Read Pangasinan AMOS 9 Bible Online

AMOS 9 - Pangasinan bible

AMOS 9

¹"Anengneng koy Katawan a manalalagey ed abay na altar. Ingganggan to: Maso yo ray toktok a lusek na Timplo, pian nayegyeg so pundasion. Igeba-geba yod kaoluan da ray totoo. Pateyen kod bakal iray nakdaan a totoo. Anggapod sikaray makaarawi; anggapoy anggan sakey a makabatik ed sikara.

²"Anggan mangotkot iran onlad pasen a panaayaman da ray inaatey, naerel ko rad man. Anggan onkalab irad tawen, iyepas ko ra.

³"No onamut irad toktok na Palandey na Carmelo, anapen ko ra et erelen ko ra. No iyamutan da ak ed dalem na dayat, iganggan koy dragon ed dayat ta ketketen to ra.

⁴"No nadakep ira na saray kalaban da, iganggan kon pateyen da ra. Ginetmak lan deralen, aliwan tulongan ira.

⁵"Didiwiten na Katawan a Dios a Makapanyarin-amin so mundo, et nayeyegyeg; maneermen ya amin iray totoon manaayam dia. Say intiron mundo et onaatagey tan nakukusbo a singa Ilog na Nilo.

⁶"Say Katawan ipapaalagey tod katawenan so abung to, ililira tod tagey na mundo so tambubong na tawen Tatawagen toy danum ed dayat tan ikakalbo tod tapew na dalin Say ngaran to et Yahweh!

⁷"Say Katawan kuanto, Totood Israel, nununoten ta kayo a singa pannununot kod saray taga Sudan. Impaway kod Creta iray Filisteo tan diad Kir iray Siriano, a singa impangipaway kod sikayo ed Egipto.

⁸"Siak, say Katawan a Dios, et babantayan ko yan makasalanan a nanarian na Israel, tan deralen kod tapew na dalin. Balet ag ko deralen ya amin iray kabyangay boleg nen Jacob.

⁹"Mangganggan ak, et nayegyeg iray totood Israel a singa kayakayak na belas ed yakayakan. Yakayaken ko rad saray bansa, ta ekalen ko ray amin ya andi-kakanaan.

¹⁰Napatey ed bakal iray makasalanan a totookamin da ray mangibabagay, Ag iyabuloy na Dios a napasakitan itayo.

¹¹Say Katawan kuanto, Onsabiy agew ya ipawil koy gendat a kipapasen na nanarian nen David, a kaparpara toy sakey ya abung ya aderal-deral ed inkageba to. Apigeren ko ray padir to tan ipaalagey kon singa gendat.

¹²Kanyan naala na saray totood Israel so akeraan ed dalin na Edom tan amin da ray bansan kayaryan ko ra nen saman, kuay Katawan a mangyabuloy a nagawa ra ya.

¹³Onsabi ray agew. Kuay Katawan, a masiglat niy itobu na saray tanaman ed kaalogan nen say pananid saraya, tan masiglat niy katotobu da ray sengeg na ubas nen say panggawa na alak na ubas. Mangiterter na masamit ya alak iray kapalandeyan, tan mamaagos met na masamit ya alak iray kapokdulan.

¹⁴Ipawil kod dalin da iray totook. Pasimbaloen dan ipaalagey iray aderal-deral a siudad da tan manayam irad man; mantanem ira na saray ubas tan inomen da ray alak da; mantanem ira na saray tanaman tan kanen da ray bunga ra.

¹⁵Itanem ko ray totook ed dalin ya inter kod sikara, et ag la ran balut nabagut. Say Katawan a Dios yo so nansalita.