Read Pangasinan OSEAS 8 Bible Online

OSEAS 8 - Pangasinan bible

OSEAS 8

¹"Say Katawan kuanto, Paknul yoy trumpita! Singa agilan onsisibar ed dalin ko iray kalaban! Dineral na saray totook so impisipanan kod sikara tan sinumlang day ganggan ko.

²"Anggaman a tatawagen da ak a Dios da tan ipapasen dan totook ira tan kabat da ak,

³"impolisay da so kamaungan. Lapud saya osilan ira na saray kalaban da.

⁴"Amili ra na saray arari iray totook, balet ag da ak impibali ed impamili ra. Nantuturo ra na saray pangulo, balet anggapoy abubon ko. Ginagawa ran talintao iray pilak tan saray balituk dabalet kaderalan da ya lamlamang.

⁵"Kabosul koy bakan balituk ya igagalang na saray taga siudad na Samaria. Mapalaloy petang na olok ed sikara. Anggad kapigay itonda ran mangigalang ed talintaoy diriyos?

⁶"Sakey a platiron taga Israel so nanggawa na talintao, et aliwa ni lamlamang a dios imay ginawa to! Namisimisi imay bakan balituk a gagalangen ed Samaria!

⁷"No mangisibwag ira na dagem manani ra na bagyo! Say alog ya ag ontakken iray bungay tanaman to et ag balut makaiter na pantagano. Balet anggan bilang makapangiter, pambilay na saray taga arum a bansa.

⁸"Nagmaliw a singa arum a bansa so Israel tan anggapoy kana ton singa nabtag a banga.

⁹"Ginawa na saray totood Israel so labalabay da, a kapara ray sakey a mabanos ya asnod katakelan. Linma ran onkerew na tulong ed Asiria tan anguupa ra na saray arum a bansan mangyagel ed sikara.

¹⁰Balet natan pantitiponen ko ra, insan ko ra dusaen. Ag mabayag manayay irad panlikna ray kairapan no pairapen ira na ari na Asiria.

¹¹No kaonungay idadakel na ipapaalagey dan pakaekalay kasalanan, ontan met so idadakel na saray pasen a pakapankasalananan da.

¹²Mansusulat ak na ontan lan karakel a bangabangat ed saray totoo, balet ipapasen da ra lamlamang ya andi-kana.

¹³Mangibabagat irad siak tan kakanen da ray karnin imbagat. Balet siak a Katawan et ag ak makaliliket ed sikara, tan natan nanunotan koy kasalanan da, et dusaen ko rad saya; papawilen ko ra ed Egipto!

¹⁴Nampapaalagey na saray palasio iray totood Israel, balet alingwanan day dilin Amalsad sikara. Nampapaalagey na saray siudad ya aliber na padir iray totood Juda. Balet mangipelag ak na apoy a mamool ed saray palasio tan saray siudad da.