Read Pangasinan EZEKIEL 8 Bible Online

EZEKIEL 8 - Pangasinan bible

EZEKIEL 8

¹"Nen kumaliman agew na kumanem a bulan na kumanem a taon na inkibantak mid sananey a bansa, saray pangulo da ray nibantak a taga ra Juda et manyodyorung iran kaibak ed abung ko. Kabebekta linmoob ed siak so pakayari na Katawan a Dios.

²"Tinmangay ak, et anengneng kod sakey a payawar so singa sakey a toon apoy. Manlapud balangbang to a mampaleksab singa apoy so laman to, tan manlapud balangbang to a mampaatagey mankidyam a singa gansan pinasileng.

³"Inyonat toy singa lima, insan to ak siningkat ed buek. Diad sayan pasingayew say ispiritu na Dios inyatagey to ak tan inyakar to ak ed Jerusalem. Inyakar to ak ed dalem na lolooban na puirtad baybay na Timplo a kawalaan na talintaon makapaspasnuk ed Dios.

⁴"Anengneng kod man so makalaram a liwawan mangipanengneng na kiwawalay Dios na Israel; sayan liwawa et singa samay liwawan anengneng ko nen wala ak ed abay na Ilog na Kebar.

⁵"Inkuan na Dios ed siak, Sika a toon ompatey, nengneng kad baybay. Ninmengneng ak, et diad asingger ed altar ed abay na lolooban na puirta anengneng koy talintaon makapaspasnuk ed Dios.

⁶"Inkuan na Dios ed siak, Sika a toon ompatey, nanenengneng moy nagagawa? Nengneng moy makapaingungot a gagawaen dia na saray totood Israel, iyaarawi da ak lan iyaarawi ed santuariok. Makanengneng ka ni na lalon makapabaing nen saya.

⁷"Inyakar to ak ed lolooban na pation walad bandad paway, insan to impanengneng ed siak so sakey a melag ya abut ed padir.

⁸"Inkuanto, Sika a toon ompatey, labut ka diad padir. Linmabut ak et akalmo ak na sakey a puirta.

⁹"Inkuantod siak, Loob ka ta nengneng moy maoges tan makapaingungot a gagawaen da.

¹⁰Kanyan linmoob ak tan ninmengneng ak. Nipintad padir iray oleg tan saray arum a marotak ya ayayep onung ed ganggan; nipinta met iray arum a bengatlan gagalangen na saray Israelita.

¹¹Wadman iray pitomplon pangulo na saray Israelita, pati si Jaazanias a lakin anak nen Safan. Sankabembenan na balang sakey ed sikara so parlangan na insinso tan manatagey so asewek na insinso.

¹²Tinepet na Dios ed siak, Sika a toon ompatey, nanenengneng moy maamut a gagawaen da ray pangulo na saray Israelita? Mangigagalang iran amin ed sakey a kuarton napnoy imahin. Inkuanda ya ibabaraan: Ag itayo nanenengneng na Katawan! Inkaindan to so bansa.

¹³Insan inkuan na Katawan ed siak, Nanengneng mo ni ran manggawa na saray lalon makapaingungot nen satan.

¹⁴Kanyan inyakar to ak ed puirtad baybay na Timplo tan impanengneng tod siak iray bibiin aakisan day impatey na dios a Tamuz.

¹⁵Tinepet to, Sika a toon ompatey, nanengneng mo tan? Makanengneng ka ni na saray lalon makapaingungot a bengatla.

¹⁶Kanyan inyakar to ak ed pation walad dalem na Timplo. Diman ed abay na lolooban ed santuario, diad nanleetan na altar tan say balkon, wala ray duamplo tan liman lalaki. Imbeneg day santuario tan ondadakmomo ran akaarap ed bokig a mangigagalang irad agew ya ombubutay.

¹⁷Say Katawan inkuantod siak, Sika a toon ompatey, nanenengneng mo man? Saray totoo ed Juda et ag ni ra apenek ed panggagawa ray amin a makapaingungot a bengatlan anengneng mo dia tan say impangikayat da na golo ed intiron bansa. Ag ni ra apenek kanyan linma ra diad dalem na Timplo tan pinaloor day pasnuk ko. Nengneng mo no panoy pamapabaing dad siak diad anggaay nayarian dan pamasakit.

¹⁸Nalikna ra so biskeg na pasnuk ko. Ag ko ra pirdonaen odino kasian. Anggan oneyaeyag iran onkerew ed siak na tulong, ag ko ra dengelen.