Read Pangasinan HABACUC 2 Bible Online

HABACUC 2 - Pangasinan bible

HABACUC 2

¹"Onkalab ak ed tagey na panagbantayan ko tan alagden kon nengnengen no antoy ibaga na Katawan ed siak tan no antoy iyebat tod riklamok.

²"Saya so inebat tod siak: Isulat mon malinew ed sakey a tapyak a bato so ipapaamtak ed sika, pian nabasa ya anggan napasimaran labat.

³"Isulat mo yan ipasingayew kod sika, ta aliwa nin natan a panaon so pakagawa to. Balet masiglat ya onsasabiy panaon tan ontua so ipaamtak ed sika. Nayarin singa matantan so isabi to, balet alagar mon onsabi; andi-saew a nagawa, tan ag la naabala so isabi to.

⁴"Et sikato ya so kuanko: Saray maoges a totoo et ag ira makapaliis ed patey, balet saray matonung mambilay ira lapud matooor ira ed Dios.

⁵"Makapalikdo so kayamanan. Mapaatagey tan iray ag mampapainawa iray totoon maagomag iran balut napepenek a singa say patey. Kanyan ag ira ontotondan manakep na saray bansa tan saray totoo, pian nagamuran day labalabay da.

⁶"Saray adakep a totoo elekan da ray anakep ed sikara tan ipanengneng day pambosul dad sikara. Ikuanda, Aalaen yoy ag yo kayaryan, balet pakaskasiy kipapasen yo! Kapigay pangangga na pampapayaman yo diad pamapasoot yon mambayar iray akautang ed sikayo?

⁷"Biglan onsabiy panaon a sikayon anakep ed saray arum a totoo et magmaliw a sikayoy akautang tan napasoot kayon mambayar na abang. Onsabi ray kalaban tan pagiwgiwen da kayo. Samsaman da kayo!

⁸"Sinasamsaman yo ray totood amayamay a bansa, balet natan saray akapaliis ed patey et samsaman da kayo, lapud saray impanpapatey yo na totoo tan lapud inkaruksa yod saray totood mundo tan diad saray siudad to.

⁹"Pakaskasi kayo la! Pinapayaman yo ray pamilya yo lapud saray impansasamsam yod saray ag yo kayaryan, tan impagmaliw yon arawid sulit tan kaatapan iray kaabungan yo.

¹⁰Balet saray ginagawa yo so angipelag ed pamilya yo ed kababaingan; lapud impanderal yod amayamay a bansa impelag yod kadederal so sikayon dili.

¹¹Anggan saray bato ed padir et oneyag ira sumpad sikayo, tan ompoktal ed saray pagsen so eyag da.

¹²Pakaskasi kayo la sikayon angiletneg na siudad lapud panagpatey na totoo tan arum nin kaogsan.

¹³Andi-kakanaan so nansasagputan na saray bansan dinadakep yo, tan natetemek ed apoy iray impapaalagey da. Say Katawan a Makapanyarin-amin so nanggawad saya.

¹⁴Say mundo et napano na pikakabat ed kagalangan na Katawan a singa inkapano na dayat na danum.

¹⁵Pakaskasi kayo la! Diad gaway pasnuk yo pinaabeba tan impelag yod kababaingan iray kaabay yo; impandongildongil yo ran singa abuek.

¹⁶Nakawesan kayo kumun na kagalangan, ingen napelag kayod kababaingan. Maninom kayo tan mandongildongil kayo. Ipainom na Katawan ed sikayo so kupay dusa tan magmaliw a kababaingan so kagalangan yo.

¹⁷Binabatang yoy kakiewan ed takel na Libano; sikayo natan so nabatang. Pinapatey yo ray ayayep to; taktakoten kayo natan na ayayep. Onyay nagawad sikayo lapud saray impanpapatey yod saray totoo tan lapud impanduduksa yod saray totood mundo tan saray siudad to.

¹⁸Antoy kana na sakey a talintaoy dios? Sakey labat a ginawa na sakey a too, et anggapoy nibaga tod sikayo no ag katilaan labat. Antoy kaabigan a niiter na talintao diad panmatalek ed sikato na nanggawad sikato? Say talintao et sakey labat a dios ya ag anggan makasalita.

¹⁹Pakaskasi kayo la! Ikuan yod sakey a poter na kiew, Bangon ka! odino diad sakey a tabas na bato, Alagey ka! Wala tay nipuyan ed sikayo na sakey a talintao? Nayarin naokupan na pilak tan balituk yan talintao, balet anggapoy bilay to.

²⁰Say Katawan et walad dalem na masanton Timplo to; mandeen komun ed arap to so balang sakey a too diad tapew na dalin.