Read Pangasinan BILANG 3 Bible Online

BILANG 3 - Pangasinan bible

BILANG 3

¹"Sikato yay pamilya di Aaron tan Moises diad samay panaon ya akitongtong so Katawan ed kinen Moises diad tagey na Palandey na Sinai.

²"Si Aaron apatiray lalakin anak to a di Nadab a sankapangulowanan, Abiu, Eleazar, tan Itamar.

³"Alanaan iray larak tan nisaklang iran papari;

⁴"balet inatey ira di Nadab tan Abiu nen angisaklang irad Katawan na aliwan masanton apoy diad Kalawakan na Sinai. Anggapoy anak da, kanyan di Eleazar tan Itamar so nanlingkur a papari legan na impanbilay nen Aaron.

⁵"Say Katawan kuantod kinen Moises,

⁶"Yakar mo diad arap iray kabyangay tribu nen Levi tan torom iran katulong nen Aaron a pari.

⁷"Sikaray makaoley ed saray kimey ed Tuldan Ayaman ko tan manlingkur ed saray papari tan amin da ray Israelita.

⁸"Sikaray makaoley ed amin a kagawaan na Tulda tan manlingkur ed saray arum nin Israelita.

⁹"Say kanepegan labat a kimey na saray Levita et say panlingkur ed kindi Aaron tan saray anak ton lalaki.

¹⁰Torom si Aaron tan saray anak ton lalaki a manggawa na saray susumpalen na pari; likud ed sikara pateyen so siopaman a manggawa na susumpalen na pari.

¹¹Say Katawan kuantod kinen Moises,

¹²Kayaryan ko la natan iray Levita. Nen pinatey kon amin iray lalakin pangulowan ya anak na saray Egipsio, insaklang kon kayaryan kon amin iray pangulowan a lakin anak na saray Israelita, tan amin a besag ya anak na saray ayayep. Natan, saray Levita so kayaryan ko, aliwa lan saray lalakin pangulowan ya anak da ray Israelita; sikaray kayaryan ko. Siak so Katawan.

¹³

¹⁴Diad Kalawakan na Sinai say Katawan ingganggan toy Moises

¹⁵ya ilista to ray Levita onung ed boleg tan pamilya na balang sakey ed sikara; ilista to ray amin a lalakin sakey bulan a mampaatagey.

¹⁶Si Moises sinumpal to yan ganggan na Katawan.

¹⁷Taloray lalakin anak nen levi: di Gerson, Coat, tan Merari; sikaray sengeg na saray boleg a natatawag onung ed kangaranan da. Duaray lalakin anak nen Gerson: di Libni tan Simei; apatiray lalakin anak nen Coat: di Amram, Izar, Hebron, tan Uziel; tan duaray lalakin anak nen Merari: di Mali tan Musi. Sikaray sengeg na saray boleg a natatawag onung ed kangaranan da.

¹⁸

¹⁹

²⁰

²¹Saray boleg nen Gerson et saray pamilya di Libni tan Simei.

²²Piton libo tan liman lasus ya amin so karakel na nilistan lalakin sakey bulan a mampaatagey.

²³Sayan boleg et nepeg a mankampo ed sagur diad beneg na Tulda.

²⁴Si Eliasaf a lakin anak nen Lael so pangulo na sayan boleg.

²⁵Sikara so makaoley ed Tulda, say sakbung tod dalem, say sakbung tod tapew, say kurtina na lolooban,

²⁶saray kurtina na solar a walad kaliber-liber na Tulda tan say altar, tan say kurtina na lolooban na solar. Sikaray makaoley ed amin a kimey a nipaakar ed sarayan bengatla.

²⁷Say boleg nen Coat et saray pamilya di Amram, Izar, Hebron, tan Uziel.

²⁸Walon libo tan anem a lasus ya amin so karakel na nilistan lalakin sakey bulan a mampaatagey.

²⁹Sayan boleg et nepeg a mankampo ed abalaten na Tulda.

³⁰Si Elzafan a lakin anak nen Uziel so pangulo na sayan boleg.

³¹Sikaray makaoley ed Kaban na Sipanan, say lamisaan, say panangipatoonan na lamparaan, saray altar, saray kagawaan ya ikakana na saray papari ed dalem na Masanton Pasen, tan say kurtina na loloobay Sankasantosan a Pasen. Sikaray makaoley ed amin a kimey a nipaakar ed sarayan bengatla.

³²Si Eleazar a lakin anak nen Aaron so pangulo da ray Levita. Sikatoy makaoley ed saray mankikimey ed Masanton Pasen.

³³Say boleg nen Merari et saray pamilya di Mahli tan Musi.

³⁴Anem a libo tan duan lasus ya amin so karakel na nilistan lalakin sakey bulan a mampaatagey.

³⁵Sayan boleg et nepeg a mankampo ed baybay na Tulda. Si Zuriel a lakin anak nen Abihail so pangulo na sayan boleg.

³⁶Sikaray makaoley a mangasikaso ed saray tabla na Tulda, saray balewet to, saray lusek to, saray dapan da ray lusek to, tan amin a kagawaan to. Sikaray makaoley ed amin a kimey a nipaakar ed sarayan bengatla.

³⁷Sikara met so makaoley a mangasikasod saray lusek, saray dapan da ray lusek, saray palpal, tan saray lobir.

³⁸Si Moises tan si Aaron tan saray anak ton lalaki et nepeg a mankampo ra ed bokig diad arap na Tulda. Sikaray makaoley ed amin a kimey a susumpalen ed loob na Masanton Pasen para saray Israelita. Likud ed sikara pateyen so siopaman a manggawa na susumpalen na pari.

³⁹Duamplo tan duan libo so karakel na amin a lalakin Levita a sakey bulan a mampaatagey. Unong na ingganggan na Katawan sikara yay inlista di Moises tan Aaron onung na boleg na balang sakey ed sikara.

⁴⁰Say Katawan kuantod kinen Moises, Kayaryan kon amin iray lalakin pangulowan ya anak na saray Israelita. Kanyan ilistam so kangaranan da ray amin a lalakin pangulowan ya Israelita a sakey bulan a mampaatagey. Balet kayaryan koy amin a Levita. Siak so Katawan. Kayaryan ko met ya amin iray ayayep na Levita, aliwa lan saray amin a besag ya anak na ayayep.

⁴¹

⁴²Tinmoluk si Moises, inlista ton amin iray lalakin pangulowan ya anak da ray Israelita a

⁴³sakey bulan a mampaatagey; duamplo tan duan libo, duan lasus, pitomplo tan talo ran amin.

⁴⁴Say Katawan kuantod kinen Moises,

⁴⁵Isaklang mo natan a kayaryan ko iray Levita a kasalat ira na amin da ray lalakin pangulowan ya anak na saray Israelita, tan isaklang mo met iray ayayep na saray Levita a kasalat ira na amin da ray besag ya anak na ayayep na saray Israelita. Siak so Katawan.

⁴⁶Bangta saray lalakin pangulowan ya anak da ray Israelita et dakel ni na duanlasus tan pitomplo tan talo nen saray Levita, nepeg mon dondonen ira yan soluk ya anak a laki.

⁴⁷Kapag sakey ya anak dondon mo na limaran kuartan pilak, onung ed panagkuintad santuario.

⁴⁸Iter mod kinen Aaron tan saray anak to so naalan kuarta.

⁴⁹Tinmoluk si Moises ed saya kanyan inala

⁵⁰toy sanlibo, talon lasus anemamplo tan liman kuartan pilak, insan to ra

⁵¹inter ed kinen Aaron tan saray anak ton lalaki.