Read Pangasinan BILANG 2 Bible Online

BILANG 2 - Pangasinan bible

BILANG 2

¹"Say Katawan inter to ray onggendan a bilin ed kindi Moises tan Aaron.

²"No ilira na saray Israelita so kampo ra, balang sakey a too onlira ed kawalaan na olupan to tan diad silong na bandira na boleg to. Nepeg a nipaliber ed Tulda so kampo.

³"Diad bandad bokig so pankampoan na olupan nen Juda, diad saray grupo ra a wala rad silong na pakaoley da ray onggendan a pangulo ra: Diad tribu nen Juda, si Naason a lakin anak nen Aminadab, pitomplo tan apat a libo tan anem a lasus iran amin Diad tribu nen Isacar, si Natanael alakin anak nen Zuar, limamplo tan apat a libo tan apat a lasus iran amin Diad tribu nen Zabulon, si Eliab a lakin anak nen Helon, limamplo tan piton libo tan apat a lasus iran amin. Say karakel na amin da ray walad sayan olupan et sanlasus walomplo tan anem a libo tan apat a lasus. Sayan olupan nen Juda so onona ed pankurang da.

⁴Diad bandad abalaten so pankampoan na olupan nen Ruben, diad saray grupo a wala rad silong na pakaoley da ray onggendan a pangulo ra: Diad tribu nen Ruben, si Elizur a lakin anak nen Sedeur, apataplo tan anem a libo tan liman lasus iran amin Diad tribu nen Simeon, si Selumiel a lakin anak nen Zarisadai, limamplo tan siam a libo tantalon lasus iran amin Diad tribu nen Gad, si Eliasaf a lakin anak nen Deuel, apataplo tan liman libo, anem a lasus tan limamplo ran amin. Say karakel na amin da ray walad sayan olupan et sanlasus limamplo tan sakey a libo, apat a lasus tan limamplo. Sayan olupan nen Ruben so onkumadua ed pankurang da.

¹⁷Diad pangyalis ed Tulda saray Levita so manawit a pegleyen ira na saramay ononan duaran olupan tan saray duaran samput ya olupan. Diad ikurang da balang olupan mansiansia ed gendat ya oksuy tod kampo diad silong na dilin bandira to.

¹⁸Diad bandad sagur so pankampoan na olupan nen Efraim, diad saray grupo ra a wala rad silong na pakaoley da ray onggendan a pangulo: Diad tribu nen Dan, si Elisama a lakin anak nen Amihud, apataplon libo tan liman lasus iran amin. Diad tribu nen Manases, si Gamaliel a lakin anak nen Pedazur, talomplo tan duan libo tan duan lasus iran amin. Diad tribu nen Benjamin, si Abidan a lakin anak nen Gideoni, talomplo tan liman libo tan apat a lasus iran amin. Say karakel na amin da ray walad sayan olupan et sanlasus tan walon libo tan sanlasus. Sayan olupan nen Efraim so onkumatlo ed pankurang da.

²⁵Diad bandad baybay so pankampoan na olupan nen Dan, saray grupo ra a wala rad silong na pakaoley da ray onggenda a pangulo: Diad tribu nen Dan, si Ahiezer a lakin anak nen Amisadai, anemaplo tan duan libo tan piton lasus iran amin. Diad tribu nen Aser, si Pagiel a lakin anak nen Ocran, apataplo tan sakey a libo tan liman lasus iran amin. Diad tribu nen Neftali, si Ahira a lakin anak nen Enan, limamplo tan talon libo tan apat a lasus iran amin. Say karakel na amin da ray walad sayan olupan et sanlasus limamplo tan piton libo tan anem a lasus. Sayan olupan nen Dan so samput ed pankurang da.

³²Say karakel na amin a nilistan totood Israel onung ed saray grupo na olupan a kawalaan da, et anem a lasus tan talon libo, limanlasus tan limamplo.

³³Onung na ingganggan na Katawan ed kinen Moises, ag nibilang iray Levita ed sayan listaan da ray Israelita.

³⁴Kanyan saray totood Israel sinumpal day amin ya ingganggan na Katawan ed kinen Moises. Nankakampo ra, a balang sakey ed sikara walad silong na dilin bandira to; tan kinmukurang ira, a balang sakey ed sikara walad dilin boleg to.