Read Pangasinan BILANG 19 Bible Online

BILANG 19 - Pangasinan bible

BILANG 19

¹"Say Katawan ingganggan to ra di Moises tan Aaron

²"ya iter dad saray Israelita iray onggendan a totontonen. Mangyakar kayo na ambalangan baka ya anggapon balut so deral na laman to tan ag nin balut nisinta,

³"insan yo iter ed kinen Eleazar a pari. Iyakar ed paway na kampo so baka tan pateyen ed arap nen Eleazar.

⁴"Mangalay Eleazar na daiset a dala, insan diad panamegley na gamet to mamimpito ton iwalsik diad dapag a mamaarap ed Tulda.

⁵"Nepeg a poolan ed arap na samay pari so intiron baka a pati say katat, karni, dala, tan pait to.

⁶"Insan samay pari mangala na kiew a sidro, sangay isopo, tan sakey ya ambalangan koldon tan ibontuk to rad apoy.

⁷"Kayari to ya, ipesak toy kawes to tan kalboan toy laman to na danum, insan nayarian to lay onloob ed kampo; balet siansian marotak ni onung ed ganggan ya anggad labi.

⁸"Samay toon amool ed baka et nepeg met ya ipesak toy kawes to tan kalboan toy laman to na danum, balet sikatoy siansian marotak ni onung ed ganggan ya anggad labi.

⁹"Say sakey a toon malinis onung ed ganggan et alaen toy dapul na samay baka, insan to iyan ed sakey a pasen a malinis onung ed ganggan diad paway na kampo, a diman nisinup ya ikana na saray Israelita diad pangiparaan dad danum a pangekal na inkarotak na sakey a too onung ed ganggan. Sayan sirimonya et gawaen a pangekal na kasalanan.

¹⁰Say toon angala na saray dapol et nepeg ya ipesak to so kawes to, balet siansian marotak ni onung ed ganggan ya anggad labi. Mansiansia ya anggad kapigan yan totontonen, para saray Israelita tan saray sangkailin manaayam ed kawalaan da.

¹¹Siopamay maniwit na bangkay et pitoy agew a marotak onung ed ganggan.

¹²Nepeg a linisan toy sikaton dili na danum a panaglinis no kumatlo tan kumapiton agew, et diad ontan magmaliw a malinis. Balet no ag to linisan so sikaton dili ed kumatlo tan kumapiton agew, ag magmaliw a malinis.

¹³Siopamay maniwit na bangkay tan ag to linisan so sikaton dili et siansian marotak onung ed ganggan, lapud ag asibuan so laman to na danum a panaglinis. Dotakan to so Tulda na Katawan, et ag la nibilang a sakey ed saray totoo na Dios.

¹⁴Saya so ganggan no walay toon ompatey ed dalem na sakey a tulda: pitoy agew a marotak onung ed ganggan so siopaman a walad dalem na samay tulda tan siopaman ya onloob.

¹⁵Magmaliw met a marotak so dinan man ya anggapoy sakub a banga odino boyug ed dalem na samay tulda.

¹⁶Magmaliw a marotak a pitoy agew so siopaman a maniwit ed toon pinatey odino inatey a bukor ed paway na ayaman, odino siopaman a maniwit na pokel na inatey odino maniwit na lobuk.

¹⁷Pian naekal so inkarotak na sakey a too, alaen so daiset a dapul na samay ambalangan bakan pinoolan a pangekal na kasalanan, insan ikarga ed sakey a banga tan danuman na ambetel.

¹⁸Say sakey a toon malinis onung ed ganggan et mangalay sakey a sangay isopo, idelnet tod samay danum, insan iwalsik tod samay tulda, diad amin a walad dalem to tan amin da ray totoon wadman. Ontan met say sakey a toon malinis onung ed ganggan walsikan toy sakey a toon nandiwit na pokel na inatey odino nandiwit na bangkay odino lobuk.

¹⁹Diad kumatlon agew tan diad kumapiton agew say too a malinis onung ed ganggan et walsikan to na samay danum so toon marotak onung ed ganggan. Diad kumapiton agew say toon malinis linisan to may toon marotak. Diad mansironget magmaliw a malinis onung ed ganggan kayari ton impesak so kawes to tan kinalboan so laman to na danum.

²⁰Siopamay nagmaliw a marotak onung ed ganggan tan ag to linisan so sikaton dili, siansian marotak onung ed ganggan, lapud ag asiboan so laman to na danum a panaglinis. Dotakan to so Tulda na Katawan tan ag la nibilang a sakey ed saray totoo na Dios.

²¹Sayan totontonen et mansiansia ya anggad arapen a panaon. Say toon mangiwalsik na danum a panaglinis nepeg met ya ipesak toy kawes to; siopamay maniwit na danum a panaglinis et siansian marotak ya anggad labi.

²²Antokaman a diwiten na toon marotak et magmaliw a marotak met onung ed ganggan, tan siopamay maniwit na sayan antokaman a marotak et siansian marotak ya anggad labi.