Read Pangasinan EZEKIEL 46 Bible Online

EZEKIEL 46 - Pangasinan bible

EZEKIEL 46

¹"Say Katawan a Dios kuanto, Samay nibokig a dalan na puirtan mamaarap ed patiod dalem et nepeg ya akakaput legan na anem agew a panagkimey, balet nepeg ya ilokas no Agew na Panagpainawa tan no Pistay Balon Bulan.

²"Say manoley a prinsipi onlan manlapud patiod paway diad iloob tod baleg a kuarto diad kawalaan na dalan na puirta tan manalagey ed abay na saray lusak na puirta legan ya isasaklang na saray papari iray bagat a popoolan tan saray bagat ton para kareenan. Diman ed puirta, nepeg a mangigalang ed Dios, insan la ompaway. Ag nepeg ya ikaput imay puirta ya anggad isabiy labi.

³"Kapag Agew na Panagpainawa tan kapag Pista na Balon Bulan amin da ray totoo et nepeg ya ontewek ira met tan igalang day Katawan diad arap na samay puirta.

⁴"No Agew na Panagpainawa say prinsipi et nepeg a mangyakar ed Katawan na anemiran kordiro tan sakey a karniron kalakyan ya anggapon balut so deral na laman da, ta isaklang iran bagat a popoolan.

⁵"Kapag sakey a karniron kalakyan nepeg a mangitekep na bagat a kapalduay sakon trigo, tan kapag sakey a kordiro nepeg a mangitekep na antokaman a labay ton iter. Diad kapag bagat a sakey tan kakapat na sakon trigo, say prinsipi nepeg a mangitekep na taloran kakatlon galon a larak na oliba.

⁶"Diad Pista na Balon Bulan sikatoy mangibagat na sakey a kilaw na bakan kalakyan, anemiran kordiro, tan sakey a karniron kalakyan, ya amin da et anggapon balut so dotak na laman da.

⁷"Say katekep na kapag sakey a bakan kalakyan tan kapag karniron kalakyan et nepeg a say sakey tan kakapat na sakon trigo, tan say katekep na kapag kordiro et nepeg a say antokaman a labay ya iter ya ibagat na prinsipi. Taloran litro na larak na oliba so nepeg ya ibagat a katekep na sakey tan kakapat na sakon trigo.

⁸"Nepeg a taynan na prinsipi so baleg a kuarto na dalan na puirta, insan ompaway ed dinalan to nen linmoob.

⁹"No mangigalang ed Katawan iray totoo, no anggan anton pista, saray onloob ed Timplo diad puirtad bandad baybay et nepeg ya ompaway irad puirtad bandad abalaten kayari ran mangigalang, tan saray onloob ed puirtad bandad abalaten et nepeg ya ompaway ira ed puirtad bandad baybay. Anggapoy too ya abuloyan ya ompaway ed puirtan nilooban to, no ag ingen nepeg ya ompaway ed kapetekan na nilooban ton puirta.

¹⁰No onloob la ray totoo, nepeg ya onloob met lay prinsipi, tan no ompaway la ra, nepeg ya ompaway met la.

¹¹Diad saray agew na pista tan diad saray tinandaan ya agew; say sakey tan kakapat na sakon trigo et nepeg a katekep na kapag sakey a bakan kalakyan odino sakey a karniron kalakyan, tan say antokaman a labay ya iter na manangigalang a katekep na sakey a kordiro. Say taloran kakapat a galon a larak na oliba et nepeg ya ibagat a katekep na sakey tan kakapat na sakon trigo.

¹²No say manoley a prinsipi et mabolus a mangisaklang ed Katawan na bagat a popoolan odino bagat a para kareenan, say puirtad bandad bokig ya ompogtad patiod dalem et nilokas a para sikato. Say pangibagat to et nepeg a singa panangibagat to no Agew na Panagpainawa, tan nepeg ya ikaput so puirta no kapaway to.

¹³Say Katawan kuanto, Kapag kabwasan say sakey a kordiron sakey taon ya anggapon balut so deral na laman to so nepeg ya isaklang a bagat a popoolan ed Katawan. Sayan bagat nepeg ya isaklang ya inagew-agew.

¹⁴Ontan met, kapag kabwasan, nepeg a duaran kilon arina so ibagat a katekep toy taloran kakapat na galon a larak na oliba a pangikames ed samay arina. Anggad anggan nepeg ya ipatombuk yan totontonen a para sayan bagat ed Katawan.

¹⁵Say kordiro, say arina, tan say larak na oliba et nepeg ya ibagat ira ed Katawan kapag kabwasan diad anggad angga.

¹⁶Say Katawan a Dios igaganggan to: No say manoley a prinsipi et rigaluan to na kayaryan ton dalin so sakey ed saray anak ton lalaki, saman a dalin magmaliw a parti na kayaryan na pamilya to may anak.

¹⁷Balet no say manoley a prinsipi et itdan to na dalin so siopaman a manlilingkur ed sikato, sayan dalin na prinsipi et ompawil ed sikato no nasabiy Taon na Panangipawil. Kayaryan na prinsipi so dalin, kanyan sikato tan saray anak to labat so akankayaryan ya anggad angga.

¹⁸Say manoley a prinsipi et ag nepeg ya alaen tod saray totoo so antokaman a kayaryan da. Say dinan man a dalin ya iter tod saray anak ton lalaki et nepeg a manlapud dalin a nipabetang ed sikato, pian ag to napairap so siopaman ed saray totook diad pangala tod dalin.

¹⁹Insan samay laki inyakar to ak ed lolooban na saray kuarto ya akaarap ed baybay diad asingger ed puirtad bandad abalaten a dapag na patiod dalem. Sikara yay masanton kuarto a para saray papari. Intoro toy sakey a pasen diad nisagur a dapag na saramay kuarto

²⁰tan kuanto, Sikato yay pasen a panlambungan na saray papari ed saray karnin nibagat a para kasalanan odino nibagat a para pambayar, tan dia met so panlutuan dad saray bagat ya arina, pian anggapoy masanton bengatla a niakar ed patiod paway, a nayarin napasakitan to ray totoo.

²¹Insan to ak inyakar ed patiod paway tan impanengneng tod siak a diad kapag sokung to may patio walay ankelag a patio, a duamplo tan sakey a mitro so karokey to tan labinliman mitro so kaawang to.

²³Kapag sakey aliber na baton padir. Wala ray lutowan diad gilig na padir.

²⁴Samay too kuantod siak, Sikara yay kusina a panlambungan na saray katulong ed Timplo na saray bagat ya isasaklang na saray totoo.