Read Pangasinan BILANG 15 Bible Online

BILANG 15 - Pangasinan bible

BILANG 15

¹"Say Katawan inter tod kinen Moises

²"iray onggendan a bilin ed saray totood Israel a nepeg dan tombuken no wala la rad dalin ya iter tod sikara.

³"Say bakan kalakyan, say karniron kalakyan, say karniron kabatyan, odino say kanding et nayarin iyapay ed Katawan a sakey a bagat a popoolan, odino sakey a bagat a panumpal na sipan, odino sakey a bagat a manlapud mabolus a linawa, odino sakey a bagat no silibraan yo ray niganan pista yo; makapaliket ed Katawan so balingit na sarayan bagat.

⁴"Siopamay mangisaklang ed Katawan na sakey a karniro odino sakey a kanding a bagat a popoolan et nepeg a tekepan to so balang ayep na sakey kilon arina a nikames ed sakey a litron larak na oliba a bagat a trigo tan duaran litron alak.

⁶"No sakey a karniron kalakyan so ibagat, nepeg a tekepan na duaran kilon arina a nikames ed sakey tan kapalduan litron larak na oliba a bagat a trigo

⁷"tan sakey tan kapalduan litron alak. Makapaliket ed Katawan so balingit na sarayan bagat.

⁸"No sakey a bakan kalakyan so isaklang ed Katawan a sakey a bagat a popoolan odino sakey a bagat a panumpal na sipan odino sakey a bagat a para kareenan,

⁹"nepeg a takepan na taloran kilon arina a nikames ed duaran litron larak na oliba a bagat a trigo

¹⁰tan katekep na apatiran litron alak. Makapaliket ed Katawan so balingit na sayan bagat.

¹¹Sikato ya so itekep ya iyapay ed kapag bagat a bakan kalakyan, karniron kalakyan, karniron kabatyan, odino kanding.

¹²No masoluk a sakey ya ayep so isaklang, nepeg a naaruman met so katekep a bagat onung ed karakel na ayep.

¹³Amin da ray nianak ya Israelita et nepeg a gawaen day onya no mangyapay ira na bagat a popoolan; say balingit to ya et makapaliket ed Katawan.

¹⁴Diad anggan anton panaon say sakey a sangkailin manaayam ed kawalaan yo, mabayag man odino andokey et nepeg ya onuren to met ira yan totontonen no mangyapay na bagat a popoolan, a say angub to et makapaliket ed Katawan.

¹⁵Diad amin a panaon ya onsabi, nampara ray totontonen a para sikayo tan saray sangkailin manaayam ed kawalaan yo. Anggapo so pandomaan yo ed arap na Katawan;

¹⁶anggapo met so pandomaan na saray ganggan tan saray totontonen a nepeg yon onuren tan nepeg dan onuren.

¹⁷Say Katawan inter tod kinen Moises

¹⁸iray onggendan a bilin ed saray totood Israel a nepeg dan tombuken no wala la rad dalin ya iter tod sikara.

¹⁹No mangan kayod man na bungay dalin, mangibiig kayo na iyapay yon nidoma-doman bagat ed Katawan.

²⁰Say ononan tinapay a gawaen yod arina na balon anin trigo et iyapay yon nidoma-doman bagat ed Katawan. Say pangyapay yo et singa pangyapay yoy nidoma-doman bagat a trigo ya inilik yo.

²¹Diad amin a panaon ya onsabi, sayan nidoma-doman bagat a tinapay et nepeg ya iter yod Katawan.

²²Balet no bilang ta walay sakey a toon ag to ginagalan sumlangen so pigarad saray totontonen ya inter na Katawan ed kinen Moises,

²³tan no bilang ta diad arapen a panaon saray amin ya Israelita et ag ira ononur ed amin ya ingganggan na Katawan diad panamegley nen Moises,

²⁴et sayan ag da iyonur et lapud ag da pikakabat, nepeg a mangyapay ira na bakan kalakyan a para bagat a popoolan a say balingit to et makapaliket ed Katawan. Ibagat da ya a katekep na manepeg a bagat a trigo tan bagat ya alak. Mangyapay met ni ra na sakey a kanding a kalakyan a sakey a bagat a para kasalanan.

²⁵Say pari gawaen toy sirimonya a panlinis ed amin ya Israelita, et napirdona ra lapud ag da ginagala so impakalingo ra tan angyakar irad Katawan na bagat a para kasalalanan a sikatoy bagat a popoolan.

²⁶Napirdona iray amin ya Israelita tan amin da ray sangkailin manaayam ed kawalaan da, lapud walay pibibiang na balang sakey ed sikara ed samay agawan lingo.

²⁷No say sakey a too et ag to ginagalay mankasalanan, nepeg a mangyapay na sakey a taon a kanding a kabatyan a bagat a para kasalanan.

²⁸Diad altar say pari gawaen to so sirimonya na panaglinis pian nalinisan imay too ed kasalanan to, et sikatoy napirdona.

²⁹Sayan totontonen et onkana ed siopaman a makapanggawa na ag to ginagalan kasalanan, nianak man ya Israelita odino sakey a sangkailin manaayam ed kawalaan na saray Israelita.

³⁰Balet siopamay gagalaen toy mankasalanan, nianak man ya Israelita odino sakey a sangkaili, ludlureyen toy Katawan tan nepeg a pateyen,

³¹lapud impolisay to so imbagay Katawan tan ginagala ton sinumlang so sakey ed saray ganggan to. Sikaton dili so makaoley ed dilin ipatey to.

³²Aminsan nen wala nid kalawakan iray Israelita, walay sakey a toon apesgaan a mandodokdok ed Agew na Panagpainawa na kiew ya itotongo.

³³Niyakar ed kinen Moises, Aaron tan amin a totood Israel.

³⁴Ginuardiaan da ta aliwan malinew no antoy nepeg a gawaen ed sikato.

³⁵Insan say Katawan kuantod kinen Moises, Satan a too et nepeg a pateyen; tupaken na amin a totoo diad paway na kampo.

³⁶Kanyan amin a katoowan impaway dad kampo imay too tan tinupak da ya anggad ag to impatey, onung na ingganggan na Katawan.

³⁷Say Katawan kuantod saray totood Israel diad panamegley nen Moises: Peketan yo na palagoygoy iray suyok na kawes yo tan berber yo na asul a koldon so balang palagoygoy. Nepeg a gawaen yoy onya ed amin a panaon.

³⁹Saray palagoygoy et manangipanunot ira, ta kapag nanengneng yo ra nanunotan yo ray ganggan ko et onuren yo ra; diad satan ag yo ak ikaindan tan ag yo onuren iray labay tan pilalek yo.

⁴⁰Saray palagoygoy so mangipanunot ed sikayo a nepeg ya onuren yo ray amin a ganggan ko et sikayoy sigput a makayaryan ko.

⁴¹Siak so Katawan a Dios yo; impaway ta kayo ed Egipto pian siak so magmaliw a Dios yo. Siak so Katawan.