Read Pangasinan SI BEL TAN SAY DRAGON 1 Bible Online

SI BEL TAN SAY DRAGON 1 - Pangasinan bible

SI BEL TAN SAY DRAGON 1

¹"Kayari na impatey nen Ari Astiages, sinmalat ed sikaton nanoley ed nanarian si Ciro na Persia.

²"Si Daniel so sakey ed saray maasingger a kaiba nen Ari Ciro tan atagey ni so pangipapasen tod kinen Daniel nen saray arum a sumisimbawa to.

³"Saray taga Babilonia et walay talintaoy dios da a manngaray Bel. Inagew-agew a saray totoo et nepeg a mangisaklang-irad kinen Bel na bagat ya apatiran sako a pinon arina, apataplon karniro, tan limamplon galon na alak.

⁴"Sinisia nen Ari Ciro a dios si Bel, tan ogali toy onlan inagew-agew a mangigalang ed kinen Bel. Balet igagalang nen Daniel so dilin Dios to.

⁵"Aminsan ya agew tinepet na ari ed kinen Daniel, Akin et ag mo igagalang si Bel? Inmebat si Daniel, Ag ko igagalang iray talintaoy diriyos a ginawa na limay too. Igagalang ko labat so mabilay a Dios ya amalsad tawen tan dalin tan sikato so Katawan na amin a katoowan.

⁶"Ag mo sisiaen a peteg a mabilay so dios min si Bel? tepet na ari. Ag mo nanenengneng so ontan lan karakel na kakanen tan iinomen ton inagew-agew?

⁷"Inmelek si Daniel tan kuanto, Ag ka paluluko, Kagalang ya Ari. Sayay dios a tatawagen mo na Bel et anggapoy pidomaan tod minolin dalin ya inokupan na gansa; ag ton balut angan odino inminom na antokaman.

⁸"Lapud saya akapasnuk so ari tan tinawag ton onloob ya amin iray pitomplon papari nen Bel. Inkuantod sikara, Papasakbayan ta kayo a napatey kayon amin, no ag yo nipanengneng ed siak a si Bel so mangakan ed sarayan bagat. No napaneknekan yod siak a si Bel so mangakan, si Daniel ed satan so papatey ko, lapud ibabaga ton aliwan dios si Bel. Inmabubon si Daniel ed sayan imbaga na ari.

¹¹Insan linma ran amin, a pati say ari, diad timplo nen Bel, a diman inkuan na saray papari ed ari, Kagalang ya ari, ompaway kami tan abuloyan mi ka a mangilira na kakanen ed lamisaan tan mangiparaan na alak. No ontaynan ka, nayarin isaram so puirtan pawayan mo tan tatakan mo na timbriy ari.

¹²Diad kabwasan no ompawil ka, no narumog mon ag kinan ya amin nen Bel, nayarin papatey mo kami. Balet no kinan to, ompatey si Daniel lapud tilay impangakusa tod sikami.

¹³Balet ag mapaga ira may papari, lapud nanggawa ray maamut a lolooban diad silong na sakey a lamisaan ed dalem na timplo, pian nayarian day onloob kapag labi tan mangan na saray bagat.

¹⁴Nen tinmaynan ira may papari, imparaan na ari so kakanen para kinen Bel. Insan ingganggan nen Daniel ed saray aripen to a mangawit iray dapul tan ipokopuk dad intiron datal na timplo. Anggapoy arum ya akanengneng ed saya likud ed ari. Kayari to ya, pinmaway la ran amin, intalak day puirta, tinatakan da na timbriy ari, insan la ra linma.

¹⁵Diad saman a labi, onung na gendat a nagagawa, saray papari, saray kaasawaan da, tan saray anak da et linmoob irad timplo diad panamegley na samay maamut a lolooban tan kinan day amin a kakanen tan ininom day amin ya alak.

¹⁶Diad ontombuk a kabwasan, asaksakbay a linmad timplo so ari tan si Daniel.

¹⁷Tinepet na ari, Aderal iray timbri, Daniel? Andi, Kagalang ya Ari, ag ira aderal, ebat to.

¹⁸Kapangilokas ed puirta, anengneng na ari so lamisaan ya anggapoy karga tan inmeyag, Matalonggaring ka, Bel! Peteg kan sakey a dios.

¹⁹Balet ginapwan nen Daniel so inmelek tan kuantod ari, Kasakbayan moy onloob ed timplo, nengneng moy datal tan ibagam ed siak no siopa ray akanbakat na saray nanengneng mod man.

²⁰Inkuan na ari, Nanenengneng ko ray bakat na lalaki, bibii, tan ogogaw,

²¹et mapalaloy impakapasnuk to, kanyan impaerel to ray papari tan saray kabyangay pamilya ra tan impaiyakar to rad sikara. Impanengneng dad sikato iray maamut a puirta a lolooban da kapag labi a mangan na kakanen a niparaan ed lamisaan.

²²Kanyan impapatey na ari ira may papari, tan inter tod kinen Daniel si Bel tan dineral nen Daniel imay talintao tan inggeba to may timplo to.

²³Wala met so sakey a balbaleg a dragon ya inggagalang na saray taga Babilonia.

²⁴Aminsan ya agew inkuan na ari ed kinen Daniel, Ag mo nibagad siak ya aliwan mabilay yan dios. Kanyan mangigalang kad sikato!

²⁵Inmebat si Daniel, Igagalang ko so Katawan. Sikato labat so mabilay a Dios.

²⁶No abuloyan ak na Kagalang ya Ari, pateyen ko yan dragon ya ag ak mangikana na ispada odino pekpek. Naabuloyan ka, ebat nen ari.

²⁷Kanyan angalay Daniel na alkitran, taba, tan pigaran buek tan inlambung to ran impanlalauk. Nanggawa na saray kanen ed saramay impanlalauk to tan impakan tod samay dragon. Nen kinan na samay dragon ira may kanen, linmarag tan binmuknak. Inkuanen Daniel, Satan so bengatlan igagalang yo, sikayo ran taga Babilonia.

²⁸Nen nadngelan na saray taga Babilonia so agawa, ampetang so olo ra tan nankomplut ira sumpad ari. Ineyag da, Nagmaliw lan sakey a Judio so ari. Dineral ton inmona si Bel tan pinapatey to ray papari, tan natan pinatey toy dragon tayo.

²⁹Linma rad ari tan imbaga ran ipalima tod sikaray Daniel. Inkuandan pamasakbay ed ari, No ag mo ipalimad sikami si Daniel, pateyen mi ka tan saray kabyangay pamilyam.

³⁰Nen anengneng na ari a sumpalen dan sumpalen so imbaga ra, apasootan ya impalima toy Daniel

³¹Imbontuk na saramay lalaki ed abut na saray lion si Daniel, a diman da tinaynan ya anem agew.

³²Walay pitoran lion ed dalem na abut tan inagew-agew a napapakan ira na duaran totoo tan duaran karniro. Balet ag ira naitdan na antokaman ed loob to may anemiran agew, pian andi-saew a naakan si Daniel.

³³Diad saman a panaon, walad dalin na Juda si propita Habacuc. Nanlambung na kakanen tan nilaukan to na pinisipisin tinapay. Sankaawit toy sakey a yaung na samay inlambung to, ta iyakar tod saray lalakin manaanid alog,

³⁴nen akisalitad sikato so sakey ya anghil na Katawan, Iyakar mo tay kakanen a sankaawit mo ed kinen Daniel a walad Babilonia, diad abut na saray lion.

³⁵Inmebat si Habacuc, Ag ak nin balut linmad Babilonia, tan ag ko amta no iner so kawalaay abut na saray lion.

³⁶Kanyan siningkat na samay anghil si Habacuc ed buek tan inyakar ton singa peles na dagem diad Babilonia. Inyepas to ed abay na samay abut na saray lion.

³⁷Kinmulyaot si Habacuc, Daniel! Daniel! Impaiyakaran ka na Dios na kakanen. Nia, alam.

³⁸Nen nadngel nen Daniel si Habacuc, nampikasi, Dios anunotan mo ak; ag mo ikakaindan iray mangaarod sika,

³⁹Insan inmalagey tan kinan to may kakanen, insan insempet a tampol na anghil na Dios si Habacuc.

⁴⁰Kayari na pitoy agew nanlapud samay impakaibontuk ed kinen Daniel ed kawalaan da ray lion, linmay ari ed kawalaay abut, ta ermenan toy Daniel. Nen wadman la tan ninmengneng, wadmay Daniel ya akayorung.

⁴¹Inmeyag so ari, O Katawan a Dios nen Daniel, agaylay talonggaring mo. Bukor mo so Dios.

⁴²Kanyan inagwat toy Daniel ed samay abut tan impaibantak tod man ira may totoon malabay a mamatey ed kinen Daniel. Kinan iran tampol na saramay lion legan a mamabantay so ari.