Read Pangasinan JOEL 3 Bible Online

JOEL 3 - Pangasinan bible

JOEL 3

¹"Say Katawan kuanto, Diad satan a panaon ipawil koy aligwas na Juda tan Jerusalem.

²"Tiponen kon amin iray bansa tan iyakar ko rad Patar na Sintinsia. Sintinsiaan ko rad man, lapud amin a ginagawa rad saray totook. Inkakayat dad saray arum a bansa iray Israelita tan inaapag day dalin kon Israel.

³"Nampapalaranan ira no siopay mangalad saray adakep. Inlalako ran aripen iray ogogaw a lalaki tan bibii, pian walay nibayar dad saray marotak a bibii tan walay nisaliw day alak.

⁴"Antoy gagawaen yod siak, sikayo ran taga Tiro, Sidon, tan amin a dalin a sakop na Filistia? Babayaran yo ak, lapud sakey a bengatla? No ontan so gagawaen yo, bayaran ta kayon tampol!

⁵"Inaala yo ray pilak ko tan saray balituk ko tan inyaakar yod saray timplo yo iray kayamanan ko.

⁶"Inyaarawi yod dilin dalin da iray totood Juda tan Jerusalem tan inlalako yo rad saray Grigo.

⁷"Ipaway ko ra natan ed saray pasen ya angilakuan yod sikara. Gawaen kod sikayo so ginagawa yod sikara.

⁸"Abuloyan kon nilakod saray totood Juda iray anak yon lalaki tan bibii; ilako da ra ed saray totood Saba, ya arawdawin pasen. Siak, say Katawan, so nansalita.

⁹"Ibawag yo ya ed saray bansa: Mamparaan kayon mibakal; tawag yo ray bumabakal yo; pantitipon yo ray amin a sondalo yo tan mankurang kayo.

¹⁰Pitpit yon gawaen ya ispada iray tarem na lukoy yo tan gawa yon pika iray panaggapas yo. Nepeg a milaban iray anggan makapoy so laman da.

¹¹Ganatan yoy ondago, amin yon walad kaliber-liber a bansa, tan mantitipon kayo ed patar. O Katawan, paakseb mo pa la ray sondalom ya ondogpad sikara!

¹²Saray bansa et nepeg a mamparaan ira, ta ondago ra ed Patar na Sintinsia. Siak, a Katawan, et onirung ak diman a manintinsia ed amin a kaliber-liber a bansa.

¹³Mapalaloy kaogsan da; gapas mo pa ran singa trigo no panaoy panagani; terak mo ran singa katerak na ubas diad panagpespesan ya anggad onlepwan onagos so alak.

¹⁴Nilibon totoo iray walad Patar na Sintinsia. Diman so sabian naani na Agew na Katawan.

¹⁵Ombibilonget so agew tan say bulan, tan ag la onsisinag iray bitewen.

¹⁶Unungol a manlapud Palandey na Sion so Katawan; say bosis to onkarul a manlapud Jerusalem; nayakayak iray katawenan tan nayegyeg so dalin. Balet iyagel to ray totoo to.

¹⁷Diad satan, Israelita, naamtaan yo a siak so Katawan a Dios yo. Manaayam ak ed Sion a masanton palandey ko. Magmaliw a masanton siudad so Jerusalem; ag lan balut nadakep na saray taga arum a bansa.

¹⁸Diad satan a panaon napano na kaubasan iray kapalandeyan, tan nawalaan na baka so balang pokdul; nawalaan na daakan a danum so intiron Juda. Manlapud Timplo na Katawan onagos so kolus a manalog ed Patar na Acacia.

¹⁹Magmaliw a disirto so Egipto, tan magmaliw a dalin ya aderal-deral so Edom, lapud dinogpaan day dalin na Juda tan pinapatey da ray totoo ton anggapoy kasalanan.

²⁰Ibawian ko ra may apatey; dusaen kon dusaen iray walay kasalanan. Balet natoowan ed ando lan ando so Juda tan Jerusalem, tan siak a Katawan et manayam ak ed Palandey na Sion.