Read Pangasinan ZACARIAS 1 Bible Online

ZACARIAS 1 - Pangasinan bible

ZACARIAS 1

¹"Nen kumawalon bulan na kumadwan taon na panaari nen Dario ed Persia, say Katawan akisalitad kinen propita Zacarias a lakin anak nen Berekias tan apo nen Iddo.

²"Say Katawan a Makapanyarin-amin impaibaga tod kinen Zacarias iray salita to ed saray totoo, Siak a Katawan et mapalaloy pasnuk ko ed saray lalaki yo,

³"balet natan kuankod sikayo, Pawil kayod siak, et ompawil ak ed sikayo.

⁴"Ag yo aaligen iray lalaki yo. Nen saman saray propita sinalita ra so impaikuankod saray totoo a magbabawi rad saray kaogsan da. Balet ag ira dinmengel odino inmonur ed siak.

⁵"Inaatey la ra may lalaki yo tan saramay propita.

⁶"Diad panamegley na saray aripen kon propita inter kod sikara iray ganggan ko tan pinasakbayan ko ra, balet ag da ra inngalngalep kanyan adusa ra. Insan nagbabawi ra tan binirbir da a siak a Katawan a Makapanyarin-amin et dinusak ira onung na kanepegan da tan onung na ginetmak la.

⁷"Nen kumaduamplo tan apat agew na kumalabinsakey a bulan (say bulan a Sebat) na kumadwan taon na panaari nen Dario, say Katawan akisalitad siak diad panamegley na sakey a pasingayew ed labi.

⁸"Anengneng koy sakey ya anghil na Katawan ya akakabayod ambalangan kabayo. Tinmondad kawalaan da ray kiew a mirto diad sakey a patar, tan diad nibeneg to wala ray arum a kabayo; wala ray ambalanga, batekan, tan ampoti.

⁹"Tinepet kod samay too, Antoy kabaliksan da ra yan kabayo? Inmebat may anghil, Ipanengneng koy kabaliksan da.

¹⁰Imbaki ra na Katawan, ta nengnengen da so mundo.

¹¹Saray akakabayod saramay arum a kabayo kuandad samay anghil, Nanlapu kamid intiron mundo, et anengneng min pangaskasiyan tan atalo so sankamundoan.

¹²Insan samay anghil kuanto, Katawan a Makapanyarin-amin, pitomploy taon lan mamapasnuk kad Jerusalem tan saray siudad na Juda. Kapigan kasiy pansamput na ag mo pangasi ed sikara?

¹³Makaligliwa tan makapaliket so inebat na Katawan ed samay anghil.

¹⁴Insan samay anghil imbaga tod siak ya ibawag ko may imbaga na Katawan a Makapanyarin-amin: Mapalaloy panangarok ed Jerusalem a masanton siudad ko.

¹⁵Balet baleg so pasnuk kod saray bansa a manliliket ed kareenan, ta diad pamopokpok koy pasnuk kod saray totook, iloloor dan pairapen iray totook.

¹⁶Kanyan pinmawil ak ed Jerusalem ta kasian koy siudad. Napasimbalon nipaalagey so Timplok tan nipaalagey lamet so siudad.

¹⁷Samay anghil imbaga to met ed siak ya ibawag ko: Ibabaga na Makapanyarin-amin a Katawan ya onaligwas lamet iray siudad to tan tulongan to lamet so Jerusalem, tan pilien to lamet a kayaryan ton dili so siudad to.

¹⁸Diad sananey a pasingayew anengneng koy apatiran saklur na baka.

¹⁹Tinepet kod samay katongtong ko lan anghil, Antoy kabaliksan da ra yan saklur? Inmebet imay anghil, Sikaray mangiriritrato na saramay matalonggaring a nanarian ed mundo ya angikaykayat na saray totoon taga Juda, Israel, tan Jerusalem.

²⁰Insan impanengneng na Katawan ed siak so apatiran kumikimey a sankaawit da ray mantilyo.

²¹Tinepet ko, Antoy gawaen da ra yan totoo? Inmebat imay anghil, Sinmabi ran manaktakot tan mamasuko ed saray bansan sigput ya aneral ed dalin na Juda tan angikaykayat ed saray totoo to.