Read Pangasinan BILANG 14 Bible Online

BILANG 14 - Pangasinan bible

BILANG 14

¹"Sanlabin nanakis ed kaermenan iray totoo.

²"Nanriklamo ra sumpad kindi Moises tan Aaron a kuanda, Magmaung ni komun no inaatey itayo lad mad Egipto odino diad kalawakan!

³"Akin et say Katawan iyakar to itayod saman a dalin? Napatey itayo ed bakal, tan nadakep iray kaasawaan tan saray anak tayo. Ag magmaung nin ompawil itayod Egipto?

⁴"Kanyan inkuandad sakey tan sakey, Mamili tayo na sakey a pangulo tan ompawil itayo la ed Egipto!

⁵"Insan si Moises tan si Aaron dinmakmomo ra ya anggad dalin diad arap na amin a totoo.

⁶"Et si Josue ya anak nen Nun tan si Caleb ya anak nen Jefone a kabyangan irad saramay ispia pinipilat day kawes da diad pangipanengneng day ermen da

⁷"tan kuandad saray totoo, Sankaabigan a dalin imay inimano mi.

⁸"No maliket ed sikatayo so Katawan, iyakar to tayod man tan iter tod sikatayo man a mayaman tan mataban dalin.

⁹"Ag kayo onsusumlang ed Katawan tan ag kayo ontatakot ed saray totoon manaayam diman. Mainomay tayo ran dakepen. Say Katawan kaolup to itayo tan tinalo to ray diriyos ya angyagel ed sikara; kanyan ag kayo natatakot.

¹⁰Dawitdawit da la ran tupaken, balet kabebekta anengneng na saray totoo so kagalangan na Katawan a pinmatnag ed tagey na Tulda.

¹¹Say Katawan kuantod kinen Moises, Kapigay pangangga na pangipopolisay ed siak na sarayan totoo? Kapigay pangangga na ag da panmatalek ed siak, anggaman ya amayamay iray milagron ginagawak ed arap da?

¹²Ipadalan kod sikaray salot tan deralen ko ra, balet pagmaliwen ta ka ya ama na sakey a bansa a lalon maawang tan makapanyari nen say sikara!

¹³Balet si Moises kuantod Katawan, Impaway mod Egipto ira yan totoo diad panamegley na pakayarim. No narengelan na saray Egipsio so ginawam ed saray totoom,

¹⁴ibaga rad saray totoon manaayam ed sayan dalin so ginawam. Nadngelan la na sarayan totoo a sika, Katawan, et kaolup mi ka, mabatabatar kan nanengneng no ontonda kan ompetek ed sikami, tan wala kad onaan mi ed nengneng na sakey a lusek a lorem no agew tan sakey a lusek ya apoy no labi.

¹⁵Natan no pateyen mo ra yan amin a totoo, saray bansan akabalita na inkabantug mo et ibaga ra

¹⁶a pinatey mod kalawakan iray totoom lapud ag mo nayarian iran iyakar ed dalin ya insipan mon iter ed sikara.

¹⁷Kanyan natan, Katawan, pikasik ed sika ya ipanengneng moy pakayarim tan sumpal mo so insipan mo nen inkuanmo,

¹⁸Siak, a Katawan, et aliwan maipapasnuk, tan ipanengneng ko so baleg a panangaron ag mangoman, tan pirdonaen ko so kasalanan tan say pananumlang. Balet andisaew a dusaen ko ray anak tan saray apo ya anggad kumatlo tan kumapat a kailalakan lapud saray kasalanan da ray atateng da.

¹⁹Et natan, Katawan, onung na kabaleg na panangarom ya ag mangoman, pikasik ed sika a pirdonam pay kasalanan da ra yan totoo, a singa impamirdonam ed sikara nanlapu lad samay intaynan dad Egipto.

²⁰Say Katawan inmebat, Pirdonaen ko ra onung ed kerew mo.

²¹Balet isipan ko a legan a mabilay ak tan legan a papanoen na kagalangan ko so mundo,

²²anggapod sarayan totoo so makaloob ed saman a dalin. Anengneng da so kagalangan ko tan saray milagron ginagawak dimad Egipto tan diad kalawakan, balet sinusubok da ak ya amimpigapiga tan ag da ak inonur.

²³Anggapod sarayan angipolisay ed siak so makaloob ed saman a dalin.

²⁴Balet lapud domay liknaan nen Caleb tan nansiansian matoor ed siak, abuloyan kon makakar ed dalin a nila ton ninengneng, tan kayaryanen na saray kabyangay boleg to iman a dalin

²⁵a saray patar et panaayaman natan na saray Amalecita tan saray Cananeo. Poliktar kayo nabwas ta laka yod kalawakan a mamaarap ed Dayat ya Akaba.

²⁶Say Katawan kuantod kindi Moises tan Aaron,

²⁷Kapigay itondan manriklamo sumpad siak ira yan maoges a totoo? Alabas lay nadngel kon riklamo ra!

²⁸Natan ibagam ed sikara yan ebat: Isipan ko a legan a mabilay ak, gawaen ko so kerew yo. Siak a Katawan so nansalita.

²⁹Ompatey kayo tan nataytayak ed sayan kalawakan iray bangkay yo. Lapud nanriklamo kayo sumpad siak, anggapod sikayo so makaloob ed saman a dalin a say taon to et onsoluk ed duamplo.

³⁰Insipan ko a panayamen ta kayod man, balet anggapo la natay makapanayam diman likud ed kindi Caleb tan Josue.

³¹Imbaga yo a nadakep iray anak yo, balet iyakar ko rad saman a dalin ya ag yo labay, tan sikatoy panayaman da.

³²Ompatey kayo dia ed kalawakan.

³³Apataploy taon a manakar-akar ed kalawakan iray anak yo, manirap ira lapud aliwa kayon matoor ed siak; manakar-akar ira ya anggad ompatey so kaonuran a mabilay ed sikayo.

³⁴Apataploy taon a manirap kayo lapud kasalanan yo; sakey taon so kasimbang na balang sanagew na samay apataploy agew ya impannengneng yod samay dalin. Naamtaan yod satan so kabaliksan na pasnuk kod sikayo!

³⁵Isipasipan kon gawaen ya ed sikayo, sikayo ran maoges a totoon nantitipon ya onsumpad siak. Ompatey kayon amin dia ed kalawakan. Siak a Katawan so nansalita.

³⁶Saramay lalakin imbaki nen Moises a manispia ed dalin et aliwan tua so imbalita ra kanyan saray totoo nanriklamo ra sumpad Katawan. Lapud saya, impadalan na Katawan so salot ed saray totoo et inaatey ira.

³⁸Diad saramay labinduan ispia di Josue tan Caleb labat so akapaliis ed patey.

³⁹Nen sinalita nen Moises ed saray Israelita so imbaga na Katawan, mapalaloy impanermen da.

⁴⁰Diad kabkabwasan ed ontombuk ya agew ginapwan dan looban iray kapokdulan a dalin. Inkuanda, Akaparaan kami la natan ya onla ed pasen ya insipan ed sikatayo na Katawan. Birbiren mi a nankasalanan kami.

⁴¹Balet inkuanen Moises, Akin sirin et susumlangen yo natan so Katawan? Ag kayo manalo!

⁴²Ag kayo ontutuloy. Ag kayo olupen na Katawan, tan taloen kayo na saray kalaban yo.

⁴³No mibakal kayod saray Amalecita tan saray Cananeo, napatey kayo; ag kayo olupen na Katawan lapud ag kayo tinmoluk ed sikato.

⁴⁴Balet impasoot day linma ed kapokdulan iran pasen, anggaman ya ag inmalis ed kampo si Moises tan say Kaban na Sipanan na Katawan.

⁴⁵Insan saray Amalecita tan saray Cananeo a manaayam ed saraman a pasen dinogpaan da ra tan tinalo da ra, tan inosilan da ra ya anggad Horma.