Read Pangasinan BILANG 20 Bible Online

BILANG 20 - Pangasinan bible

BILANG 20

¹"Diad ononan bulan akasabid kalawakan na Zin iray amin ya Israelita tan nankampo ra ed Cades. Inatey diman si Miriam tan imponpon da.

²"Anggapoy danum dimad nankampoan da, kanyan minokut day Moises tan Aaron

³"tan nanriklamo ra: Maung ni komun ya inaatey kamid man ed arap na Tulday Katawan a kaiba mi ray kadalaan min arum ya Israelita.

⁴"Akin et inyakar yo kami diad sayan kalawakan? Labay yo ya ompatey kami dia tan saray ayayep mi?

⁵"Akin et impaway yo kamin manlapud Egipto pian niakar yo kami diad sayan makapasinagem a pasen ya anggapoy ontubon tanaman? Anggapo diay trigo, igos, ubas, granada. Anggapoy anggad danum a nainom!

⁶"Inmarawi ra di Moises tan Aaron tan nanalagey ira ed lolooban na samay Tulda. Dinmakmomo ra ya anggad dalin, insan pinmatnag ed sikara so kagalangan na Katawan.

⁷"Say Katawan kuantod kinen Moises,

⁸"Alam imay baston a walad arap na Kaban na Sipanan, insan yo pantitiponen nen Aaron iray amin a totoo. Diad arap dan amin mansalita ka ed baton-dampay a wadman, et ompaway diman so danum. Diad ontan napapaway mod samay baton dampay so danum ya inomen na saray totoo tan saray ayayep da.

⁹"Linmay Moises ta inala to may baston onung na ingganggan na Katawan.

¹⁰Di Moises tan Aaron impantitipon dad arap na samay baton-dampay iray totoo tan inkuanen Moises, Dengel kayo, sikayo ran mananumpan totoo! Nepeg miy mamapaway ed sayan baton-dampay na danum a para sikayo?

¹¹Insan inyatagey nen Moises imay baston tan pinekpek ton amidua imay baton-dampay, et pinmaway so manwawan sobul na danum. Inmiinom iray amin a totoo tan amin ya ayayep.

¹²Balet nanpasnukan na Katawan ira di Moises tan Aaron. Inkuanto, Lapud kulang so pananisia yon mamirbir na masanton pakayarik diad arap na saray totood Israel, aliwan sikayoy mangipangulod sikara diad iloob dad dalin ya insipan kon iter ed sikara.

¹³Agawa ya ed dalin na Meriba a diay nanriklamoan na saray Israelita sumpad Katawan tan diay angipanengnengan to a sikatoy masanto.

¹⁴Manlapud Cades si Moises angibaki ed ari na Edom na pigaran totoo. Inkuanda, Saya so papaibaga na saray kakanayon mo a kabyangan na saray tribu na Israel. Amtam so inkairapan mi la,

¹⁵no panon so inyakar ed Egipto na saray lalaki mi, a dimay nanayaman mi na pigapigay taon. Saray Egipsio et pinapairap da ray lalaki mi tan ontan met ed sikami.

¹⁶Kanyan kinmerew kami na tulong ed Katawan. Dinengel toy intawag mi, kanyan angibaki na anghil ya angipaway ed sikami manlapud Egipto. Wadya kami natan ed Cades, say baley a miketeg ed nasasakopan mon dalin.

¹⁷Padalan mo kami pad dalin mo. Sikami tan saray ayayep mi et ag kami oniwas ed dalan, ag kami onlad kaalogan odino kaubasan mo tan ag kami oninom ed saray bobun mo. Mampetek kamin manakar ed maawang a dalan ya anggad nalabsanan miy nasasakopan mon dalin.

¹⁸Balet inmebat iray Edomita, Ag mi kayo abuloyan ya ondalan ed bansa mi! No ituloy yoy ondalan dogpaen mi kayon bakalen.

¹⁹Inkuan na saray totood Israel, Diad maawang a dalan labat so panakaran mi; no sikami odino saray ayayep mi et oninom na danum yo, bayaran misay pilalek mi labat et say ondalan ed dalin yo.

²⁰Inolit ya imbaga na saray Edomita, Ag kami onabuloy! Insan pinmaway so amayamay a masesebeg a sondalo ra ya ondogpad saray totood Israel.

²¹Lapud saray Israelita et ag ira padalanen na saray Edomita ed dalin da, amoliktar iray Israelita tan amaarap la rad sananey a dalan.

²²Amin da ray Israelita et tinaynan day Cades tan akasabi ra ed Palandey na Hor

²³a walad ketegan na Edom. Inkuan diman na Katawan ed kindi Moises tan Aaron,

²⁴Ag makaloob si Aaron ed dalin ya insipan kon iter ed Israel; ompatey la lapud sinumlang yon dua so ganggan ko dimad Meriba.

²⁵Itagar mod Palandey na Hor si Aaron tan si Eleazar ya anak to,

²⁶tan ekal mod man so kawes na pari ya akasolung ed kinen Aaron, insan mo isolung ed kinen Eleazar. Ompatey diman si Aaron.

²⁷Ginawa nen Moises so ingganggan ed sikato na Katawan. Kinmalab ira ed Palandey na Hor a nengnengnengen ira na amin ya Israelita.

²⁸Insan inekal nen Moises imay kawes na parin akasolung ed kinen Aaron tan insolung tod kinen Eleazar. Inatey dimad toktok na palandey si Aaron, insan la ra linmasur di Moises tan Eleazar.

²⁹Akabatan ed satan na amin ya Israelita ya inatey si Aaron, kanyan talomploy agew a nanermen ira.