Read Pangasinan AMOS 2 Bible Online

AMOS 2 - Pangasinan bible

AMOS 2

¹"Say Katawan kuanto, Nankakasalanan iray totoon taga Moab, kanyan andi-saew a dusaen ko ra. Ag da pinagalangan iray pokel na ari na Edom diad impamool dad sikara ya anggad dinmapol ira.

²"Lapud saya mangyakar ak na apoy ed tapew na dalin na Moab tan poolan ko ray tirinsira na Keriot. Ompatey ed eyag na bakal iray totoon taga Moab legan a maneeyagan iray sondalo tan napapaknul iray trumpita.

³"Pateyen koy manoley ed Moab tan amin a pangulo ed satan a dalin.

⁴"Say Katawan kuanto, Nankakasalanan iray totood Juda, Kanyan andi-saew a dusaen ko ra. Impolisay da ray bangat ko tan ag da inonur iray ganggan ko. Imbalang ira na saray tila-tilan diriyos a nanlilingkuran na saray lalaki ra.

⁵"Lapud saya mangyakar ak na apoy ed Juda tan poolan ko ray tirinsira na Jerusalem.

⁶"Say Katawan kuanto, Nankakasalanan iray totood Israel, kanyan andi-saew a dusaen ko ra. Ilalako ran aripen iray lalakin matonung ya ag da nabayaray utang da, saray mairap-bilay ya ag da nayarian a bayaran so anggan bili na sankatopag a sandalya.

⁷"Igagatin da ray totoon makapkapoy tan pangaskasiyan ed kipapasen tan ipapaliis dad dalan iray mairap-bilay. Saray sanama et miaakdul irad saksakey a biin aripen, kanyan dodotakan da onung ed ganggan so masanton ngaran ko.

⁸"Diad inerman a pasen a panangigalangan saray lalaki et onoogip iran akasolung ed laman da so kawes ya impotikad sikara na saray mairap-bilay lapud utang. Diad dalem na timplo na Dios da maniinom iray alak ya inaala rad saray akautang ed sikaray kuarta.

⁹"Balet, totook, sikayo so makasengeg no akin et sigput kon dineral iray Amorreo, totoon singa kiew a sidro so kabaleg da tan singa kiew a robli so kabiskeg da.

¹⁰Impaway ta kayo ed Egipto, inwanwan ta kayod kalawakan ya apataplon taon, tan inter kod sikayo so dalin da ray Amorreo.

¹¹Pinilik a propita iray pigaran anak yon lalaki, tan pinilik met a Nazareo iray pigaran tobun-balon lalaki ed sikayo. Ag ta tua yan ibabagak, sikayo ran totood Israel? Siak, say Katawan, so nansalita.

¹²Balet pinainom yo na alak iray Nazareo tan ingganggan yo ray propita ya ag da ipulong iray salitak.

¹³Et natan detdetan ta kayod dalin; manayay kayod satan, tan singa kayo kariton a napnoy trigo.

¹⁴Ag makaarawi iray anggan totoon mabatik; onkapoy iray mabiskeg a totoo, tan ag niagel na saray sondalo so dilin bilay da.

¹⁵Ag makatalindeg ed kawalaan da iray pumapana, ag makaarawi iray mabatik, tan ag nilaban na saray akakabayo so bilay da.

¹⁶Diad satan ya agew anggan saray sankasebegan a sondalo et ikbanan da ray armas da tan ombatik ira. Say Katawan so nansalita.