Read Pangasinan AMOS 3 Bible Online

AMOS 3 - Pangasinan bible

AMOS 3

¹"Totood Israel, dengel yo yay sinalita na Katawan nipaakar ed sikayo, amin yon totood bansa ya impaway to ed Egipto:

²"Diad amin da ray bansa ed tapew na dalin, sikayo labat so kabat ko tan inasikasok. Sikato yay makasengeg no akin et ambelat iray kasalanan yo, kanyan nepeg a dusaen ta kayo.

³"Makapambiahi kasin mambansag so duaran too no ag ni ra akapampaknan mambana ed sakey a pasen?

⁴"Ongwam kasiy lion ed takel no ag ni akalmoy siraen ton ayep? Unungol kasiy malangwer a lion ed ongib to no ag ni akarel na siraen to?

⁵"Naerel kasid patit so sakey a manok no anggapoy nitapang ed sikato? Onsaran bigla kasi so patit no anggapo niy nala to?

⁶"Nayari kasin ag ontakot iray totoo no napaknul ed siudad so trumpitan manawag na bakal? Nayari kasin onsabiy deral ed siudad no ag ipadalan na Katawan?

⁷"Say Katawan a Dios et ag balut manggawa na antokaman ya ag to ni ipaamtad saray aripen ton propita so plano to.

⁸"No ongwam so lion, siopay ag ontakot? No mansalita so Katawan a Dios, siopay makapangitepel ya ag to ibawag so salitay Dios?

⁹"Ibawag mod saray manaayam ed saray palasiod Egipto tan Asdod: Mantitipon kayod saray pokdul ed kaliber-liber na Samaria, ta nengneng yoy baleg a gewgew tan saray nagagawa a krimin diman.

¹⁰Say Katawan kuanto, Sarayan totoo et papanoen da ray ankakabaleg ya abung da na saray bengatlan sinasamsam da tan tinatakew da. Ag da amtay manggaway kaptekan.

¹¹Lapud saya liktuben na kalaban so dalin da, deralen da ray tirinsira ra, tan samsaman da ray ankakabaleg a kaabungan da.

¹²Say Katawan kuanto, No panon a nabawi na pumapastol so duaran sali odino sakey a layag na karniron sinira na lion, ontan met a daiset labat so nakeraan ed saray totood Samaria a natan mandodokul irad saray mamabmablin katri.

¹³Dengel ka natan, tan pasakbayan mo ray kabyangay boleg nen Jacob, kuay Katawan a Dios a Makapanyarin-amin.

¹⁴Diad agew a dusaen ko ray totood Israel lapud saray kasalanan da, deralen ko ray altar ed Betel. Napoter iray suyok na balang altar tan napelag irad dalin.

¹⁵Deralen ko ray kaabungan a para panaoy ambetel tan saray kaabungan a para panaoy tiagew. Natumban naderal-deral iray abung a dinokoraan na garing; naderal ya amin iray ankakabaleg a kaabungan.