Read Pangasinan AMOS 1 Bible Online

AMOS 1 - Pangasinan bible

AMOS 1

¹"Sikara yay salita nen Amos, sakey a pumapastol a taga baley na Tecoa. Duay taon kasakbayan na insabiy yegyeg, nen ari na Juda si Uzias tan si Jeroboam a lakin anak nen Joas so ari na Israel, impaamta na Dios ed kinen Amos ira yan bengatlan nipaakar ed Israel.

²"Inkuanen Amos, Unuungol a manlapud Sion so Katawan; onkakarul a manlalapud Jerusalem so bosis to. Namamagaan iray pastolan tan ompapatey iray dika ed Palandey na Carmelo.

³"Say Katawan kuanto, Nankakasalanan iray totod Damasco, kanyan andi-saew a dusaen ko ra. Mapalaloy impanduduksa rad saray totod Galaad.

⁴"Kanyan mangyakar ak na apoy ed palasion impaalagey nen Ari Hazael tan poolan ko ray tirinsira nen Ari Benhadad.

⁵"Gaygayen ko ray puirta na siudad na Damasco tan paekalen ko ray totoon manaayam ed Patar na Aven tan say manoley na Bet-eden. Naalan priso ed dalin na Kir iray totoon taga Siria.

⁶"Say Katawan kuanto, Nankakasalanan iray taga Gaza, kanyan andi-saew a dusaen ko ra. Inaala da ray amin a totood saman a bansa, insan da ra inlalakon aripen ed saray taga Edom.

⁷"Kanyan mangyakar ak na apoy ed saray padir na siudad na Gaza tan poolan ko ray tirinsira to.

⁸"Ekalen kod pakaoley iray manoley ed saray siudad na Asdod tan Askelon. Dusaen koy siudad na Ekron, tan ompatey ya amin iray Filisteo ya atilak.

⁹"Say Katawan kuanto, Nankakasalanan iray taga Tiro, kanyan andi-saew a dusaen ko ra. Inyaakar dan adakep ed dalin na Edom iray amin a totood sakey a bansa, tan ag da tinoor so impisipanan dan mikaaro.

¹⁰Lapud saya mangyakar ak na apoy ed saray padir na siudad na Tiro tan poolan ko ray tirinsira to.

¹¹Say Katawan kuanto. Nankakasalanan iray totoon taga Edom, kanyan andi-saew a dusaen ko ra. Inoosilan day ispada iray lalakin agagi ra ya Israelita, tan ag da ran balut kinasian. Anggapoy anggaan so pasnuk da tan ag dan balut pinakepa.

¹²Lapud saya mangyakar ak na apoy ed siudad na Teman tan poolan ko ray tirinsira na Bozra.

¹³Say Katawan kuanto, Nankakasalanan iray taga Ammon, kanyan andi-saew a dusaen ko ra. Diad impibakal dan manakop na arum iran dalin, binubutyakan da ray anggan bibiin malokun ed Galaad.

¹⁴Lapud saya mangyakar ak na apoy ed saray padir na siudad na Raba tan poolan ko ray tirinsira to. Wala ray eyagan ed satan no agew na bakal, tan manalimbusabos so panlalaban.

¹⁵Say ari tan saray opisyal to et nibantak ira ed arum a bansa.