Read Pangasinan JONAS 1 Bible Online

JONAS 1 - Pangasinan bible

JONAS 1

¹"Aminsan ya agew say Katawan akisalitad kinen Jonas a lakin anak nen Amitai.

²"Inkuanto, Lakad Ninive, say baleg a siudad, ta mansalita ka sumpad saman a siudad; amtak so ontan lan kaogsan na saray totood man.

³"Balet sananey a dalan so inarap to, ta labay ton ibatikan so Katawan. Linmad Jope a dimay akanengnengan to na sakey a bapor ya onla lad Espanya. Kayari ton binayaran so pasahi to, linmogan ed samay bapor a kaiba to ray tripulanti ya onlad Espanya a diman to naarawian so Katawan.

⁴"Balet say Katawan angibakid dayat na mabiskeg a dagem, tan diad gaway peles na bagyo ngalngali la nabuyak imay bapor a niloganan da.

⁵"Ataktakot iray marinirod samay bapor, kanyan tinmawag na tulong ed nagsinagsin dios to so balang sakey ed sikara. Pian nalemewan ira imbabantak dad dayat iray karga ra. Legan to ya, linmad bandad dalem na bapor si Jonas, dinmokul, tan naogip na malmalet.

⁶"Arumog diman na kapitan kanyan kuantod sikato, Akin et wadtan kan naogip? Bangon ka, ta kerew kay tulong ed dios mo. Ag la pigan abageyen to itayo et ipaliis to itayod patey.

⁷"Saray mariniro kuandad sakey tan sakey ed sikara, Mambibinagut itayo, ta nengnengen no siopay nepeg a natetel ed sayan asagmakan tayon kaatapan. Nambibinagut ira sirin, et say ngaran nen Jonas so abagut.

⁸"Kanyan kuandad sikato, Natan sirin, ag ka mamboborid sikami! Siopay nepeg a natetel ed sayan asagmakan tayon kaatapan? Antoy gagawaen mo dia? Taga iner ka? Judio ka, o anto?

⁹"Sakey ak a Hebreo, ebat nen Jonas. Mangigagalang ak ed Katawan a Dios na tawen, say nanggawad dalin tan say dayat.

¹⁰Intuloy nen Jonas ya imbangad sikara ya ibabatikan toy Katawan. Mapalaloy inkataktakot da ra may mariniro, kanyan kuandad sikato, Akin et ontay ginawam?

¹¹Pinmalalo lan pinmalalo so imbiskeg na samay bagyo, kanyan saramay mariniro tinepet dad kinen Jonas, Antoy gawaen mid sika pian ontonday bagyo?

¹²Inmebat si Jonas, Ibantak yo ak ed dayat, et ontonday bagyo. Amtak a siak so makasengeg na sayan impakabetan yo diay mabiskeg a bagyo.

¹³Balet ginawa na saramay mariniro so anggaay nayarian dan mangigilig ed samay bapor. Insakasakay day pinasia, balet ag da nigilig lapud pinmalalo lan pinmalo so imbiskeg na bagyo.

¹⁴Kanyan tinmawag irad Katawan, O Katawan, pikasi mid sika ya ag mo kami pa dudusaen na patey lapud pangoyus mid bilay na sayan too. Sika, O Katawan, so akaoley ed sayan inkagawa; sika so nanggawad sayan amin.

¹⁵Insan da inalay Jonas tan imbantak dad dayat; et kinmalmadan tampol imay dayat.

¹⁶Lapud saya mapalaloy inkataktakot dad Katawan ira may mariniro, kanyan angibagat irad sikato tan insipan dan manlingkur irad sikato.

¹⁷Lapud ganggan na Katawan, inakmon na balbaleg a sira si Jonas; nanayam ed dalem na eges na sira si Jonas na taloy agew tan taloy labi.