Read Pangasinan EZEKIEL 6 Bible Online

EZEKIEL 6 - Pangasinan bible

EZEKIEL 6

¹"Say Katawan akisalitad siak.

²"Inkuanto, Sika a toon ompatey, bantag kad kapalandeyan na Israel tan mampropisiya ka na sumpad sikara.

³"Ibagam ed kapalandeyan na Israel a dengelen day salita na Katawan a Diosa dengelen day ibabagak, siak a Katawan a Dios, ed kapalandeyan, kapokdulan, kakelasan, tan kapataran: mangyakar ak na ispada a maneral ed saray pasen a pangigagalangan na saray totoo ed saray talintaoy diriyos.

⁴"Nageba ray altar tan naderal iray altar a panagpoolay insinso. Amin da ray totood man et napatey irad arap na saray talintao ra.

⁵"Itaytayak ko ray bangkay na saray totood Israel; itaytayak kod kaliber-liber na saray altar iray pokepokel da.

⁶"Naderal ya amin iray siudad na Israel, pian natemek-temek ya amin iray altar tan saray talintao ra, namisimisi iray altar dan panagpoolay insinso, tan naandipat ya amin iray ginagawa ra.

⁷"Napatey iray totoo ed inerman a pasen, tan birbiren na amin da ray makapaliis ed patey a siak so Katawan.

⁸"Abuloyan kon ag napatey iray arum a totoo tan nataytayak irad saray bansa,

⁹"a diman ira manayam a nibantak. Nanunotan da ak diman tan naamtaan da a dinusak tan impelag ko rad kababaingan, lapud inkaindan da ak diad ag da impanisia tan nilabay da ni ray saray talintao nen say siak. Naingungotan irad sikaran dili, lapud saray kaogsan tan mabanbanday a bengatlan ginagawa ra.

¹⁰Naamtaan da a siak so Katawan tan saray pasakbay ko et aliwan andi-kakanaan iran taktakot.

¹¹Inkuan na Katawan a Dios, Yesyes yo ray kalimaan yo! Ikarag-karag yo ray sali yo! Akis kayod ermen lapud amin da ray maoges tan makapaingungot a ginagawa na saray Israelita. Ompatey irad bakal o eras o salot.

¹²Mansakit iray walad arawi, insan ira ompatey; saray walad asingger napatey irad bakal; saray ag napatey ed bakal ompatey irad eras. Nalikna ray amin a biskeg na pasnuk ko.

¹³Saray bangkay et nataytayak irad saray kawalaan da ray talintaoy diriyos tan diad kaliber-liber na saray altar, nataytayak irad balang pokdul, diad toktok na balang palandey, diad silong na balang masalumpapak a kiew tan balang ankabaleg a kiew a robli, tan diad balang pasen a pampopoolan dad saray ayayep a bagat ed saray talintao ra. Diad satan naamtaan dan amin a siak so Katawan.

¹⁴On, onla ak a maneral ed bansa ra. Say bansa ra et pagmaliwen kon andi-kakanaan tan begtebegtew a pasen, manlapud niabalaten a kalawakan ya anggad siudad na Ribla diad baybay; napibaliy amin a pasen a panaayaman da ray Israelita. Diad satan naamtaan dan amin a siak so Katawan.