Read Pangasinan OSEAS 6 Bible Online

OSEAS 6 - Pangasinan bible

OSEAS 6

¹"Saray totoo kuanda, Ompawil itayod Katawan Binibingkas to itayo, balet andi-saew a paabigen to itayo; sinusugat to itayo balet andi-saew a berberen to ray sugasugat tayo.

²"Diad loob na duara odino taloran agew pabilayen to itayo, tan mambilay itayod arap to.

³"Salien tayon amtaen so Katawan. Andi-saew ya onsabid sikatayo so Katawan a singa ibubutay na agew no kabwasan, odino singa ipepelag na oran ed tapew na dalin no panaoy nepnep.

⁴"Balet say Katawan kuanto, Israel tan Juda, antoy gawaen kod sikayo? Say panangaro yod siak et nanaandipat a singa kakaandipat na kelpad kabwasan; singa linaew a nanaandipat ed kabkabwasan.

⁵"Sikato yay makasengeg ya imbakik ed sikayo ray propitak a mangibawag ed sikayo na sintinsia tan say deral. Say malinew a labay kod sikayo et saraya:

⁶"Say ag mangoman a panangaro yo so labay ko, aliwan saray ibagat yon ayayep. Labay ko nin naamtaan ak na saray totook nen say mangisaklang irad siak na bagat a popoolan.

⁷"Balet kaloob da ed dalin diad Adam, dineral da so impisipanan kod sikara.

⁸"Say Galaad et siudad a napno na saray totoon maoges tan saray managpatey na totoo.

⁹"Singa olup na saray matakew a mananeb na sakey a too iray papari. Mamapatey ira na too anggan diad dalan a mamaarap ed masanton pasen na Sikem. Gagagalaen da so panggagawa rad sayan kaogsan!

¹⁰Akanengneng ak na makapataktakot a bengatla ed Israel: Dinotakan na saray totook so sikaran dili onung ed ganggan diad pangigagalang dad saray talintaoy diriyos.

¹¹Sikayon totood Juda, inggetar ko lay panaon a panusak met ed sikayo lapud kaogsan a gagawaen yo.