Read Pangasinan BILANG 29 Bible Online

BILANG 29 - Pangasinan bible

BILANG 29

¹"Diad ononan agew na kumapiton bulan, nepeg a mantitipon kayon mangigalang ed Dios tan ag kayo mankikimey. Diad satan ya agew paknulen iray trumpita.

²"Mangisaklang kayod Katawan na bagat a popoolan a say balingit to et makapaliket ed sikato: sakey a kilaw na bakan kalakyan, sakey a karniron kalakyan, tan pitoran sakey taon a kordiron kalakyan; nepeg ya anggapoy deral na laman da.

³"Mangyapay kayo na manepeg a bagat a trigo, say arinan nikames ed larak na oliba; kapag sakey a bakan kalakyan tekepan yo na taloran kilon arina, samay karniron kalakyan duaran kilon arina,

⁴"tan kapag sakey a kordiro sakey kilon arina.

⁵"Mangyapay kayo met na sakey a kanding a kalakyan a sikatoy bagat a para kasalanan, et diad onya nagawa so sirimonya a panlinis ed saray totoo.

⁶"Isaklang yo ra ya a kaaruman na bagat a popoolan para ononan agew na bulan a katekep toy bagat a trigo tan say inagew-agew a bagat a popoolan a katekep toy bagat a trigo tan say bagat ya alak. Sarayan bagat a popoolan et makapaliket ed Katawan so balingit da.

⁷"Diad kumaplon agew na kumapiton bulan mantitipon kayon mangigalang ed Dios; ag kayo mamangan odino mankikimey.

⁸"Mangisaklang kayod Katawan na bagat a popoolan a say balingit to et makapaliket ed sikato: sakey a kilaw na bakan kalakyan, sakey a karniron kalakyan tan pitoran sakey taon a kordiron kalakyan; nepeg ya anggapoy deral na laman da.

⁹"Mangyapay kayo na manenepeg a bagat a trigo, say arinan nikames ed larak na oliba: say sakey a bakan kalakyan tekepan yo na taloran kilon arina, saray karniron kalakyan duaran kilon arina,

¹⁰tan kapag sakey a kordiro sakey kilon arina.

¹¹Mangyapay kayo met na sakey a kanding a kalakyan a sikatoy bagat a para kasalanan, a kaaruman na kanding a nibagat diad panggawa na sirimonyan panlinis ed saray totoo, tan say inagew-agew a bagat a popoolan a katekep toy bagat a trigo tan say bagat ya alak.

¹²Diad kumalabiliman agew na kumapiton bulan mantitipon kayon mangigalang ed Dios. Silibraan yon pitoy agew yan pista a pamagalang yod Katawan tan ag kayo mankikimey.

¹³Diad ononan agew na sayan pista mangyapay kayod Katawan na bagat a popoolan a say balingit to et makapaliket ed sikato: labintalon kilaw na bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

¹⁴Mangyapay kayo na manepeg a bagat a trigo, say arinan nikames ed larak na oliba: kapag sakey a bakan kalakyan tekepen yo na taloran kilon arina, samay karniron kalakyan duaran kilon arina,

¹⁵tan kapag sakey a kordiro sakey kilon arina.

¹⁶Mangyapay kayo met na sakey a kanding a kalakyan a sikatoy ibagat a para kasalanan. Iyapay yo ra ya a kaaruman na inagew-agew a bagat a popoolan a katekep toy bagat a trigo tan say bagat ya alak.

¹⁷Diad kumadwan agew mangibagat kayo na labinduan kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

¹⁸Ibagat yo ra ya a katekep da ray arum nin bagat a kinaukolan ed ononan agew na pista.

²⁰Diad kumatlon agew mangibagat kayo na labinsakey a malangwer a bakan kalakyan, duaran karniron kalakyan, tan labinapat a sakey taon a karniron kalakyan; nepeg ya anggapoy deral na laman da.

²¹Ibagat yo ra ya a katekep da ray arum nin bagat a kinaukolan ed ononan agew.

²³Diad kumapat ya agew mangibagat kayo na samploran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

²⁴Ibagat yo ra ya a katekep da ray arum nin bagat a kinaukolan ed ononan agew.

²⁶Diad kumaliman agew mangibagat kayo na siamiran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

²⁷Ibagat yo ra ya a katekep da ray arum nin batgat a kinaukolan ed ononan agew.

²⁹Diad kumanem ya agew mangibagat kayo na waloran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

³⁰Ibagat yo ra ya a katekep da ray arum nin bagat a kinaukolan ed ononan agew.

³²Diad kumapiton agew mangibagat kayo na pitoran kilaw a bakan kalakyan, duaran karniron kalakyan, tan labinapat a sakey taon a kordiron kalakyan; nepeg ya anggapoy deral na laman da.

³³Ibagat yo ra ya a katekep da ray arum nin bagat a kinaukolan ed ononan agew.

³⁵Diad kumawalon agew mantitipon kayon mangigalang ed Dios tan ag kayo mankikimey.

³⁶Mangyapay kayod Katawan na bagat a popoolan a say balingit to et makapaliket ed sikato: sakey a kilaw na bakan kalakyan, sakey a karniron kalakyan, tan pitoran sakey taon a kordiron kalakyan; nepeg ya anggapoy deral na laman da.

³⁷Ibagat yo ra ya a katekep da ray arum nin bagat a kinaukolan ed ononan agew.

³⁹Sikara ya so totontonen a nipaakar ed saray bagat a popoolan, saray bagat a trigo, saray bagat ya alak, tan saray bagat a para kareenan ya iyapay yo rad Katawan no silibraan yo ray niganan pista yo. Sikara yay a kaaruman na saray bagat ya isaklang yo diad panumpal yoy insipan yo odino isaklang yo ran bagat a manlapud mabolus a linawa.

⁴⁰Kanyan si Moises imbaga tod saray totood Israel iray amin ya ingganggan ed sikato na Katawan.