Read Pangasinan OSEAS 3 Bible Online

OSEAS 3 - Pangasinan bible

OSEAS 3

¹"Say Katawan kuantod siak, Laka lamet, ta arom iman a biin mikakalugoran ed sakey a laki. Nepeg mon aroen a singa panangarok ni ed saray totood Israel, anggaman a sinmingger irad arum a diriyos tan labalabay day mangyapay na saray bagat a pasas ed saray talintaoy diriyos.

²"Kanyan sinaliw ko may asawak na labinliman pilak a kuarta tan anemiran sakon a sibada.

³"Imbagak ed sikato a mabaybayag ko lan kaamung tan ag la magmaliw a marotak a bii odino mikalugoran; et onya met so gawaen ko legan na panaon a walad siak.

⁴"Diad singa onya, saray totood Israel mabaybayag iran mambilay ya anggapoy ari odino pangulo, anggapo ray bagat odino masanton lusek, anggapoy talintaoy diriyos odino imahin ya onkanad panagparles.

⁵"Balet onsabiy panaon a saray totood Israel et ompawil ira lamet ed Katawan a Dios da tan diad sakey a kabyangay boleg nen David ya ari ra. Insan takotan day Katawan tan makaawat ira na saray marakep a rigalo to.