Read Pangasinan ZACARIAS 13 Bible Online

ZACARIAS 13 - Pangasinan bible

ZACARIAS 13

¹"No onsabiy tan a panaon, kuay Katawan a Makapanyarin-amin, nalokasan so subul a manlinis ed kasalanan tan panangigalang ed talintaoy diriyos iray kabyangay boleg nen David tan saray totood Jerusalem.

²"Diad satan a panaon ekalen kod bansa so kangaranan da ray talintaoy diriyos, et anggapo lay siopaman a makanunot ed sikara. Paekalen kod dalin so siopaman a mangibagan sikato et propita tan ekalen koy pampilalek da ray totoo ed pangigalang ed saray talintaoy diriyos.

³"No ipasoot na siopaman so mampropisiya, say dilin ama tan ina to so mangibagad sikaton sikatoy nepeg a pateyen, lapud ipapasen ton sasalitaen toy salitay Katawan, balet ta mantitila. No mampropisiya say dilin ama tan ina to so manaksak ed sikato ya anggad ag to ipatey.

⁴"No onsabiy tan a panaon, anggapoy propitan makapangikinon ed saray pasingayew to odino ompasen a singa propita odino mansolung na magasal a kawes na propita, pian mamalikdod saray totoo.

⁵"Ibaga to la laingen, Aliwa ak a propita. Sakey ak a dumaralus tan ondadalus ak nanlapu lad impanbalolakik.

⁶"Et no walay manepet ed sikato, Akin ira tay sugat ed pagew mo? onebat, Nalak ira ed abung na kaarok.

⁷"Say Katawan a Makapanyarin-amin kuanto, Bangon ka, ispada, ta dogpaan moy pumapastol a mankikimey na para siak! Patey mo, pian nikaykayat iray karniro! Dogpaan ko ray totook

⁸"et ompatey ed intiron dalin so kakatlo na totoo.

⁹"Suboken ko ray akeraan a kakatlo tan linisan ko ran singa kalinisan na pilak ed apoy. Suboken ko ran singa kasubok na balituk. Insan ira mampikasi ed siak, et ebatan ko ra. Ibagak ed sikara a sikaray totook, tan ibawag dan siak so Dios da.