na anggapoy saol tan duga a sukatan tan simbangan:

¹¹Say ipa a panagsukat na amagan bengatla, et nepeg a kapara na bat a panagsukat na likido. Say homer so pangiletnegan na sukat. Saya so sukat: say sakey ya homer kasukatan toy samploran ipa tan kasukatan to met so samploran bat.

¹²Saraya so nepeg a tombuken yon belat: say duamplon gira kasimbang toy sakey a siklo; say anemaplon siklo kasimbang toy sakey a mina.

¹³Saya so panukatan tan panimbangan yod saray isaklang yon bagat: say trigo, kakaanemaplo ed naani yo; say sibada, kakaanemaplo na naani yo; say larak na oliba, kakasanlasus ed naala yod kakiewan yo. (Sukat yo ed panamegley na bat: say samploran bat kasukatan toy sakey a homer tan kasukatan toy sakey a kor); say karniro, sakey a karniro ed kapag duanlasus a karniro diad pastolan na Israel. Nepeg a sikayoy mangyakar na bagat a trigo, saray ayayep a para bagat a popoolan tan saray ayayep ya ibagat para kareenan, pian napirdona ray kasalanan yo. Siak a Katawan a Dios so manggaganggan ed saya.

¹⁶Amin da ray totoo ed bansa et nepeg ya iyakar da ra yan bagat ed manoley a prinsipi ed Israel.

¹⁷Kanepegan na prinsipi so mangiter na saray ayayep ya isaklang a bagat a popoolan, saray trigon ibagat, tan saray alak ya ibagat a para intiron bansa na Israel no Pista na Balon Bulan, no Agew na Panagpainawa, tan no arum iran pista. Sikatoy nepeg a mangiter na saray bagat a para kasalanan, saray bagat a trigo, saray bagat a popoolan, tan saray bagat a para kareenan, a mangekal na saray kasalanan da ray totood Israel.

¹⁸Say Katawan a Dios kuanto, No ononan agew na ononan bulan, nepeg a mangibagat kayo na bakan kalakyan ya anggapon balut so deral na laman to tan linisan yo so Timplo.

¹⁹Say pari mangala na dala na sayan bagat a para kasalanan tan iyan tod saray lusek na puirtay Timplo, diad apatiran suyok na altar, tan diad lusek na saray dalan na puirtan mamaarap ed patiod dalem.

²⁰Diad kumapiton agew na bulan onyay nepeg yon gawaen, lapud sakey a toon nankasalanan ya ag to ginagala odino nankasalanan ya ag to amta. Diad onya napansiansia yo a masanto so Timplo.

²¹No kumalabinapat ya agew na ononan bulan, igapo yo so pansilibra na Pista na Paskua. Diad loob na pitoran agew mangan so balang sakey a too na tinapay ya anggapoy libadura.

²²No ononan agew na pista say manoley a prinsipi et nepeg a mangibagat na sakey a bakan kalakyan a para saray kasalanan to tan saray kasalanan na amin a totoo.

²³Diad inagew-agew ed loob na pitoran agew na pista, nepeg a mangibagat ed Katawan na pitoran bakan kalakyan tan pitoran karniron kalakyan ya anggapon balut so deral na laman da tan isaklang to ran bagat a popoolan. Mangisaklang met ya inagew-agew na sakey kanding a kalakyan a bagat a para kasalanan.

²⁴Kapag sakey a bakan kalakyan tan kapag sakey a karniron kalakyan ya ibagat, nepeg a walay katekep dan bagat a kapalduay sakon a trigo tan taloran kakapat na galon a larak na oliba.

²⁵No kumalabinliman agew na kumapiton bulan, onggapo so Pista na saray Abung-abung. Diad kapag agew ed loob na pitoran agew, say prinsipi mangisaklang na namparan bagat a para kasalanan, namparan bagat a popoolan, tan namparan bagat a trigo tan larak na oliba.