Read Pangasinan OSEAS 9 Bible Online

OSEAS 9 - Pangasinan bible

OSEAS 9

¹"Totood Israel, tondaan yo ray pansisilibra yod saray pista yo a singa saray pagano. Inkaindan yoy Dios yo tan nagmaliw kayon aliwan matoor ed sikato. Diad nandoroman pasen inlalako yoy sikayon dili a singa saray marotak a bibii ed dios a Baal tan labalabay yo ray trigon abaloan yon imbayar tod sikayo.

²"Balet ag mabayag kulang so trigo yo tan say larak na oliba yo, tan anggapo la so alak.

³"Ag mansiansian manayam ed dalin na Katawan iray totood Israel, no ag ingen nepeg ya ompawil irad Egipto tan diad Asiria nepeg a mangan iray kakanen a marotak onung ed ganggan.

⁴"Diad saraman a dalin a kibantakan da, ag da nayariay mangibagat na alak ed Katawan odino mangisaklang na arum ni ran bagat ed sikato. Say tagano ra et singa kakanen no tolur, a dotakan toy balang sakey a mangan. Ikana a panempey labat na eras; anggapoy nayarin iyakar ya ibagat ed Timploy Katawan.

⁵"Et antoy gawaen da no onsabiy panaon a nigetar a pansilibrad saray pista a pamagalang ed Katawan?

⁶"No onsabiy kadederal, tan nikaykayat iray totoo, tiponen ira na saray Egipsiotiponen da ran ipompon ed Memfis! Saray kayamanan dan pilak tan saray pasen ya angiletnegan na saray abung da et natubuan ira na saray dika tan saray tanaman a masabit.

⁷"Sinmabi lay panaon na dusa, say panaon ya awaten na saray totood Israel so kanepegan dan dusa. No nagawa la ya, naamtaan na Israel! Sayan propita, kuanyo, et makulang-kulang. Ambagel yan toon apuyanan na ispiritu. Mapalaloy pambobosul yod siak lapud ambelat lan tuloy so kasalanan yo.

⁸"Say Dios imbaki to ak a sakey a propitan mamasakbay ed saray totoo ton Israel. Balet anggan iner a laen ko, papatitan yo ak a singa sakey a manok. Diad dilin dalin na Dios saray totoo so kalaban na propita.

⁹"Mapalaloy kaogsan a gagawaen da; singa samay kaogsan a ginagawa ra nen wala rad Gabaa. Nanunotan na Dios so kasalanan da tan dusaen to ra lapud kaogsan da.

¹⁰Say Katawan kuanto, Nen inmonan nalmok so Israel, singa ak akalmoy sengeg na ubas ya ontutubod kalawakan. Nen inmonan anengneng ko ray lalaki yo, singa ak akanengneng na inmona ran aluton bungay igos diad panaon to. Balet nen akakar irad Palandey na Peor, ginapwan day angigalang ed Baal tan ag abayag nagmaliw iran makapaingungot a singa saray diriyos ya inararo ra.

¹¹Say inkatalonggaring na Israel et ontikyab a singa sakey a manok, tan anggapo lad sikaray ogaw a nianak, anggapo lad sikaray manlokun, tan anggapo lad sikaray ninginew ya ogaw.

¹²Et anggaman a mamabaleg ira na saray anak, alaen ko ra ya anggad anggapoy natilak. No ikaindan ko ra yan totoo, makapasinagem iray nagawad sikara.

¹³Katawan, sankanengneng kon saray ogogaw et nanaosilan ira tan napapatey ira.

¹⁴Antoy kerewen kod sikan gawaen mod sarayan totoo? Pagmaliw mo pan lepes iray kaasawaan da! Pagmaliw mo pa ran ag makapanpasusod saray anak da.

¹⁵Say Katawan kuanto, Ginmapod Gilgal ya amin iray maoges a gagawaen da. Diman so angigapwan koy pambosul kod sikara. Lapud saray maoges a ginagawa ra, pataynanen ko rad dalin ko. Ag ko la ra aroen; linmaban ed siak ya amin iray pangulo ra.

¹⁶Saray totood Israel et singa ra sakey a tanaman ya amagaay lamut to tan ag makapambunga. Ag la ra makaanak, et anggaman a makaanak ira, pateyen ko ray inararo ran anak.

¹⁷Say Dios a panlilingkuran ko et ipolisay to ray totoo to, lapud ag ira dinmengel ed sikato. Magmaliw iran akar-akar ed saray bansa.