Read Pangasinan JOEL 2 Bible Online

JOEL 2 - Pangasinan bible

JOEL 2

¹"Paknul yoy trumpita; paknul yod Sion a masanton palandey na Dios so pamasakbay. Giwgiw kayo, sikayon totood Juda! Magano lan onsabiy agew na Katawan.

²"Sakey ya agew ya ambilonget tan maermen, sakey ya mayemyem tan malorem ya agew. Ondodogpa ray amayamay a dorun a singa ra bilonget ya onkokobut ed kapalandeyan. Ag ni agaway singa onya nen saman, tan ag yan balut nagawa ed arapen a panaon.

³"Singa panagtemek na apoy so pangan dad saray tanaman. Singa Tanamanan na Eden so dalin a walad arap da, balet sakey a begtebegtew a kabueran so dalin ed beneg da. Anggapon balut so nalabsanan dan tanaman.

⁴"Singa kabayo so nengneng da; ombabatik iran singa saray kabayod bakal.

⁵"Diad panlulukso rad kapalandeyan, mapanaspas iran singa saray karwahi; masalanosut iran singa dikan napopoolan. Mandarasig iran singa amayamay a sondalon akaparaan a mibakal.

⁶"Diad isasabi ra, natatakot ya amin so katoowan; ampoti-potiy bosaleg dan amin.

⁷"Ondodogpa ran singa saray sondalon mibabakal; singa ra sondalon onkakalab ed padir. Itutuloy day onsusulong tan ag ira onaarawid dalan

⁸"odino mansasamsamay dalan. Seselaken day antokaman a tirinsira, et anggapoy makabaat ed sikara,

⁹"Maples iran ondodogpad siudad; luluksoen da ray padir; kakalaben da ray kaabungan tan ondadalan irad saray bintana a singa ra matakew.

¹⁰Diad idadalan da nayeyegyeg so dalin; nayayakayak so tawen. Ombibilonget so agew tan say bulan, tan ag la onsisinag ira bitewen.

¹¹Say Katawan iyeeyag ton singa karul so ganggan tod saray sondalo to. Amayamay iray sondalo ton onoonur ed sikato tan makapanyari ra. Makapataktakot a tuloy so agew na Katawan! Siopay makapaliis ed patey no onsabi yan agew?

¹²Balet anggan natan, kuay KATAWAN! masimoon kayon magbabawi tan pawil kayod siak a manaayuno, mannangnangis, tan maneermen kayo.

¹³Ipapuso yoy panermen yo; aliwan masarag so pampilat yod kawes yo. Pawil kayod Katawan a Dios yo, ta maabagey tan mapangasi; sikatoy maanos tan totooren toy sipan to; sipaparaan a mamirdona, aliwan manusa.

¹⁴Angangko mangoman a kanunotan so Katawan a Dios yo tan bindisionan to kayo na daakan iran bungay tanaman. Diad satan nayarian yoy mangibagat ed sikato na trigo tan alak.

¹⁵Paknul yod Palandey na Sion so trumpita; iganggan yoy sakey a panagayuno tan tawag kayo na sakey a miting!

¹⁶Pantitipon yo ray totoo; iparaan yo ran ondagup ed masanton miting; pankakasakey yo ray mamatakken; pantitipon yo ray ogogaw tan ontan met na saray mansususo. Anggan saray kapankasal nepeg a taynan day kaabungan da tan ondagup ira.

¹⁷Nepeg ya onakis tan mampikasi iray paparin manlilingkur ed nanleetan na altar tan say lolooban ed Timplo: Katawan, kasian mo pa ray totoom. Ag mo pa iyaabuloy a balawen tan ludlureyen kami na arum a bansa diad pangikuan da, Kawalaan na Dios yo?

¹⁸Insan say Katawan impanengneng toy panagnunot tod dalin to; walay panangasi tod saray totoo to.

¹⁹Say Katawan inmebat ed sikara: Itdan ta kayo la na trigo, alak, tan larak na oliba, et napenek kayo. Ag kayo la balawen na arum a bansa.

²⁰Ekalen ko ray amayamay a dorun a nanlapud baybay tan paonlaen ko rad kabueran. Saray walad onaan ya olup et naablug irad Inatey a Dayat, tan saray walad bandad onur, diad Dayat na Mediteraneo. Ombanget iray inaatey a laman da. Deralen ko ra, lapud saray ginagawa rad sikayo.

²¹Kaalogan, ag kayo natatakot; ingen, manliket tan manggayaga kayo, lapud saray amin a ginagawa na Katawan ed sikayo.

²²Ayayep, ag kayo natatakot. Malamlambut iray dikad pastolan; mambubunga iray kakiewan, tan walay daakan a bungay igos tan ubas.

²³Manliket kayo, sikayon totood Sion, manliket kayod saray ginagawad sikayo na Katawan a Dios yo. Initdan to kayo na nagnap ya oran ed tiagew, impelag toy oran a para sikayo no panaoy ambetel tan pinaoran ton singa gendat no nepnep.

²⁴Napano na trigo so panagilikan; onlepwad alak tan larak na oliba iray abut ya abay na saray panagpespesan.

²⁵Ipawil kod sikayo ira may naandid sikayo diad saramay taon ya inaakan na amayamay a dorun iray tanaman yo. Siak so angibakid sikayo ra man ya amayamay a dorun.

²⁶Amayamay natan so naakan yo, tan napenek kayo. Idayew yo so Katawan a Dios yo, a nanggagawad sikayo na saray makapakelaw a bengatla. Ag lan balut napabaingan iray totook.

²⁷Kanyan sikayo ran taga Israel, naamtaan yo a wala ak ed sikayo tan siak a Katawan so bukbukor a Dios yo. Ag lan balut napabaingan iray totook.

²⁸Kayari to yan nagawa ibung kod balang sakey a too so ispirituk: ibawag na saray anak yon lalaki tan bibii so balitak; nawalaan na saray kogip iray mamatakken yon lalaki, tan makanengneng na pasingayew iray tobun-balo yo.

²⁹Diad satan a panaon ibung kod anggan saray aripen kon bibii tan lalaki so ispirituk.

³⁰Diad satan ya agew mangiter ak na saray tanda a nanengneng ed tawen tan diad tapew na dalin; wala so onagos a dala, apoy, tan makapakapal ya asewek.

³¹Ombilonget so agew, tan ombalangan singa dala so bulan kasakbayan ya onsabi so baleg tan makapataktakot ya agew na Katawan.

³²Balet nilaban ya amin iray onkerew na tulong ed Katawan. Onung na inkuay Katawan, Saray pigaran totood Jerusalem et makabatik ira; makapaliis ed patey iray pilien ko.