Read Pangasinan BILANG 8 Bible Online

BILANG 8 - Pangasinan bible

BILANG 8

¹"Say Katawan kuantod kinen Moises,

²"Ibagam ed kinen Aaron a no ilira to ray pitoran lamparaan ed panangipatoonan, say liwawa et nepeg ya onwandag ed bendad arap.

³"Inmonur si Aaron kanyan inlira to ray lamparaan ya onwandag so liwawa ra ed arap na panangipatoonan.

⁴"Manlapud tagey ya anggad leksab samay panangipatoonan et agawad pinitpit a balituk onung na pangaligan ya impanengneng na Katawan ed kinen Moises.

⁵"Say Katawan kuantod kinen Moises,

⁶"Ibiig mod saray arum a totood Israel iray Levita tan linisan mo ra

⁷"onung ed onggendan a sirimonya: walsikan mo ra na danum a panaglinis, pakiskisan moy intiron laman da tan paipesak mod sikara so kawes da. Diad saya magmaliw iran malinis onung ed ganggan.

⁸"Insan irad satan mangyakar na sakey a kilaw a bakan kalakyan tan say kaukolan a bagat a trigo a salanti say arinan nikames ed larak na oliba; mangyakar ka met na sananey a bakan kalakyan ya ibagat a para kasalanan.

⁹"Insan mo pantitiponen iray amin a totood Israel tan panalagey mod arap na Tuldan Ayaman ko iray Levita.

¹⁰Saray totood Israel et itapew da ray kalimaan da ed kaoloan da ray Levita,

¹¹insan si Aaron isaklang tod siak iray Levita a nidoma-doman rigalon nanlapud saray Israelita, ta gawaen day kimey ko.

¹²Insan saray Levita itapew da ray kalimaan da ed kaoloan da ra may duaran bakan kalakyan; samay sakey ibagat a para kasalanan tan samay sakey isaklang a bagat a popoolan, pian nagawa so sirimonya na panaglinis ed saray Levita.

¹³Isaklang mon nidoma-doman rigalod siak iray Levita, tan ipasen mon makaoley ed sikara si Aaron tan saray anak ton lalaki.

¹⁴Onya so pangibiig mod saray Levita ed saray arum ya Israelita, pian sikaray kayaryan ko.

¹⁵No ayarim lan alinisan tan nisaklang iray Levita, magmaliw iran manepeg a mankimey ed Tulda.

¹⁶Kinayaryan ko ra a kasalat na amin da ray lalakin pangulowan ya anak na saray Israelita, tan siak labat so akankayaryan ed sikara.

¹⁷Nen pinatey ko ray amin a pangulowan ya anak ed Egipto, insaklang kon kayaryan ko so balang lakin pangulowan ya anak na kapag pamilya da ray Israelita tan balang besag ya anak na kapag ayep.

¹⁸Alaen ko la natan iray Levita a kasalat na amin da ray pangulowan ya anak na saray Israelita.

¹⁹Ipalimak ed kinen Aaron tan saray anak to iray Levita a rigalon nanlapud saray Israelita, ta sikaray ontulong ed kimey ed Tulda para saray totood Israel tan sikaray mangyagel ed saray Israelita ed antokaman a doknal a nasagmak da no onasingger iran tuloy ed Masanton Pasen.

²⁰Kanyan insaklang di Moises, Aaron, tan amin a totood Israel iray Levita, onung na ingganggan na Katawan ed kinen Moises.

²¹Saray Levita et nilinisan day sikaran dili tan impesak da ray kawes da, et si Aaron insaklang to ra a nidoma-doman rigalo ed Katawan. Sikato met so anumpal na sirimonya a panlinis ed sikara.

²²Saray totoo ginawa ray amin ya ingganggan na Katawan ed kinen Moises nipaakar ed saray Levita. Kanyan saray Levita et manepeg la ran mankimey ed Tulda diad panangiwanwan di Aaron tan saray lalakin anak to.

²³Say Katawan kuantod kinen Moises,

²⁴Kapag Levita a mantaon na duamplo tan lima manggawa na susumpalen to ed Tuldan Ayaman ko,

²⁵et no nasabi to lay taon a limamplo mampainawa lad kimey to.

²⁶Kayari to ya, nayarin tulongan to ray kapara ton Levita diad panggawa ray susumpalen da ed Tulda, balet ag nayarin gawaen tod sikaton dili so antokaman a kimey. Saya so totontonen a nipaakar ed pankimey da ray Levita.