Read Pangasinan BILANG 11 Bible Online

BILANG 11 - Pangasinan bible

BILANG 11

¹"Saray totoo nanriklamo ra ed Katawan nipaakar ed saray gunigon da. Nen nadngel na Katawan so riklamo ra, akapasnuk tan angibaki na apoy ed saray totoo. Pinmool ed pegley da tan dineral toy sakey a samput na kampo.

²"Saray totoo et kinmerew ira na tulong ed kinen Moises; nampikasiy Moises ed Katawan, et narep imay apoy.

³"Samay pasen et atawag na Tabera, lapud say apoy na Katawan et pinmool ed pegley da.

⁴"Wala ray sangkailin kaolup na saray Israelita diad pankukurang ra. Nampilpilalekan day makasira na karni, tan anggan saray dilin Israelita nanriklamo ra: Oy la komun ta makasira itayo la na karni!

⁵"Nen saman dimad Egipto sawaan so impapangan tayon sira, tan ag tayon balut ira nanggasgastosan. Nanunotan yo ni ra may pipino, pakuan, kutsay, sibuyas, tan bawang a kinakakan tayo?

⁶"Balet dia, makapkapoy itayo la. Anggapo diay naakanmana lan mana labat ya inagew-agew so kakanen tayo! (

⁷"Say mana et singa ankekelag a bokel; potipotiyan a doyaw so kolor to.

⁸"Kaolup na linaew ya ompepelag ira ed kampo no labi. Diad ontombuk a kabwasan saray totoo et manliber iran mandokdok, gilingen da odino bayoen da ran pino-pino a singa arina, insan da ilambung tan gawaen dan maimpis iran tinapay. Say taway to et singa tinapay ya inlotod larak na oliba.)

¹⁰Nadngel nen Moises iray amin a totoon manririklamo nen agrupo-grupo ran nanalagey ed saray lolooban na saray tulda ra. Agunigon si Moises lapud akapasnuk so Katawan ed sikara.

¹¹Inkuantod Katawan, Akin et aliwliway gagawaen mod siak? Akin et naermenan ka ed siak? Akin et impasakbat mod siak so pangasikaso ed sarayan amin a totoo?

¹²Ag ko pinalsa odino inyanak ira! Akin et pagmaliwen mo ak a sakey ya umaasikasod sikara tan ampopoen ko rad taklay kon singa ra melag ya ogogaw ya anggad dalin ya insipan mon iter ed saray lalaki ra?

¹³Iner so pakalaan koy karnin para sarayan amin a totoo? Mikakasi ra lawas ya onkerew ed siak na karni.

¹⁴Ag ko nayarian a bokur koy makaoley ed sikaran amin; ag ko la ya nayarian a songduan!

¹⁵No onya niy gawaen mod siak, panangasim ta patey mo ak la, pian ag ak la mantepel na inkaruksam ed siak.

¹⁶Say Katawan kuantod kinen Moises, Manipon ka na pitomplon lalakin nabibirbir a pangulo na saray totoo, iyakar mo rad mad Tuldan Ayaman ko, tan ibagam ed sikaran manalagey irad abay mo.

¹⁷Onakseb ak tan mitongtong ak ed sikad man, insan mangala ak ed ispiritun inter kod sika tan iter kod sikara. Diad satan natulongan da kan mangasikaso ed sarayan totoo, et ag mo la bukor so mangasikaso.

¹⁸Ikuanmo natan ed saray totoo, Linisan yo ray sikayon dili para nabwas; et nawalaan kayoy kanen yon karni. Say Katawan nadngel to kayon nantagleey ya imbaga yon makapangan kayo komun na karni tan maung niy kipapasen yo nen wala kayod Egipto. Say Katawan itdan to kayo la na karni a kanen yo.

¹⁹Ag kayo mangan na karni ed loob na sanagew labat, odino duaran agew, odino limaran agew, odino samploran agew, odino duamplon agew,

²⁰no ag ingen diad loob na intiron sakey bulan. Mangan kayo na sawasawaan ya anggad natama kayo. Onyay nagawa lapud impolisay yo so Katawan a kaibiba yo tan nanriklamo kayod sikato a lablabay yo lan ag kayo komun tinmaynan a manlapud Egipto.

²¹Si Moises kuantod Katawan, Wadia ak a mangiwawanwan na anem a lasus a libon totoo, et ibabagam ya itdan mo ra na karni ed loob na sakey bulan.

²²Wala ra kasiy baka tan karniro a patasen ya ondugan kanen da? Duga kasin kanen da so amin a sira ed dayat?

²³Wala sirin so ag ko nagawaan? ebat na Katawan. Ag mabayag nanengneng mo no kasi nasumpal so sinalitak odino andi!

²⁴Kanyan pinmaway si Moises tan imbaga tod saray totoo so impaibaga na Katawan: Impantitipon to ray pitomplon pangulo na Israel tan impasen to rad kaliber-liber na Tulda.

²⁵Insan inmakseb a walad lorem so Katawan tan akisalitad kinen Moises. Angala ed ispiritu ya inter tod kinen Moises tan inter tod sikara. Nen dinmapod sikara so ispiritu, ginapwan day inmeyag a singa saray propita, balet ag nambayag.

²⁶Saray duara ed saramay pitomplon pangulo, di Eldad tan Medad, et nanayam ira ed dalem na kampo tan ag ira linma ed kawalaan na samay Tulda. Dimad dalem na kampo dinmapod sikara so ispiritu, et ginapwan da met so inmeyag a singa saray propita.

²⁷Walay sakey a lakin tobun-balo a batik ed kinen Moises tan imbaga tod sikato so gagawaen di Eldad tan Medad.

²⁸Insan si Josue a lakin anak nen Nun, tan nanlapud impanbalolaki to et katulongan la nen Moises, nansalita tan kuantod kinen Moises, Patondam ira!

²⁹Inmebat si Moides, Nununoten mo so pankaabigan ko? Oy la komun a say Katawan et iter tod amin a totoo to so ispiritu to tan paeyagan to ran amin a singa saray propita!

³⁰Insan si Moises tan saramay pitomplon pangulo na Israel et pinmawil la ra ed kampo.

³¹Kabebekta say Katawan pinasuplug toy sakey a mabiskeg a dagem ya angawit na saray pugon nanlapud dayat, a say tikyab da et sakey mitro so kaatagey da ed dalin. Pinanatan da so kampo tan diad kaliber-liber to ya anggad pigapigan kilomitroy kaarawid balang dapag.

³²Kanyan diad saman ya agew, sanagew tan sanlabi, insan sanagew lamet ed ontombuk ya agew so impanerel na saray totoo ed saramay pugo; anggapod sikaray akarel na limlimamplon tiklis. Impapaagew da ra ed kaliber-liber na kampo.

³³Nen daakan niy karnin kakanen da, akapasnuk ed sikara so Katawan tan pinadalan tod sikaray salot.

³⁴Atawag iman a pasen na Kibrot-hattoava, lapud impompon dad man iray totoon nampilalek a makapangay karni.

³⁵Manlapud man saray totood Israel inmalis irad Hazerot tan dimay nankampoan da.