Read Pangasinan BILANG 33 Bible Online

BILANG 33 - Pangasinan bible

BILANG 33

¹"Say onggendan ya agawa iter to ray kangarannan na saray pasen ya angiliraan na saray Israelita na kampo ra kayari ran tinaynan so Egipto diad panangipangulo di Moises tan Aaron.

²"Lapud ganggan na Katawan, insulat nen Moises so ngaran na kapag pasen a nankampoan da.

³"Saray totood Israel tinaynan day dalin na Egipto nen kumalabinliman agew na ononan bulan na taon, say agew kayari na ononan Paskua. Diad panangyagel na Katawan tinaynan day siudad na Rameses a sankanengneng ira na saray Egipsio

⁴"a mangipopompon na saray pangulowan a lalakin anak da a pinapatey na Katawan. Diad impanggawa na Katawan ed saya, impanengneng ton sikatoy makapanyari nen saray diriyos ed Egipto.

⁵"Tinaynan na saray totood Israel so Rameses tan inlira dad Sukot so kampo ra.

⁶"Say tinmombuk a kampo ra et diad Etam a walad gilig na kalawakan.

⁷"Manlapud man amoliktar ira tan linma rad Pihahirot a walad bokig na Baal-zefon, insan ira nankampod abay na Migdol.

⁸"Tinaynan day Pihahirot tan binaliw day Dayat ya Ambalanga diad inyakar dad kalawakan na Sur; kayari na taliyo agew ya impankurang da, nankampo ra ed Mara.

⁹"Manlapud man linma rad Elim tan dimay nankampoan da, lapud walad may labinduan sobul tan pitomplo kiew na palmira.

¹⁰Tinaynan da so Elim tan nankampo rad abay na Dayat ya Suez.

¹¹Say sinmoblay a nakampoan da et diad Kalawakan na Sin.

¹²Insan ira nankampod Dofka,

¹³tan kayari to ya, diad Alus.

¹⁴Insan ira nankampo ed Refidim ya anggapod may nainom dan danum.

¹⁵Manlapud Refidim ya anggad Palandey na Hor nankampo ra ed saray onggendan a pasen: say Kalawakan na Sinai, Kibrot-hataava, Hazerot, Ritma, Rimon-fares, Libna, Rissa, Keelata, Palandey na Sefer, Harada, Makelot, Tahat, Tare, Mitka, Hasmona, Moserot, Bene-yaakan, Hor-hagidgad, Jotbata, Abrona, Ezion-geber, say Kalawakan na Zin (a salanti say Cades), tan say Palandey na Hor, diad gilig na dalin na Edom.

¹⁶Lapud ganggan na Katawan, kinalab nen Aaron a pari so Palandey na Hor. Inatey diman a mantaon na sanlasus tan duamplo tan talo nen ononan agew na kumaliman bulan na kumaapataplon taon kayariy intaynan na saray Israelita manlapud Egipto.

¹⁷Say ari na Arad diad niabalaten na Canaan nadngelan to ya onsasabi ray Israelita.

¹⁸Manlapud Palandey na Hor ya anggad saray patar na Moab, saray Israelita nankampo ra ed saray onggendan a pasen: Zalmona, Punon, Obot, Iye-abarim a sakop na dalin na Moab, Dibon-gad, Almon-diblataim, Palandey na Abarim ya asingger ed Palandey na Nebo, tan diad saray patar na Moab diad nibaliw na Ilog na Jordan manlapud Jerico, a nanleetan na Bet-jesimot tan Patar na Acacia.

¹⁹Diad saray patar na Moab ed nibaliw na Jordan manlapud Jerico say Katawan inter tod kinen Moises

²⁰iray onggendan a bilin a para saray totood Israel: No ombaliw kayod Jordan diad iyakar yod dalin na Canaan,

²¹nepeg yon pataynanen iray amin a manaayam diman. Deral yo ray amin a pasen a panangigalangan da.

²²Kayaryanen yo so dalin tan panayaman yo, lapud iter kod sikayo.

²³Apag yod saray tribu tan saray boleg so dalin diad panamegley na pampapalaranan; iter yod baleg a boleg so baleg a dalin tan diad melag a boleg so melag met a dalin.

²⁴Balet no ag yo pataynanen iray manaayam diman, saray akeraan et mangiter irad sikayo na gunigon a singa tenek ed mata yo tan sakit ed diking yo, tan labanan da kayo.

²⁵No ag yo ra pataynanen, deralen ta kayo, a singa ginetmak a panderal kod sikara.