Read Pangasinan OSEAS 11 Bible Online

OSEAS 11 - Pangasinan bible

OSEAS 11

¹"Say Katawan kuanto, Nen ogaw ni so Israel, inararok tan impaway kod Egipto a sakey ya anak kon laki.

²"Balet no panoy intawag kod sikato, ontan met so inyarawi tod siak. Nambabagat ed Baal iray totook; nampopool iray insinso ed saray talintaoy diriyos.

³"Balet siak so nambangat ya onakar so Israel. Inaampupok ed taklay ko iray totook, balet ag da binirbir a siak so angasikasod sikara.

⁴"Sinayakop ko rad panangaro tan panangasi. Inalsak ira tan inampupok irad taklay ko; Yinmuyuko ak ya amakan ed sikara.

⁵"Ag da labay so ompawil ed siak, kanyan nepeg ya ompawil irad Egipto tan manoley ed sikara so Asiria.

⁶"Ondalan ed saray siudad da so bakal tan nageba ray puirta na siudad da. Deralen na bakal iray totook lapud gagawaen da so abaloan dan sankamaungan.

⁷"Impasoot day ontaynan ed siak. Oneyag ira lapud pakod tenger da, balet anggapoy mangekal na samay pako ra.

⁸"Panon toy isawak ed sika, Israel? Panoy pangikaindan kod sika? Nayarian ta ka kasin deralen a singa ginawak ed Adma, tan Zeboim? Ag iyabuloy na pusok a gawaen ko ya! Lalon onlalaknab so panangarok ed sika.

⁹"Ag ta ka dusaen ed pasnuk ko; ag ko la deralen lamet so Israel, Ta Dios ak, aliwan too. Siak a Masanton Dios, wala ed sika. Ag ta ka dagoen a deralen.

¹⁰Ontombuk ed siak iray totook no singa ak lion ya ongwam ed saray kalaban da. Manlapud sagur mangganat iran ondagod siak.

¹¹Manlapud Egipto maples iran onsabin singa manok, tan manlapud Asiria onsabi ran singa malapati. Iyakar ko ra lamet ed kaabungan da. Siak, say Katawan, so nansalita.

¹²Say Katawan kuanto, Saray totood Israel et niliktub da ak na saray tila tan palikdo, tan saray totood Juda et siansia nin onlalaban irad siak, say matoor tan masanton Dios.