Read Pangasinan BILANG 13 Bible Online

BILANG 13 - Pangasinan bible

BILANG 13

¹"Say Katawan kuantod kinen Moises,

²"Mamili ka na sakey a pangulo na balang tribu, ta ibakim iran ispia a mannengneng ed dalin na Canaan ya iter kod saray Israelita.

³"Tinmoluk si Moises ed Katawan tan manlapud kalawakan na Paran imbaki to ray onggendan a lalakin pangulon pinili: Diad tribu nen Ruben, si Samua ya anak nen Zacur Diad tribu nen Simeon, si Safat ya anak nen Hori Diad tribu nen Juda, si Caleb ya anak nen Jefone Diad tribu nen Isacar, si Igal ya anak nen Jose Diad tribu nen Efraim, si Oseas ya anak nen Mun Diad tribu nen Benjamin, si Palti ya anak nen Rafu Diad tribu nen Zabulon, si Gadiel ya anak nen Sodi Diad tribu nen Manases, si Gadi ya anak nen Susi Diad tribu nen Dan, si Amiel ya anak nen Gemali Diad tribu nen Aser, si Setur ya anak nen Micael Diad tribu nen Neftali, si Nahabi ya anak nen Vapsi Diad tribu nen Gad, si Geuel ya anak nen Maki.

¹⁶Sikara yay ispian imbaki nen Moises a mannengneng ed dalin. Sinalatan to na Josue so ngaran nen Oseas a lakin anak nen Nun.

¹⁷Nen imbaki ra nen Moises, inkuantod sikara, Manlapud dia laka yod baybay insan kayo ontuloy ed abalaten na Canaan tan sabi yoy anggad nipokdul a pasen.

¹⁸Nengneng yo no anto man a dalin, pigaran totooy manaayam diman, tan no panoy kabiskeg da.

¹⁹Nengneng yo no maung odino makapoy iman a dalin tan no manaayam ed saray baley ya anggapoy padir iray totoo odino diad saray siudad ya aliber na padir.

²⁰Nengneng yo met no matabad may dalin tan no katakelan. Ag yo met lilingwanan so mangisempet na pigaran bungay kakiewan diman. (Panaon lad saman ya onggapo lan naluto iray bungay ubas.)

²¹Kanyan saramay lalaki amaarap irad baybay tan ninengneng da may dalin manlapud kalawakan na Zin diad abalaten ya anggad Rehob ya abay na Dalan na Hamat diad baybay.

²²Linma ran inmona ed abalaten na samay dalin tan akasabi ra ed Hebron a panaayaman na saray boleg di Ahiman, Sesai, tan Talmai, a kabyangan ira na poli na alan a tatawagen na Anakim. (Say Hebron et niletneg lan pitoy taon kasakbayan na inkiletneg na Zoan ed Egipto.)

²³Akasabi ra ed Patar na Escol, et diman ira amoter na sangay ubas a walay sakey a monggul a bunga to. Diad gaway belat na saramay bunga kinaukolan a duaran katao so anakbat ed tiken. Angisempet met ira na saray bungay granada tan igos. (

²⁴Saman a dalin et atawag a Patar na Escol lapud samay sakey a monggul na ubas ya inalad man na saray Israelita.)

²⁵Kayarin ninengneng na saramay ispia imay dalin ed loob na apataplon agew, pinmawil ira

²⁶ed kindi Moises, Aaron, tan amin ya Israelita diad Kades ed kalawakan na Paran. Imbalita ra so anengneng da tan impanengneng da ra may bungay kiew ya insempet da.

²⁷Inkuandad kinen Moises, Ninengneng mi may dalin et arumog mi a mayaman tan mataba; nia ray pigaran bungay kakiewan diman.

²⁸Balet makapanyari ray totoon manaayam diman, tan ankakabaleg iray siudad diman tan aliber ira na padir. Say maoges ni, anengneng mi rad may kabyangay boleg na alan.

²⁹Diad niabalaten a parti na saman a dalin saray Amalecita so manaayam; diad kapokdulan iran pasen saray Heteo, Jebuseo, tan saray Amorreo so manaayam; tan diad gilig na Dayat na Mediteraneo tan diad gilig na Ilog na Jordan saray Cananeo so manaayam.

³⁰Si Caleb pinareen to ray totoon manririklamo ed kinen Moises tan kuanto, Dogpaan ti la natan iman a dalin tan dakepen tayo la; sarasarag tayon looban tan dakepen.

³¹Balet saramay linman kaiba nen Caleb kuanda, Andi, ag tayo ra man nasarag a totoo; mabiskeg ni ra nen say sikatayo.

³²Kanyan inwakawak dad saray Israelita so tilatilan balita a nipaakar ed samay dalin a ninengneng da. Inkuanda, Saman a dalin a nila mi et ag napangalaan na magenap a pantagano na anggan saray totoon manaayam diman. Atatagey iray totoon anengneng mid man,

³³tan akanengneng kami ni ingen na saray alan a kabyangan iray boleg nen Anak. Say pakanengneng mid sikamin dili et singa kami labat dorun; ontan met angangkoy pakanengneng dad sikatayo.