Read Pangasinan ZACARIAS 6 Bible Online

ZACARIAS 6 - Pangasinan bible

ZACARIAS 6

¹"Wala niy sananey a nipasingayew ed siak. Akanengneng ak natan na apatiran karwahi ya ompapaway ed nanleetan na duaran gansan palandey.

²"Gogoyuren na saray ambalangan kabayo so ononan karwahi, tan gogoyuren na saray andeket a kabayo so kumadwa,

³"saray ampotin kabayo so kumatlo, tan saray batekan a kabayo so kumapat.

⁴"Insan ko tinepet ed samay anghil, Antoy kabaliksan da ra yan karwahi?

⁵"Inmebat, Sikara yay apatiran dagem; kapkapanlapu rad arap na Katawan na intiron dalin.

⁶"Samay karwahin igogoyur na saray andeket a kabayo et mamapaarap irad baybay diad Babilonia, saramay ampotin kabayo et diad bokig so lalaen da, tan saramay batekan et oonla rad bansa diad abalaten.

⁷"Nen ompapaway ira may batekan a kabayo, magangganat ira ya onlan mangimano ed intiron mundo. Samay anghil kuantod sikara Laka yon mannengneng ed intiron mundo! Linma ra sirin a nannengneng ed intiron mundo.

⁸"Insan inmeyag ed siak imay anghil, Pinakepa na saramay kabayon linmad baybay ed Babilonia so pasnuk na Katawan.

⁹"Say Katawan inter tod siak ira yan salita.

¹⁰Inkuanto, Alam iray rigalon inter na saray totoon nibantak ed arum a bansa a di Heldai, Tobias, tan Jedaya, tan lakan tampol ed abung nen Josias a lakin anak nen Sofonias. Amin da ra yan lalaki et pinmawil iran nanlapud Babilonia ya inkibantakan da.

¹¹Gawam a korona iray balituk tan pilak ya iniiter da, insan mo ipatoon ed olo na Pangulon Pari a si Josue a lakin anak nen Jehosadak.

¹²Ibagam ed sikato a say Katawan a Makapanyarin-amin kuanto, Say toon tatawagen na Say Sanga et onaligwas ed kawalaan to tan pasimbaloen ton ipaalagey so Timplo na Katawan.

¹³Sikato so mangipaalagey ed Timplo tan awaten to so kagalangan na sakey ya ari tan oleyan to ray totoo to. Manalagey ed abay na trono to so sakey a pari tan mankimey iran dua a mareen tan maliket,

¹⁴Manayam ed dalem na Timplo na Katawan imay korona a sakey a pakanudnunotan ed kindi Heldai, Tobias, Jadaya, tan Josias.

¹⁵Ondagon ontulong ed pangipaalagey lamet ed Timplo iray totoon manaayam ed arawin dalin. Et no asumpal lan nipaalagey lamet, naamtaan yod satan ya imbaki ak ed sikayo na Katawan a Makapanyarin-amin. Nagawa ra yan amin no sigput yon onuren iray ganggan na Katawan a Dios yo.