Read Pangasinan BILANG 21 Bible Online

BILANG 21 - Pangasinan bible

BILANG 21

¹"Nen say arin Cananeo a manooley ed Arad diad abalaten na Canaan et nadngelan ton onsasabi ray Israelita tan ondadalan ira ed Atarim, dinogpaan to ra tan adakep toy pigarad sikara.

²"Insan saray Israelita sinambaan dad Katawan: No panaloen mo kamin mibakal ed saraman a totoo, sigput min deralen iray siudad da.

³"Dinengel ira na Katawan kanyan impanalo to ran akibakal ed saray Cananeo. Kanyan saray Israelita sigput dan dineral iray Cananeo tan saray siudad da. Horma so impangingaran dad saman a pasen.

⁴"Tinaynan na saray Israelita so Palandey na Hor tan nanakar ira ed dalan a mamaarap ed Dayat ya Akaba, pian nasaliberberan day dalin na Edom. Balet diad dalan ag la akaanos iray totoo

⁵"tan nansalita ra sumpad Dios tan diad kinen Moises. Inkuandan nanriklamo, Akin et impaway mo kamid Egipto anta ompatey kami lamlamang diad kalawakan? Anggapo diay naakan odino nainom tan atama kami la ed sayan andi-kakanaan a kakanen!

⁶"Insan say Katawan angibaki na saray nanditan oleg ed saray Israelita et amayamay so aketket tan inatey ed sikara.

⁷"Sinmingger ed kinen Moises iray totoo tan kuanda, Nankasalanan kami nen nansalita kamiy sumpad Dios tan sumpad sika. Ipikasim pad Katawan ya ekalen to la ra yan oleg. Kanyan impikasi nen Moises iray totoo.

⁸"Insan say Katawan imbaga tod kinen Moises a manggawa na gansan oleg tan ibitin tod sakey a teken, pian mambilay so siopaman ya aketket na oleg insan onnengneng ed gansan oleg.

⁹"Kanyan nanggawa na gansan oleg si Moises tan imbitin tod sakey a teken. Siopaman ya aketket na oleg insan onnengneng ed samay gansan oleg, et mambilay.

¹⁰Inmalis iray Israelita tan nankampo ra ed Obot.

¹¹Tinaynan da man a pasen insan nankampo ra ed Iye-abarim diad kalawakan a nibokig na dalin da ray Moabita.

¹²Insan ira nakampo ed Patar na Zared.

¹³Manlapud man inmalis ira lamet tan nankampo ra ed baybay a dapag na Ilog na Arnon, diad kalawakan a nasabi toy dalin da ray Amorreo. (Say arnon et ketegan da ray Moabita tan saray Amorreo.)

¹⁴Sikato yay makasengeg a sasalitaen na Libron Saray Bakal na KATAWAN so ...baley na Waheb diad dalin na Sufa, tan saray patar; say Ilog na Arnon,

¹⁵tan say palasur na saray patar a nasabi toy baley na Ar tan mamaarap ed ketegan na Moab.

¹⁶Manlapud man linma ra ed sakey a pasen a tatawagen na Beer a kabaliksan toy bobun a diman inkuan na KATAWAN ed kinen Moises, Pantitipon mo ray totoo, ta itdan ko ra na danum.

¹⁷Diad saman a panaon saray Israelita kinanta ra: Bobun, papaway moy danum mo; Et ilugay mi diad panamegley na sakey a kanta:

¹⁸Say bobun a kinotkot na saray prinsipi Tan saray pangulo da ray totoo, Diad panamegley na sitroy ari Tan saray baston da. Manlapud kalawakan inmalis ira ed Matana,

¹⁹tan manlapud man linma ra ed Nahaliel, tan manlapud Nahaliel inmalis ira ed Bamot,

²⁰tan manlapud man inmalis ira ed patar a nasasakopan na saray Moabita, ya ososdongan na Palandey na Pisga, tan tantandagan toy kalawakan.

²¹Insan saray totood Israel angibaki ra an pigarn totoo ed ari na saray Amorreo a si Sehon tan impaikuanda:

²²Padalan mo kami pa ed dalin mo. Sikami tan saray ayayep mi et ag kami oniwas ed dalan, ag kami onlad kaalogan odino kaubasan mo, tan ag kami oninom ed saray bobun mo. Mampetek kamin mananakar ed maawang a dalan ya anggad nalabsanan miy nasasakopan mon dalin.

²³Balet si Sehon ag to abuloyan ya ondalan ed dalin to iray Israelita. Tinipon to ray sondalo to tan pinmaway iran linmad Jahaz diad kalawakan tan dinogpaan da ray Israelita.

²⁴Balet saray Israelita apatey da ray amayamay a kalaban da tan nanayaman day dalin da manlapud Ilog na Arnon ya anggad Jabok a kawalaan da ray Amonita lapud mabiskeg so ketegen da.

²⁵Kanyan saray totood Israel adakep da ray amin a siudad na saray Amorreo, pati say Hesbon tan amin a kaliber-liber ton baley, insan da ra nanaayaman.

²⁶Say Hesbon et manonan siudad na ari da ray Amorreo a si Sehon ya akibakal nen saman ed ari na Moab tan adakep toy intiron dalin to ya anggad Ilog na Arnon.

²⁷Sikato yay makasengeg a saray umaanlong ikankanta ra: Laka yod Hesbon, diad siudad nen Ari Sehon! Labay min nanengneng a nipaalagey lamet tan napasimbalo.

²⁸Nen saman manlapud sayan siudad na Hesbon Pinmaway a singa apoy iray sondalo nen Sehon; Dineral to so siudad na Ar diad Moab Tan inoput toy kapokdulan na tagey na Arnon.

²⁹Pakaskasi kayo la, sikayon taga Moab! Aderal-deral kayo la, sikayon manangigalang ed Kemos! Inyabuloy na dios yo a nadakep na arum a bansa iray lalaki, Tan saray bibii adakep ira na ari na saray Amorreo.

³⁰Balet natan aderal la ray kabyangay boleg da, Manlapud Hesbon ya anggad Dibon, Manlapud Nasim ya anggad Nofa a kaabay na Medeba.

³¹Kanyan saray totood Israel nanayam ira ed dalin da ray Amorreo,

³²et si Moises angibaki na saray lalaki a mananap na sankaabigan ya idogpa rad siudad na Jazer. Adakep na saray Israelita yan siudad tan saray kaliber-liber ton baley tan pinataynan da ray Amorreo a manaayam diman.

³³Insan sinmipa ray Israelita tan amaarap ira ed Basan, balet pinmaway si Ari Og na Basan tan saray sondalo to et dinogpaan da ra ed Edrei.

³⁴Say Katawan kuantod kinen Moises, Ag kayo ontatakot ed sikato. Panaloen ta kayo ed sikato, amin a totoo to, tan dalin to. Gawa yod sikato so singa ginawa yo ed kinen Sehon ya ari da ray Amorreo a nanoley ed Hesbon.

³⁵Kanyan pinatey na saray Israelita si Og, saray lalakin anak to, tan amin da ray totoo to; anggapoy inkera ran mabilay, insan da nanayaman so dalin to.