Read Pangasinan OSEAS 5 Bible Online

OSEAS 5 - Pangasinan bible

OSEAS 5

¹"Dengel kayod sayan salita, sikayo ran papari! Manimano kayo, sikayo ran totood Israel! Dengel kayo, sikayon kabyangay pamilya na ari! Nepeg yo komun so manintinsia onung ed katonungankanyan sikayo so nasintinsiaan a nadusa! Nagmaliw kayon patit diad Mizpa, nagmaliw kayon sakey ya iket ya akapanat ed Palandey na Tabor;

²"nagmaliw kayon sakey ya aralem ya abut ed Siudad na Acacia; dusaen ta kayon amin.

³"Amtak so kapara na Israelag to ak naboryan. Aliwan matoor ed siak so Israel, tan saray totoo to et marotak ira, kanyan aliwa ran manepeg a mangigalang ed siak.

⁴"Say kaogsan a ginagawa na saray totoo so makaskasbel na ipawil dad Dios da. Say panangigalang ed saray talintaoy diriyos so mabiskeg a manesebel ed sikara tan ag da bibirbiren so Katawan.

⁵"Say panagpaatagey na saray totood Israel so mangaakusa ed sikara. Saray kasalanan da so makasengeg na katalo ra, tan kaiba ra met a natalo so Juda.

⁶"Iyaakar dan ibagat ed Katawan iray karniro ra tan saray baka ra, balet anggapoy kaabigan a nagogonggona ra. Ag da narumog so Katawan, ta tinaynan to la ra.

⁷"Aliwa ran matoor ed Katawan; ag to kayaryan iray anak da. Kanyan ag mabayag naderal ira tan saray dalin da.

⁸"Sibuk yod Gabaa iray trumpitan panawag na bakal! Paknul yod Rama so pamasakbay. Iyeyag yo ed Bet-haven so para bakal! Lalaki a taga Benjamin, dogpa kayo lan mibakal!

⁹"Onsasabi lay agew na pakadusa yo, tan naderal so Israel. Totood Israel, andi-saew a nagawa yay imbagak!

¹⁰Say Katawan kuanto; Mamapasnuk ak lapud saray pangulo na Juda et nilooban day Israel, tan anamsam iray dalin ed sikato. Kanyan ibung kod sikara a singa delap so dusa.

¹¹Napapairap so Israel; abalang to so dalin a kayaryan ton peteg. Onyay agawad sikato, ta impasoot toy kinmerew na tulong ed saray anggapoy niiter dan tulong.

¹²Mangyakar ak na dusa tan deral ed saray totood Israel tan Juda.

¹³Nen anengneng na Israel so ontan lan pansasakit to, tan say Juda et anengneng to ray sugat to, linmay Israel ed Asiria, ta onkerew na tulong ed matalonggaring ya ari, balet ag to ra natambal odino napaabig iray sugat da.

¹⁴Ondogpa ak a singa lion ed Israel tan diad Juda. Siak a dili so mambingbingkas ed sikara, insan ko ra taynan. No igayugoy ko ra, anggapoy makapangilaban ed sikara.

¹⁵Ikaindan ko ray totook ya anggad asigsigput so impanirap da, lapud saray kasalanan da tan onsabi ran mananap ed siak. Angangko diad gaway panirap da anapen da ak.