Read Pangasinan OSEAS 12 Bible Online

OSEAS 12 - Pangasinan bible

OSEAS 12

¹"Andi-kakanaan tan makaderal ya amin iray gagawaen da ray totood Israel manlapud kabwasan ya anggad labi. Mandakel so gagawaen dan panamalikdo tan panagduksa. Mipapaknaan irad Asiria tan mininigosio ra ed Egipto.

²"Walay pangakusaan na ed saray totood Juda; dusaen to met so Israel lapud saray gagawaen da ray totoo to. Singilen to rad saray gagawaen da.

³"Akipoligesgesan si laki ran Jacob ed kinen Esau a kalasun to nen wala ni rad eges na ina ra; nen binmaleg lay Jacob, akibalsakan ed Dios

⁴"akibalsakan ed sakey ya anghil, et analo. Inmakis tan akikerew na bindision. Diad Betel linmay Dios ed laki tayon Jacob tan akisalitad sikato.

⁵"Sikato man so Katawan a Dios a Makapanyarin-amin–Yahweh so ngaran to.

⁶"Kanyan natan, sikayon kabyangay boleg nen Jacob, manmatalek kayod Dios yo tan pawil kayod sikato. Mambilay kayon maaro tan matonung, tan anosan yoy manalagar ed antokaman a gawaen na Dios.

⁷"Say Katawan kuanto, Saray totood Israel et masaol iran singa saray Cananeo; labalabay dan saolen iray sumasaliw diad panamegley na masaol a simbangan.

⁸"Mayaman kami, kuanda. Amayamay so atipon min kayaryan, tan anggapoy makaakusad sikami ed impansasaol mi.

⁹"Balet siak a Katawan a Dios yo ya angipaway ed sikayod Egipto et panayamen ta kayo lamet ed saray tulda, a singa ginagawa yo nen linma ak ed sikayo ed kalawakan.

¹⁰Akisalita ak ed saray propita tan impapanengneng kod sikaray amayamay a pasingayew, tan diad panamegley na saray propita pinapasakbayan ko ray totoo.

¹¹Balet siansian nagagalang ed Galaad iray talintaoy diriyos, et ompatey iray mangigagalang ed saray talintao. Nibagat ed Gilgal iray baka, et magmaliw iran bunton na saray bato diad saray maawang a kaalogan iray altar diman.

¹²Si laki tayon Jacob et apasoot ya ombatik ed Mesopotamia, a diman angatulangan diad impankokomponi to na saray karniro, pian makalay asawaen to.

¹³Say Katawan angibaki na sakey a propita a mangyagel ed saray totoo ton Israelita diad pakakaaripen dad Egipto tan mangasikasod sikara.

¹⁴Impanpasnuk a mapalalo na saray totoo so KATAWAN; kanepegan da so pateyen lapud saman a kasalanan da. Dusaen ira na Katawan lapud impelag dad kababaingan.