Read Pangasinan BILANG 10 Bible Online

BILANG 10 - Pangasinan bible

BILANG 10

¹"Say Katawan kuantod kinen Moises,

²"Manggawa kay duaran pinitpit a pilak a trumpita ya ikanam ran panawag ed saray totoo ed pantitipon da tan diad pangyalis day kampo.

³"No mambansag a napaknul na andokey iray trumpita, mantitipon ed kawalaan mo iray amin a totoo diad lolooban na Tuldan Ayaman ko.

⁴"Balet no sakey labat so napaknul, saray pangulo labat na saray boleg so mantitipon ed kawalaan mo.

⁵"No napaknul ira na antikey, onalsa la ray tribun walad bandad bokig.

⁶"No kumadwan napaknul ira na antikey, onalsa la ray tribun walad bandad abalaten. Kanyan antikey so pamaknul ed saray trumpita no iyalis so kampo,

⁷"balet andokey so pamaknul no tawagen a mantitipon ya amin iray totoo.

⁸"Saray paparin lalakin anak nen Aaron so mamaknul na saray trumpita. Say onggendan a totontonen et nepeg ya onuren anggan kapigan.

⁹"No mibakal kayod loob na dalin yo, ta iyagel yoy sikayon dili ed saray kalaban a dinmogpad sikayo, paknul yod sarayan trumpita so tanul a para bakal. Siak a Katawan a Dios yo et tulongan ta kayo tan iyagel ta kayod saray kalaban yo.

¹⁰Ontan met diad saray agew a panliliket yodiad saray Pista na Balon Bulan tan arum ni ran niganan pistapaknul yo ra yan trumpita no isaklang yo la ray bagat yon popoolan tan saray bagat a para kareenan. Diad satan tulongan ta kayo. Siak so Katawan a Dios yo.

¹¹Diad kumaduamplon agew na kumadwan bulan na kumadwan taon kayari na insiput ed Egipto na saray Israelita, inmatagey imay lorem ya anakbung ed Tuldan Ayamay Katawan,

¹²kanyan ginapwan day onkurang manlapud Kalawakan na Sinai. Samay lorem tinmonda ed kalawakan na Paran.

¹³Onung ed ganggan na Katawan diad panamegley nen Moises, saray Israelita ginapwan day mankurang,

¹⁴tan kapag onalis ira ag da oomaney oksuy da. Agrupo-grupo ran mankurang tan onaan iray walad silong na bandira na olupan ya iwawanwan na tribu nen Juda. Si Naason a lakin anak nen Aminadab so pangulo ra.

¹⁵Si Natanael a lakin anak nen Zuar so pangulo na tribu nen Isacar,

¹⁶tan si Eliab a lakin anak nen Helon so pangulo na tribu nen Zabulon.

¹⁷No niabeba la may Tulda, saray kabyangay boleg di Gerson tan Merari a sikaray managawit, gapwan day mankurang.

¹⁸Say ontombuk a mankurang et saray walad silong na bandira na olupan ya iwawanwan na tribu nen Ruben. Agrupo-grupo ra tan si Elizur a lakin anak nen Sedeur so pangulo ra.

¹⁹Si Selumiel a lakin anak nen Zurisadai so pangulo na tribu nen Simeon,

²⁰tan si Eliasaf a lakin anak nen Deuel so pangulo na tribu nen Gad.

²¹Insan saray Levitan kabyangay boleg nen Coat so ontombuk a mankurang a sankaawit da ray masanton kagawaan. Kasabi rad pasen a pankampoan da, nipaalagey la may Tulda.

²²Say ontombuk a mankurang et saray walad silong na bandira na olupan ya iwawanwan na tribu nen Efraim. Agrupo-grupo ra tan si Elisama a lakin anak nen Amihud so pangulo ra.

²³Si Gamaliel a lakin anak nen Pedazur so pangulo na tribu nen Manases,

²⁴tan si Abidan a lakin anak nen Gideoni so pangulo na tribu nen Benjamin.

²⁵Saray onur a mankurang a sikaray guardiad beneg na amin da ray olupan et saray walad silong na bandira na olupan ya iwanwan na tribu nen Dan. Agrupo-grupo ra tan si Ahiezer a lakin anak nen Amisadai so pangulo ra.

²⁶Si Pagiel a lakin anak nen Ocran so pangulo na tribu nen Aser

²⁷tan si Ahira a lakin anak nen Enan so pangulo na tribu nen Neftali.

²⁸Sikato ya sirin so oksuy na kurang da ray Israelita kapag iyalis day kampo; agrupo-grupo ran mankurang.

²⁹Si Moises kuantod kinen bayaw ton si Hobab a lakin anak nen Jetro a taga Madian, Ngalngali kami la ompikal ya onlad dalin ya imbagay Katawan ya iter tod sikami. Insipan ton paaligwasen so Israel, kanyan mila kad sikami, et pinabangen mi kad aligwas mi.

³⁰Inmebat, si Hobab, Ag ak la mila; ompawil ak lad dalin kon nianakan.

³¹Inkuanen Moises, Ag mo kami kari tataynan. Amtan no iner so pakampuan mi ed kalawakan, tan nayarian mo kamin iwanwan.

³²No mila kad sikami, pinabangen mi kad amin a bindision ya iter ed sikami na Katawan.

³³Nen tinaynan na saray totoo so Sinai a mansanton palandey, nanakar iran taloy agew. Wala lawas ed onaan da imay Kaban na Sipanan na Katawan a mananap na pasen a pankampuan da.

³⁴Kapag onalis iran manlapud sakey a kampo, tarungan ira na lorem na Katawan no agew.

³⁵Kapag ompikal imay Kaban na Sipanan, ikuanen Moises, Alagey ka pa, Katawan; itaytayak mo pa ray kalaban mo tan pabatik mo ray mamobosul ed sika.

³⁶Kapag ontonda, inkuanen Moises, Katawan, pawil ka pad saray libo-libon pamilya na Israel.