Read Pangasinan BILANG 4 Bible Online

BILANG 4 - Pangasinan bible

BILANG 4

¹"Imbaga na Katawan ed kinen Moises

²"a bilangen to ray Levitan kabyangay boleg nen Coat onung ed pamilya na balang sakey ed sikara,

³"tan ilista ton amin iray lalakin mantaon na talomplo ya anggad limamplo a nayarian day mankimey ed Tuldan Ayamay Katawan.

⁴"Say kimey da et nipaakar ed saray sankasantosan a bengatla.

⁵"Say Katawan inter to ray onggendan a bilin. No saray Israelita et onalis irad pankampoan da, onloob ed Tulda ira di Aaron tan saray anak ton lalaki, iyabeba ray kurtinad arap na Kaban na Sipanan insan da isakbung ed Kaban.

⁶"Sakuloban da na pinon katat, tapewan da na asul ya abel, insan da isolung iray tiken a panagsakbatan.

⁷"Apisan da na asul ya abel so lamisaan a panangisaklangan na tinapay ed Katawan, insan da itapew diman iray plato, saray yaung a pananginay insinso, saray yaung a pananginay bagat, tan saray ankelag a pasig a pananginay bagat ya alak. Nepeg a walay tinapay lawas ed lamisaan.

⁸"Sakbungan da ra ya na ambalangan abel, tapewan da na pinon katat insan da isolung iray tiken a panagsakbatan.

⁹"Mangala ra na asul ya abel tan sakbungan da so panangipatoonan na lamparaan a pati saray lamparaan to, saray sipit, saray pananginay dapul, tan amin a pananginay larak na oliba.

¹⁰Ponggosen dad pinon katat imay panangipatoonan na lamparaan tan amin a kagawaan to insan da iyan ed panagsakbatan.

¹¹Sakbungan da na asul ya abel imay balituk ya altar, kobutan da na pinon katat, insan da isolung iray tiken a panagsakbatan.

¹²Alaen da ray amin a kagawaan ya ikakana ed dalem na Masanton Pasen, ponggosen da ra na asul ya abel, sakbungan da ra na pinon katat, insan da ra iyan ed panagsakbatan.

¹³Ekalen da ray dapol ed altar insan da sakbungan na ambalbalangan abel.

¹⁴Itapew dad saya iray amin a kagawaan ya ikakana ed altar: saray palangganan pananginay ngalab, saray tinidor, saray karyo, tan saray talyasi. Insan da sakbungan na pinon katat tan isolung da ray tiken a panagsakbatan.

¹⁵No asumpal lan sinakbungan di Aaron tan saray anak to iray masanton bengatla tan saray kagawaan da, ondago ray kabyangan na boleg nen Coat ta sikaray manawit na sarayan masanton bengatla no iyalis la so kampo. Saray kabyangay boleg nen Coat et ag da nepeg a diwiten iray masanton bengatla, ta no diwiten da ompatey ira. Sikara yay nepeg a gawaen na saray kabyangay boleg nen Coat kapag iyalis so Tulda.

¹⁶Si Eleazar; a lakin anak nen pari ya Aaron, so makaoley ed intiron Tulda tan say larak a para saray lamparaan, say insinso, saray bagat a trigo, say ipopoyuk a larak, tan arum nin bengatlad dalem na Tulda a nisaklang ira ed Katawan.

¹⁷Say Katawan kuantod kinen Moises tan si Aaron,

¹⁸Ag yo aabuloyan

¹⁹iray kabyangan na boleg nen Coat ya ompatey ira diad iyasingger dad sarayan sankasantosan a bengatla. Pian ag ira ompatey, onloob ira di Aaron tan saray lalakin anak to ta itdan da na kimey so balang sakey tan ibaga rad sikato so awiten to.

²⁰Balet no onloob ed Tulda iray kabyangay boleg nen Coat, ta nengnengen da, anggan maganggano labat, iray masanton bengatla, ompatey ira.

²¹Say Katawan imbaga tod kinen Moises

²²a bilangen to ray Levitan kabyangay boleg nen Gerson onung na pamilya na balang sakey ed sikara,

²³tan ilista to ray amin a lalakin mantaon na talomplo ya anggad limamplo a nayarian day mankimey ed Tuldan Ayamay Katawan.

²⁴Sikaray makaoley a manawit na saray onggendan a bengatla:

²⁵say Tulda, say sakbung ed dalem, say sakbung ed tapew, say pinon katat ed tapew to, say kurtinad lolooban,

²⁶saray kurtina tan saray lobir a para solar ed kaliber-liber na Tulda tan say altar, saray kurtinad lolooban na solar tan amin ya ikakanad pangilira ed sarayan kagawaan. Gawaen day amin a kimey a nakaukolan ed sarayan bengatla.

²⁷Di Moises tan Aaron so makaoley a saray kabyangay boleg nen Gerson et gawaen da ray amin a kimey ya impabetang di Aaron tan saray anak to ed sikara.

²⁸Sikara yay kimey na saray kabyangay boleg nen Gerson diad Tulda; gawaen da ra yan kimey diad panangiwanwan nen Itamar a lakin anak nen Aaron a pari.

²⁹Say Katawan imbaga tod kinen Moises a bilangen to ray Levitan kabyangay, boleg nen Merari onung ed pamilya na balang sakey ed sikara,

³⁰tan ilista to ray amin a lalakin mantaon na talomplo ya anggad limamplo a nayarian day mankimey ed Tuldan Ayamay Katawan.

³¹Sikaray makaoley a manawit na saray tabla, saray balewet, saray lusek, tan saray dapan na Tulda;

³²tan saray lusek, dapan, palpal, tan saray lobir na solar ed kaliber-liber na Tulda, a pati saray ikakanan pangilira ed saraya. Makaoley so balang sakey a mangawit na sakey a bengatla.

³³Sikara yay nepeg a gawaen na saray kabyangay boleg nen Merari diad panlingkur da ed Tulda; gawaen da ra yan kimey diad panangiwanwan nen Itamar a lakin anak nen Aaron a pari.

³⁴Diad impangonur dad ganggan na Katawan, di Moises, Aaron, tan saray pangulo na Israel binilang da ray kabyangan na saray taloran boleg a Levita, di Coat, Gerson, tan Merari. Binilang da ra onung ed pamilya na balang sakey ed sikara, tan inlista da ray amin a lalakin mantaon na talomplo ya anggad limamplo a nayarian day mankimey ed Tuldan Ayamay Katawan. Nia ray bilang da: Diad boleg nen Coat, duan libo, piton lasus tan limamplo; diad boleg nen Gerson, duanlibo, anem a lasus tan talomplo; diad boleg nen Merari, talonlibo tan duan lasus.

³⁵Nilista so balang laki onung na ingganggan na Katawan ed kinen Moises; tan lapud ganggan na Katawan diad panamegley nen Moises, naitdan so balang laki na nepeg ton kimey a panlingkur o panawit.