Read Pangasinan AMOS 6 Bible Online

AMOS 6 - Pangasinan bible

AMOS 6

¹"Pangaskasiyan so kipapasen yo, sikayon mainomay so pambibilay yod Sion tan sikayon taga Samaria ya abaloan yon arawi kayod kaatapansikayon totoon matalona ed sayan bansan Israel a dadagoen a kerewan na tulong na saray arum a totoo!

²"Laka yo ta nengneng yoy siudad na Calne. Insan kayo onlad matalonan siudad na Hamat tan mampalosur kayod Filistia diad siudad na Gat. Natalonaan da kasid kaabigan iray nanarian na Juda tan Israel? Walay dalin a maawang nen say dalin yo?

³"Ag yo birbiren ya onsasabi so agew na deral, balet say gagawaen yo papaganoen yoy isabi na saman ya agew.

⁴"Pangaskasiyan so kipapasen yo, sikayon maninat-inat ed saray mabmablin katri yo tan manliliket ed pandorongo yod potahin karniy kilaw na baka tan kordiro!

⁵"Labalabay yoy manggawa na saray kanta a singa ginawa nen David, tan totogtogen yo ra ed saray arpa.

⁶"Saray bason ankabaleg so paniinoman yod saray alak tan sankabalingitan a pabalingit iray ipopoyuk yo, balet ag yo eermenan so kaderal na Israel.

⁷"Lapud saya sikayo so ononan nibantak ed arum a bansa. Mangangga la ray pista yo tan saray ankakabaleg a ponsia yo.

⁸"Say Katawan a Dios a Makapanyarin-amin et masimoon ton inter yan pasakbay: Kabosul koy panagpaatagey da ray totood Israel; kagulak iray ankakabaleg a kaabungan da. Ipalimak ed saray kalaban so manonan siudad da tan amin a bengatlan logan to.

⁹"No walay atilak a samploran lalaki ed sakey a pamilya, ompatey ira.

¹⁰Say kanayon na too a sikatoy makaoley ed tolur et ipaway tod abung so bangkay. Samay kanayon ontawag ed siopaman ya atilak ed abung, Wala nid tay atilak a kaibam? Say too onebat, Anggapo! Insan samay kanayon kuanto, Ag ka maknul! Nepeg tayoy manalwar; ag tayo nepeg a bitlaey anggan ngaran na Katawan.

¹¹No mangganggan lay Katawan, nagaygaygay iray kaabungan, ankabaleg may ankelag ira.

¹²Ombatik kasid baton-dampay iray kabayo? Pambaka kasi na totoo ed dayat iray baka? Balet impagmaliw yon samal so katonungan, tan pinekewet yoy kaptekan.

¹³Ipapasirayew yoy impakadakep yod baley na Lodebar. Kuanyo, Mabiskeg kami kanyan adakep mi so Karnaim.

¹⁴Say Katawan a Dios a Makapanyarin-amin kuanto, Totood Israel, mangyakar ak na saray sondalod arum a bansa a manakop ed bansa yo. Pairapen da kayo manlapud Dalan a Hamat diad baybay ya anggad Kolus na Araba diad abalaten.